මාලිංග සමුගැනීම 2023දී නොවේ තීරණය ඉදිරි මාස 3-4දී

ඉදිරි මාස තුන හතර තුළදී තමා පිළිබඳව තක්සේරුවක් කර ගැනීමෙන් පසුව ජාත්‍යන්තර ක්‍රිකට් පිටියෙන් සමුගැනීම ගැන තීරණයක් ගන්නා බව ලසිත් මාලිංග පවසයි.

ඉන්දියාව හා පැවැති සිවුවැනි එක්දින තරගයෙන් පසුව පැවැති මාධ්‍ය හමුවේදී ඔහු ඊයේ (31දා) රාත්‍රියේ මේ බව පැවැසීය.

කෙසේ වෙතත් ඊට පෙරාතුව තරගය ආරම්භවීමට මත්තෙන් 30 දා පැවැති මාධ්‍ය හමුවේදී මාලිංග ප්‍රකාශ කළේ තමන් විශ්‍රාම ගන්නේ 2023 ලෝක කුසලාන තරගාවලියෙන් පසුව බවයි.

“  මේ තරගාවලියෙන් පසුව මම කොහේද ඉන්නේ කියා තක්සේරුවක් කරනවා. ඒ වගේම තව කොපමණ කාලයක් මට මගේ ශරීර ක්‍රීඩා කරන්න දෙයිදැයි මම තක්සේරු කරනවා.

මට කොතරම් පළපුරුද්දක් තිබෙනවාදැයි යන්න වැදගත් නෑ. මට කණ්ඩායම වෙනුවෙන් තරග දිනවන්න හෝ කණ්ඩායම වෙනුවෙන් අවශ්‍ය දේ කරන්න බැරිනම් මම මෙහේ ඉදීම පළක් නෑ.

මම බලනවා මට ඉදිරි මාස තුන හතර තුළ නැවතත් දක්ෂතා අතරට එන්න පුළුවන්ද කියා. නමුත් බැරිනම් මම සතුටින් සමුගන්නවා. ”