පන්දුවෙන් වැඩ පෙන්නූ වනිඳු ශ්‍රේණිගත කිරීම් හී ඉදිරියට

නවතම විස්සයි 20 ක්‍රිකට් ශ්‍රේණිගත කිරීම ජාත්‍යන්තර ක්‍රිකට් කවුන්සිලය ප්‍රකාශයට පත් කර තිබේ.

ඒ අනුව විස්සයි 20 පන්දු යවන්නන් අතර දෙවන ස්ථානය දක්වා වනිඳු හසරංග ස්ථාන 04කින් ඉදිරියට පැමිණ ඇත.

කෙසේ වෙතත් මහීෂ් තීක්ෂණ සිව්වන ස්ථානය දක්වා එක් ස්ථානයකින් නවතම ශ්‍රේණිගත කිරීම් අනුව පහළට පැමිණ තිබේ.

මේ අතර විස්සයි 20 පිතිකරුවන් ශ්‍රේණිගත කිරීම් හී පැතුම් නිස්සංක තවදුරටත් 08 වැනි ස්ථානයේ සිටී.

කෙසේ වෙතත් කමිඳු මෙන්ඩිස් 15 වැනි ස්ථානය දක්වා පිතිකරුවන් අතර ස්ථාන 03කින් පහළට පැමිණ ඇත.

මේ අතර විස්සයි 20 තුන් ඉරියව් ක්‍රීඩකයන් අතර 05 වැනි ස්ථානය දක්වා එක් ස්ථානයකින් ඉදිරියට පැමිණීමට වනිඳු හසරංග සමත්ව තිබේ.

පසුගියදා නවසීලන්තය සමග පැවති තරග​යේදී දැක් වූ දක්ෂතා හේතුවෙන් වනිඳු මෙලෙස ඉදිරියට පැමිණ ඇත.