නේමාර් වෙනුවට ඔස්මාන් බාසිලෝනාවට

ස්පාඤ්ඤ බාසිලෝනා  පාපන්දු කණ්ඩායම, වාර්තාගත මුදලකට ජර්මානු බොරැස්සියා පාපන්දු කණ්ඩායමේ ඉදිරිපෙළ ක්‍රීඩක ඔස්මාන් ඩෙම්බේලේ මිලදී ගෙන ඇත.

ඒ පස් අවුරුදු කොන්ත්‍රාත්තුවක් සඳහා බ්‍රිතාන්‍ය පවුම් මිලියන 135.5 (රුපියල්  බිලියන 26.9) ක මුදලකටය.

ඔස්මාන්ගේ 2016 වර්ෂයේදී බොරුස්සියා ඩෝර්ට්මුන්ඩ් කණ්ඩායමට එක්වී ඇති අතර කණ්ඩායම වෙනුවෙන් තරග 32 කදී ගෝල 6 ක් වාර්තා කොට ඇත.

බාසිලෝනාව මෙම ක්‍රීඩක ගිවිසුමට  එළඹ ඇත්තේ සිය කණ්ඩායමේ හිටපු සුපිරි ඉදිරිපෙළ ක්‍රීඩක නේමාර් වාර්තාගත මුදලකට (බ්‍රිතාන්‍ය පවුම් මිලියන 197/ රුපියල් බිලියන 38.9) ප්‍රංශයේ පැරිස් සෙන්ට් ජර්මේන් කණ්ඩායමට අලෙවි වීමෙන් සති තුනකට පසුවය.

මේ අනුව ඩෙම්බේල් ලොව වැඩිම මුදලකට අලෙවි වූ ක්‍රීඩකයින් අතර දෙවැනි ස්ථානයට පත් වූ අතර බාසිලෝනා වෙනුවෙන් වැඩිම මුදලකට අලෙවි වූ ක්‍රීඩකයින් අතර දෙවැනි ස්ථානයේ පසුවේ.