සූරියවැව සේවකයන්ට වැටුප් දීමට කලිසම් ආපසු ඉල්ලයි?

සූරියවැව මහින්ද රාජපක්ෂ ක්‍රීඩාංගණයේ සිම්බාබ්වේ සමග පැවැති තරග කාලසීමාවේදී ක්‍රීඩාංගණයේ තාවකාලික පදනම මත සේවය කළ කම්කරුවන්ගේ වැටුප් ලබාදීමට පෙර ඔවුන් ඇද සිටි රෙදි ගලවාගැනීම නිසා තමන් දැඩි අපහසුතාවකට පත්වූ බව එහි සේවය කළ කම්කරුවෝ පවසති.

සූරියවැව මහින්ද රාජපක්ෂ ක්‍රීඩාංගණයේ තරග පැවැති කාලසීමාවේදී ක්‍රීඩාංගණයේ සේවය සඳහා තාවකාලික පදනම මත කම්කරුවන් 100ක් පමණ බඳවාගෙන තිබෙන අතර, ඔවුන් සඳහා දෛනිකව රුපියල් 1000 ක දීමනාවක් ලබාදීමට පියවර ගෙන තිබුණි.

කෙසේ හෝ ශ්‍රී ලංකාව සිම්බාබ්වේ සමග පැවැති තරගාවලිය ඊයේ (10දා) දින නිමාවීමෙන් පසු එහි සේවය කළ කම්කරුවන්ගේ තමන්ගේ දෛනික වැටුප් ලබාගැනිමට ගිය අවස්ථාවේ එහි පාලනාධිකාරිය පවසා ඇත්තේ, වැටුප් ලබාගැනීමට පෙර ක්‍රිකට් ලාංඡනය සහිත ඇඳ සිටින කලිසම නැවත ලබාදෙන ලෙසයි. හදිසියේ වූ මෙම තත්වයත් සමගින් එහි සේවය කළ කම්කරුවන් දැඩි අසරණ තත්ත්වයකට හා අපහසුතාවකට පත් වූයේ ඇද සිටි කලිසම ගලවා දීමෙන් පසු ඔවුනට ඇඳගෙන යාමට යට කලිසම හැරුණුකොට වෙනත් කලිසමක්ද රැගෙන නොඒමයි.

මේ සම්බන්ධයෙන් අදහස් දැක්වු කම්කරුවෝ මෙසේ පැවසූහ.

"අපි දෛනිකව රුපියල් 1000ක දීමනාවකට තමයි මෙහි සේවයට ගත්තේ. මං අදට දින 06ක් මෙහි වැඩ කළා. අද වැටුප් ලබාගන්න ගියාම කියනවා ඇඳගෙන ඉන්න කලිසම ගලවා දෙන්න වැටුප් ගන්න නම් කියලා. අඩුම තරමේ මේ අයට අපිට ඒ පිළිබඳව වේලාසනින් දැනුම් දෙන්න තිබුණා. එහෙම වුණානම් අපි වෙන කලිසමක්වත් අරගෙන එනවා. කලිසම දෙන්නේ නැතිනම් වැටුප් නොදෙන නිසා ඇඳ සිටි කලිසම් ගලවා දීලා යට ඇඳුම පිටින් ගිහින් වැටුප් අරගෙන ආවා.දැන් ඉතින් ගෙදර යන්න විදියක් නෑ"

කෙසේ වෙතත් කම්කරුවන් ඇඳ සිටි කලිසම් ගලවා දීමෙන් පසු පිරිසක් යට ඇඳුම් පිටින්ම ගිය අතර තව පිරිසක් තමන් ඇඳ සිටි ටී ෂර්ට් ඇදගෙන නිවෙස් වෙත යනු දැකගත හැකිවිය.

මේ සම්බන්ධයෙන් අප කළ විමසිමකදී සූරියවැව ක්‍රිකට් ක්‍රීඩාංගණයේ කටයුතු කරන නිලධාරියෙකු පැවසුවේ, තමන් වෙත ක්‍රිකට් ආයතනයෙන් දැන්වූ පරිදි කටයුතු කළ බවයි.

සූරියවැව නුවන් ජයසේකර