වසරේ විස්සයි විස්ස ක්‍රීඩකයා - සූර්යා

වසරේ විස්සයි විස්ස ක්‍රිකට් ක්‍රීඩකයා සම්මානය ඉන්දීය ප්‍රහාරාත්මක සුපිරි පිතිකරු සූර්යකුමාර් යාදව්ට හිමි වී ඇත.

අන්තර්ජාතික ක්‍රිකට් කවුන්සිලය (අයි.සී.සී.) මගින් පසුගිය වසරට අදාළව මෙම නම් කිරීම සිදුකොට ඇත. එම වසරේදී ඉන්දීයාව වෙනුවෙන් විශිෂ්ට පිතිහරඹයක නිරත වූ සූර්යා විස්සයි විස්ස ශතක දෙකක් හා අර්ධ ශතක 9ක් රැස් කර ගනිමින් ලකුණු 1,164ක් රැස් කරගෙන ඇත.

එය විස්සයි විස්ස පිටියේදී පිතිකරුවෙකු මේ දක්වා වසරකදී වාර්තා කරගෙන ඇති දෙවැනි ඉහළම ලකුණු ප්‍රමාණය වන අතර, පිතිකරුවෙකු අතින් ලකුණු දහසේ සීමාව ඉක්ම වූ දෙවැනි අවස්ථාවද වේ.

 මීට පෙර 2021 වර්ෂයේදී පාකිස්තානයේ මොහොමඩ් රිස්වාන් විසින් ලකුණු 1,326ක් රැස් කරමින් පිතිකරුවෙකු රැස් කළ වැඩිම ලකුණු සංඛ්‍යාවේ වාර්තාව හිමි කරගෙන ඇත.

සූර්යා එහිදී වසර පුරාම 187.43ක දැවැන්ත ප්‍රහාරාත්මක වේගයක් රඳවාගෙන සිටීම කැපී පෙණින. එය වසරක් තුළ විස්සයි විස්ස ලකුණු 300ට වඩා රැස් කළ පිතිකරුවෙකුගේ හොඳම ප්‍රහාරාත්මක වේගයද වේ.