පැතුම් හා මහීෂ් ඉදිරියට

ආසියානු කුසලාන තරගාවලියේදී ශ්‍රි ලංකා කණ්ඩායමේ පිතිකරුවන් හා පන්දු යවන්නන් මේ දක්වා දැක්වූ දක්ෂතා හේතුවෙන් ජාත්‍යන්තර විස්සයි20 ශ්‍රේණිගත කිරීම්වල ඉදිරියට පැමිණීමට ශ්‍රී ලංකා ක්‍රීඩකයන් කිහිප දෙනෙකුම සමත්ව තිබේ.

මෙහිදි කැපී පෙනෙන ලෙස ඉදිරියට පැමිණීමට මහීෂ් තීක්ෂණ හා පැතුම් නිශ්ශංක සමත්ව තිබේ. විස්සයි20 පිතිකරණ ශ්‍රේණිගත කිරීම්වලට අනුව පැතුම් නිශ්ශංක සමත්ව තිබෙන්නේ පිතිකරණ ‌ශ්‍රේණිගත කිරීම්වල ඔහු 8 වැනි ස්ථානයට පැමිණ ඇති හෙයිනි.

මීට අමතරව නායක දසුන් ශානක ස්ථාන 7ක් ඉදිරියට පැමිණ 39 වැනි ස්ථානයටත්, කුසල් මෙන්ඩිස් ස්ථාන 18ක් ඉදිරියට පැමිණ 42 වැනි ස්ථානයටත්, භානුක රාජපක්ෂ ස්ථාන 14ක් ඉදිරියට පැමිණ 68 වැනි ස්ථානයට පැමිණ තිබේ.

අඛණ්ඩව දින 1155 ලෝකයේ අංක එකේ විස්සයි20 පිතිකරුවා ලෙස සිටි බාබර් අසාම් දෙවැනි ස්ථානයට පත්කරමින් පාකිස්තානයේම තවත් සුපිරි පිතිකරුවෙක් වෙන මොහොමඩ් රිස්වාන් ලෝකයේ අංක එකේ විස්සයි20 පිතිකරුවා බවට පත්ව තිබේ.

මීට අමතරව විස්සයි20 පන්දු යවන්නන් ශ්‍රේණිගත කිරීම්වලදී ශ්‍රී ලංකාවේ වනිඳු හසරංග ස්තාන තුනක් පසුපසට ගොස් තිබේ. ඔහුට හිමිව ඇත්තේ 9 වැනි ස්ථානයයි. කෙසේ වෙතත් මහීෂ් තික්ෂණ ස්ථානයක් ඉදිරියට පැමිණ 8 වැනි ස්ථානයට පත්ව තිබේ. චාමික කරුණාරත්න ස්ථාන 14ක් ඉදිරියට පැමිණ 47 වැනි ස්ථානයට පත්ව තිබේ.