පන්දුවාර 20 ක්‍රිකට් තරගාවලිය ප්‍රසාද ලකුණු සටහනේ පෙරමුණ දඹුල්ලට

ශ්‍රී ලංකා ක්‍රිකට් ආයතනය මගින් සංවිධානය කරනු ලැබූ පන්දුවාර 20 ක්‍රිකට් තරගාවලියේ මේ දක්වා පැවැති තරගවලට අනුව ප්‍රසාද ලකුණු සටහනේ පෙරමුණ ගැනීමට දඹුල්ල කණ්ඩායම සමත්වී ඇත. ඒ සහභාගි වූ තරග දෙකම ජයග්‍රහණය කරමින් ප්‍රසාද ලකුණු 4 ක් හිමි කරගනිමිනි.

ඔවුන්ගේ දළ ලකුණු ලබාගැනීමේ වේගය 2.825 ක් ලෙස දැක්වේ. එහි දෙවැනි ස්ථානය සහභාගි වූ තරග දෙකම ජයගත් කොළඹ කණ්ඩායමට හිමිවී ඇති අතර ප්‍රසාද ලකුණු 4 ක් සමගින් ඔවුන්ගේ දළ ලකුණු ලබාගැනීමේ වේගය දැක්වෙන්නේ 2.25ක් ලෙසිනි.

මේ අතර සහභාගිවූ තරග දෙකම පරාජයට පත්වූ මහනුවර කණ්ඩායම දළ ලකුණු ලබාගැනීමේ වේගය -0.45 ක්ලෙස තබාගනිමින් තෙවැනි ස්ථානයට පත්වී ඇති අතර, එහි අවසන රැඳී සිටින ගාල්ල කණ්ඩායම සහභාගිවූ තරග දෙකම පරාජයට පත්වී ලබාගෙන ඇත්තේ -4.625 ක දළ ලකුණු ලබාගැනීමේ වේගයකි.

මෙම කණ්ඩායම් දෙකම ප්‍රසාද ලකුණු ලබාගැනීමට අසමත්වී ඇත. මේ අතර තරගාවලියේ තරග අද (24දා)  නොපැවැත්වෙන අතර හෙට (25දා) ගාල්ල කණ්ඩායම මහනුවර සමගිනුත්, කොළඹ කණ්ඩායම දඹුල්ල සමගිනුත් තරග වැදිමට නියමිතය. මෙම තරග ද්විත්වයම දඹුල්ලේදී පැවැත්වේ. තරගාවලියේ අවසන් මහා තරගය සැප්තැම්බර් 02දා පැවත්වේ.