අද (03දා) නැගෙනහිර, දකුණු සහ ඌව පළාත්වලත් මාතලේ, නුවරඑළිය සහ පොළොන්නරුව දිස්ත්‍රික්කවලත් විටින් විට වැසි හෝ ගිගුරුම් සහිත වැසි ඇතිවන බව කාලගුණ විද්‍යා දෙපාර්තමේන්තුව සඳහන් කරයි.
උතුරු පළාතේත් අනුරාධපුර දිස්ත්‍රික්කයේත් වැසි ස්වල්පයක් ඇති විය හැක. සෙසු ප්‍රදේශවල සවස් කාලයේදී හෝ රාත්‍රී කාලයේදී තැනින් තැන වැසි හෝ ගිගුරුම් සහිත වැසි ඇතිවේ.
බස්නාහිර, සබරගමුව, දකුණු සහ ඌව පළාත්වලත් මාතලේ සහ නුවරඑළිය දිස්ත්‍රික්කවලත් ඇතැම් ස්ථාන වලට මි.මි. 75 ට වැඩි තරමක තද වැසි ඇති විය හැක.
ගිගුරුම් සහිත වැසි සමග ඇතිවිය හැකි තාවකාලික තද සුළං වලින් සහ අකුණු මඟින් සිදු වන අනතුරු අවම කර ගැනීමට අවශ්‍ය පියවර ගන්නා ලෙස ජනතාවගෙන් ඉල්ලා සිටියි.
දිස්ත්‍රික්ක දෙකකට ඇති වී තිබෙන තදවැසි තත්ත්වය නිසා එම දිස්ත්‍රික්ක දෙකේ ප්‍රාදේශීය ලේකම් කොට්ඨාස 09 කට නාය යෑම් අනතුරු ඇඟවීමේ නිවේදන නිකුත් කර තිබේ.
මේ අනුව බදුල්ල දිස්ත්‍රික්කයේ බදුල්ල,කන්දකැටිය, පස්සර,හාලි ඇල,සොරණතොට,හපුතලේ,මීගහකිවුල සහ ඌව පරණගම ප්‍රාදේශීය ලේකම් කොට්ඨාස බල ප්‍රදේශවලට අනතුරු ඇඟවීම සිදුකර ඇත.
මීට අමතරව නුවරඑළිය දිස්ත්‍රික්කයේ වලපනේ ප්‍රාදේශීය ලේකම් කොට්ඨාසයටද නාය යෑම් අනතුරු ඇඟවීම සිදුකර තිබේ.
මේ අනුව මෙම ප්‍ර දේශවල ජිවත් වන ජනතාව නාය යෑම් අවදානම් පිලිබදව සැලකිලිමත් වන ලෙසත් නායයෑම් ලක්ෂ දුටුවහාම ආරක්ෂිත ස්ථාන කරා ගමන් කරන ලෙසත් ජාතික ගොඩනැගිලි පර්යේෂණ සංවිධානය ඉල්ලා සිටියි
