ක්‍රිකට් ක්‍රීඩක වැටුප සියයට 34කින් ඉහළට

ශ්‍රී ලංකා ක්‍රිකට් ආයතනය පසුගිය වසරේදී ලැබූ මූල්‍ය ප්‍රගතිය මත ජාතික ක්‍රිකට් කණ්ඩායමේ ක්‍රීඩකයන්ගේ වැටුප් 2018 - 2019 වසරේදී සියයට තිස්හතරකින් ඉහළ නැංවීමට තීරණය කර තිබේ.

කොන්ත්‍රාත් ගිවිසුම්වලට එළැඹ ඇති ක්‍රීඩකයන් තිස්තුන්දෙනාට මේ වැටුප් වැඩි කිරීමට අමතරව ටෙස්ට්, එක්දින හා 20- 20 තරග දීමනාද වැඩි කෙරෙනු ඇත.

කොන්ත්‍රාත් ගිවිසුම් සඳහා ක්‍රීඩකයන් ‘ඒ’ ‘බී’ ‘සී’ ‘ඩී’ සහ ප්‍රිමියර් යනුවෙන් කොටස් පහකට බෙදා තිබේ. 

ඇන්ජලෝ මැතිව්ස්, දිනේෂ් චන්දිමාල්, රංගන හේරත්, සුරංග ලක්මාල් හා දිමුත් කරුණාරත්න ‘ඒ’ කාණ්ඩයටත් උපුල් තරංග හා දිල්රුවන් පෙරේරා ‘බී’ කාණ්ඩයටත් අයත් වෙති.

කුසල් මෙන්ඩිස්, නිරෝෂන් දික්වැල්ල, ධනංජය ද සිල්වා, කුසල් ජනිත් පෙරේරා හා තිසර පෙරේරා ‘සී’ කාණ්ඩයට අයත්ය.  ‘ඩී’ කොටසට අයත් වන්නේ අකිල ධනංජය, දුෂ්මන්ත චමීර, අසේල ගුණරත්න, ධනුෂ්ක ගුණතිලක හා නුවන් ප්‍රදීප් ය.

මේ අතර ප්‍රිමියර් අංශයට අයත්වන ක්‍රීඩකයන් වනුයේ සධීර සමරවික්‍රම, රොෂේන් සිල්වා, ළහිරු තිරිමාන්න, ළහිරු ගමගේ, විශ්ව ප්‍රනාන්දු, ලක්‍ෂාන් සඳකැන්, ජෙෆ්රි වැන්ඩසේ, දසුන් ශානක, කෞෂල්‍ය සිල්වා, ෂෙහාන් මධුශංඛ, ළහිරු කුමාර, මලින්ත පුෂ්පකුමාර, අමිල අපොන්සු, වනිදු හසරංග, ඉසුරු උදාන හා ඩිල්ෂාන් මුණවීර ය.