නෝර්වේහි අතුරුදන් වූ මල්ලවපොර උප සභාපති ගැන විමර්ශනයක්

2021 ජ්‍යෙෂ්ඨ මල්ලවපොර ලෝක ශූරතා තරගාවලියට සහභාගීවීමට පසුගියදා දිවයිනෙන් පිටත්ව ගොස් තරග සංචාරය අතරතුර දී නෝර්වේ රාජ්‍යයේ ඔස්ලෝ නුවරින් අතුරුදහන් වූ මල්ලවපොර සම්මේලනයේ උප සභාපති මෙන්ම කණ්ඩායමේ කළමණාකරු වශයෙන් ද කටයුතු කළ ඩොනල්ඩ් ඉන්ද්‍රවංශ මහතා සම්බන්ධව පුළුල් විමර්ශන ක්‍රියාත්මක කරන බව ක්‍රීඩා සංවර්ධන දෙපාර්තමේන්තුවේ අධ්‍යක්ෂ ජනරාල් අමල් එදිරිසූරිය මහතා පැවසීය.

ඒ පිළිබඳ ක්‍රීඩා අධ්‍යක්ෂ ජනරාල්වරයා මෙසේ අදහස් දැක්වීය.

2019 අංක 24 දරණ ක්‍රීඩාවලට සම්බන්ධ වැරදි වැළැක්වීමේ පනතේ විධිවිධාන අනුව “ක්‍රීඩා වැරදි වැළැක්වීමේ විශේෂ විමර්ශන ඒකකය” වෙත වහාම ක්‍රියාත්මක වන පරිදි පැමිණිල්ලක් ඉදිරිපත් කර තිබෙනවා.

මේ සම්බන්ධව ජාත්‍යන්තර මල්ලවපොර සම්මේලනයටත්, නෝර්වේ මල්ලවපොර සම්මේලනයටත් දැනුම් දී තිබෙන අතර, අපරාධ පරීක්ෂණ දෙපාර්තමේන්තුවට ද  ශ්‍රී ලංකා මල්ලවපොර සම්මේලනය විසින් පැමිණිලි ඉදිරිපත් කර තිබෙනවා.

තරගාවලියට සහභාගීවීම සඳහා ලබාදුන් මුදල් ද අදාළ කළමනාකරවරයා විසින් රැගෙන ගොස් ඇත්දැයි එහිදී විමර්ශනය කිරීමෙන් අනතුරුව මේ පිළිබඳව නීතිමය ක්‍රියාමාර්ග ගැනීමට නියමිතයි.

''ඔක්තෝබර් මස 02 සිට 10 වන දින දක්වා නෝර්වේ ඔස්ලෝ නුවර පැවැත්වුණු ජ්‍යෙෂ්ඨ මල්ලවපොර ලෝක ශූරතා තරගාවලියට සහභාගීවීම සඳහා පමණක් අනුමැතිය ලබාදෙන ලෙස මල්ලවපොර සම්මේලනයෙන් ඉල්ලීමක් ඉදිරිපත් වුණා.

තරගාවලියට ඉදිරිපත්වීමට පමණක් ක්‍රීඩකයන් වෙනුවෙන් ලබාදුන් මෙම අවස්ථාව අනිසි ලෙස භාවිත කර තම පෞද්ගලික අරමුණ ඉටු කරගැනීම වෙනුවෙන් ජාත්‍යන්තරය ඉදිරියේ රටේ හා ක්‍රීඩාවේ අභිමානය හෑල්ලුවට ලක්කර තරග සංචාරය අතරතුර දී මල්ලවපොර සම්මේලනයේ උප සභාපති මෙන්ම කණ්ඩායමේ කළමණාකරු වශයෙන් ද කටයුතු කළ ඩොනල්ඩ් ඉන්ද්‍රවංශ මහතා කණ්ඩායම එරටින් පිටත්වීමට පෙර දින එනම් 07 වනදා ඔස්ලෝ නුවරින් අතුරුදහන් වී තිබුණා.

ඔහු එසේ ඔස්ලෝ නුවරින් අතුරුදහන්ව ඇත්තේ සිය කණ්ඩායමට නැවත ලංකාවට පැමිණීමට හා පී.සී.ආර්. පරීක්ෂණ සඳහා ඔවුන් සතුව තිබූ මුදල් ද රැගෙන බවට කරුණු වාර්තා වුණා.

විදේශගතවීමේදී අදාළ පුද්ගලයන් සමග රුපියල් ලක්ෂ 10ක ඇප බැඳුම්කරයක් වෙනුවෙන් ගිවිසුම්ගත වන බැවින් එම ඇප බැඳුම්කර කොන්දේසි උල්ලංඝනය සම්බන්ධයෙන් නඩු පැවරීම කෙරෙහි ද අප අවධානය යොමු කර තිබෙනවා.

මෙම තරග සංචාරය සම්බන්ධව මල්ලවපොර සම්මේලනයේ අදහස් පමණක් සැලකිල්ලට ගනිමින් මාධ්‍ය හරහා සාවද්‍ය තොරතුරු සමාජගතවීම පිළිබඳ කණගාටු වන අතර මල්ලවපොර සම්මේලනයෙන් ද ඒ පිළිබඳව කරුණු විමසීමක් සිදුකිරීමට නියමිතයි.

මෙවැනි සිදුවීම් අපි තරයේ හෙළා දකින අතර වැරදි පූර්වාදර්ශ අනාගත පරම්පරාවට ලැබීම වැළැක්වීම සඳහා මෙම සිදුවීම සම්බන්ධව විමර්ෂනය කිරීමෙන් අනතුරුව මෙම විනය විරෝධී ක්‍රියා සම්බන්ධව දැඩිව නීතිය ක්‍රියාත්මක කරනු ලබනවා'' යැයි ක්‍රීඩා අධ්‍යක්ෂ ජනරාල්වරයා වැඩිදුරටත් පැවසීය.