බංග්ලාදේශය හමුවේ ශ්‍රී ලංකාවට ලකුණු 163ක පරාජයක්

තුන්කොන් එක්දින ක්‍රිකට් තරගාවලිය යටතේ ශ්‍රී ලංකා කණ්ඩායම ලැබූ අඛණ්ඩ දෙවැනි පරාජයත් ලැබීය. ඒ සත්කාරක බංග්ලාදේශය හමුවේ ලකුණු 163කින් පරාජයට පත්වෙමිනි.ක

ලකුණු 321ක ජයග්‍රාහී ඉලක්කයක් හඹාගිය ශ්‍රී ලංකා කණ්ඩායමට සියලු දෙනා දැවි රැස්කර ගත හැකිවූයේ ලකුණු 157ක් පමණි. බංග්ලාදේශ ක්‍රිකට් ඉතිහාසයේ එක්දින තරගයකදී වැඩිම ලකුණු පරතරයක් සහිතව ලබාගත් ජයග්‍රහණය ලෙසද මෙය ඉතිහාසයට එක්විය.

එසේම චන්දික හතුරුසිංහ මහතා බංග්ලාදේශ කණ්ඩායමේ පුහුණුකරු තනතුරින් ඉවත්ව ශ්‍රි ලංකා පුහුණුකරු තනතුර භාර ගැනිමෙන් පසුව බංග්ලාදේශයට එරෙහිව පැවැති පළමු එක්දින තරගයද මෙය විය.

ශ්‍රී ලංකා ඉනිමේ ඉහළම ලකුණු සංඛ්‍යාව තිසර පෙරේරා වාර්තා කළේය. ඒ ලකුණු 29කි. තමීම් ඉක්බාල්, මුෂ්ෆිකාර් රහීම් හා ශකිබ් අල් හසන් බංග්ලාදේශය වෙනුවෙන් අර්ධ ශතක රැස්කිරීමට සමත්වූය.