මලින්දට පන්දුවෙන් ගැසූ ජඩේජාට පල්ලෙකැලේ ටෙස්ට් තරගය තහනම්

ශ්‍රී ලංකා කණ්ඩායම හා ඉන්දීය කණ්ඩායම අතර පල්ලෙකැලේ පිටියේදි  පැවැත්වීමට නියමිත තෙවැනි ටෙස්ට් තරගයට ක්‍රීඩා කිරීමේ අවස්ථාව ඉන්දීය තුන් ඉරියව් ක්‍රීඩක රවීන්ද්‍ර ජඩේජාට අහිමිවි ඇත. ඒ ඊයේ (06දා) නිමාවූ දෙවැනි ටෙස්ට් තරගයේදී ඔහු මලින්ද පුෂ්පකුමාර වෙත පන්දුව දමා ගැනීමට වැරදිකරු වි ඇති හෙයිනි. ඒ අනුව ඔහුට එක් ටෙස්ට් තරගයක තහනමක් පැනවිමට අයි.සී.සී. ය තිරණය කළේය.

අයි.සී.සී. ව්‍යවස්ථාවේ 2.2.8 වගන්තිය අනුව ක්‍රීඩකයෙක්, සහායක කණ්ඩායමක්, විනිසුරුවරුන් හා තරග තීරක හෝ වෙනත්  ඕනෑම පාර්ශ්වයකට අනතුරුදායක ලෙසින් පන්දුව හෝ ක්‍රීඩාවට සම්බන්ධ වෙනත් උපකරණයක් (උදා- වතුර බෝතලයක් වැනි) යොමු කිරීම දඩුවම් ලැබිය හැකි වරදකි.

ඒ අනුව ජඩේජාගේ තරග ගාස්තුවෙන්  50%ක දඩයක්ද පැනවෙනු ඇති අතර ඔහුට සෘණාත්මක ලකුණු තුනක්ද  එක්වෙනු ඇත.  නවසීලන්ත කණ්ඩායම හා ඉන්දීය කණ්ඩායම අතර පසුගිය ඔක්තෝබර් මාසයේදි අයි.සී.සී. ව්‍යවස්ථාවගේ 2.2.11 වගන්තිය කඩ කිරිම හේතුවෙන්  ඔහුට සෘණාත්මක ලකුණක් හිමිවිය. ඒ අනුව ඔහුගේ සෘණාත්මක ලකුණු සංඛ්‍යාව හයක් වූ අතර එහි ප්‍රථිඵලය ලෙසට එක් ටෙස්ට් තරගයක් හෝ එක්දින තරග දෙකක් හෝ විස්සයි20 තරග දෙකක තහනමක් පැනවෙනු ඇත.

මේ අතර ඊළග අවුරුදු දෙක තුළදී ජඩේජා සෘණාත්මක ලකුණු 8ක් එක්කර ගත හොත් ඔහුට ටෙස්ට් තරග දෙකක් හෝ එක්දින තරග හතරක් හෝ විස්සයි20 තරග හතරක තහනමක් පැනවෙනු ඇත. මේ දක්වා ජාත්‍යන්තර ක්‍රිකට් පිටියේ තවමත් කිසිඳු ක්‍රීඩකයෙකුට එවැනි තහනමක් පැනවි නොමැත.

තරගයේ 57 වැනි පන්දුවාරයේ අවසන් පන්දුව යොමුකරන විට ජඩේජා මෙම ක්‍රියාව සිදු කොට ඇත.  මලින්ද පුෂ්පකුමාර වෙත යැවූ පන්දුව නැවත තමා අතට ගැනීමෙන් අනතුරුව කඩුළු රකින ක්‍රීඩක රිද්දිමාන් සාහා අතට යොමු කරන අවස්ථාවේදී මෙම සිදුවීම ජඩේජා විසිින් සිදු කර ඇත. පිටියේ විනිසුරන් මේ පිළිඳව තරග තීරක රිචී රිචඩ්සන් වෙත පැමිණිලි කර ඇති අතර පසුව ජඩේජා ඔහු ඉදිරියේ සිය වරද පිලිගෙන ඇත.

කෙසේ වෙතත් ජඩේජා මෙම තරගයේ වීරයා සම්මානයද හිමිි කර ගත්තේය.