දකුණු ආසියානු සෙස්ටබෝල් කාන්තා ශූරතාවත් පිරිමි අනුශූරතාවත් ලංකාවට

පළමු වන දකුණු ආසියානු සෙස්ටබෝල් තරගාවලියට සහභාගී වූ ශ්‍රී ලංකා කාන්තා කණ්ඩායම එහි ශූරතාවයත් , පිරිමි කණ්ඩායම අනුශූරතාවයත් දිනා ගෙන 06/12 දින දහවල් කටුනායක ගුවන් තොටුපොළ වෙත පැමිණියහ. මෙම තරගාවලිය ඉන්දියාවේ කර්ණාටක ප්‍රාන්තයේ චික්කබල්ලපූර් නගරයේ දී ඉකුත් 06/07 දින සිට 06/09 දින දක්වා පවත්වා තිබුණි.

සෙස්ටබෝල් ක්‍රීඩාව පැසිපන්දු (Basketball ) සහ දැල්පන්දු ( Netball ) ක්‍රීඩා වල ලක්ෂණ එකිනෙකට සම්මිශ්‍රණය කර අලුතෙන් හදුන්වා දී ඇති ක්‍රීඩාවක් වන අතර එය යුරෝපය ඇතුළු ලෝකයේ බොහෝ ‍රටවල ජනප්‍රිය ක්‍රීඩාවක් වන අතර ආසියානු කළාපයේ රටවලට මෙම ක්‍රීඩාව අලුතෙන් හදුන්වා දීමට මේ වනවිට පියවර ගනිමින් සිටිති .

ශ්‍රී ලංකාවේ දැල්පන්දු සහ පැසිපන්දු ක්‍රීඩා කරන අනුරාධපුර , පොළොන්නරුව , කෑගල්ල , රත්නපුර , මාතර සහ විශ්ව විද්‍යාල වල ක්‍රීඩක ක්‍රීඩිකාවන් එක් රැස් කර ඔවුන් අතරින් ශ්‍රී ලංකා සෙස්ටබෝල් පිරිමි සහ කාන්තා කණ්ඩායම් සදහා අවශ්‍ය 12 දෙනා බැගින් වූ කණ්ඩායම් තෝරා ගෙන තිබුණි.

මෙම තරගාවලියේ දී ශ්‍රී ලංකා කාන්තා කණ්ඩායම අවසාන මහා තරගයේ දී ඉන්දීය කණ්ඩායම පරදවා රන් පදක්කම සමගින් ශූරතාවයත් , ශ්‍රී ලංකා පිරිමි කණ්ඩායම ඉන්දියාව සමග පැවති  අවසාන මහා තරගාවලියේ දී අනුශූරතාවයත් දිනා ගැනීමට සමත් වී තිබුණි.

මෙහිදී මෙම තරගාවලියේ දක්ෂතම ක්‍රීඩිකාවට හිමි සම්මානය මාතර සුජාතා විද්‍යාලයේ උත්තමා ජයතිස්ස ක්‍රීඩිකාව විසින් දිනා ගැනීමට සමත් වී සිටියාය.

මෙම ජයග්‍රාහී ශ්‍රී ලංකා සෙස්ටබෝල් ක්‍රීඩා කණ්ඩායම් දෙක 06/12 දින පස්වරු 01.00 ට ඉන්දියාවේ චෙන්නායි නුවර සිට ඉන්ඩිගෝ ගුවන් සේවයේ 6 ඊ 1175 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබූ අතර ඔවුන් පිළිගැනීම සදහා ශ්‍රී ලංකා සෙස්ටබෝල් සංගමයේ නිලධාරීන් , එම සිසු සිසුවියන් ඉගෙනුම ලබන පාසැල් වල විදුහල්පතිවරුන් , ගුරු භවතුන් , ඔවුන්ගේ දෙමාපියන් ඇතුළු විශාල පිරිසක් ද ගුවන් තොටුපොළ වෙත පැමිණ සිටියහ.