කලිසම් ගැලවීම ගැන තිලංග සමාව ඉල්ලයි

සූරියවැව මහින්ද රාජපක්‍ෂ ක්‍රිකට් ක්‍රීඩාංගණයේ සිම්බාබ්වේ කණ්ඩායම සමග පැවැති තරග කාලසීමාවේදී ක්‍රීඩාංගණයේ තාවකාලික පදනම මත සේවය කළ කම්කරුවන්ගේ වැටුප් ලබාදීමට පෙර, ඔවුන් ඇඳ සිටි කළිසම (බොටම) ගලවා ගැනීම සම්බන්ධයෙන් කරුණු පැහැදිලි කිරීමක් ශ්‍රී ලංකා ක්‍රිකට් ආයතනයේ සභාපති තිලංග සුමතිපාල මහතා ශ්‍රී ලංකා ක්‍රිකට් ආයතනයේ අද (12දා) පැවති මාධ්‍ය සාකච්චාවේදී සිදුකළේය.

මෙහිදී සුමතිපාල මහතා අනාවරණය කර සිටියේ, සිදුවූ දේ ගැන කණගාටුවෙන් මම සමාව ඉල්ලන බවත්, සිදුවූයේ ඉතාම පහත් වැඩක් බවයි. වැටුප් ලබැගැනීමට වඩා මෙහි සේවකයන් පැමිණෙන්නේ, ක්‍රිකට්වලට ආදරේ නිසා, තරග බලන ගමන් සේවාවක් විදියට වැඩි කිරීමට බව පවසා සිටියේය.

තවදුරටත් අදහස් දැක්වූ සුමතිපාල මහතා,

"මම කණගාටුවෙන් සමාව ඉල්ලනවා. ඒක ගැන මම දැනගෙන හිටියේ නැහැ. ඉතාම පහත් වැඩක් ඒක. ඒ අය එන්නෙ ක්‍රිකට්වලට ආදරේට. මැච් එක බලන ගමන් සේවාවක් විදියටයි ඔවුන් වැඩ කරන්නේ. පොඩි වැස්සක් ආවත් ඔවුන් විනාඩි ගානෙන් ක්‍රීඩාංගණය වහනවා. නැවත ඉක්මනටම ඒවා ඉවත් කරනවා. ඒ අය අපේ සගයන්. මේ වහල් යුගයක් නෙමෙයි. ඒ මිනිස්සුන්ට දුන් ඇදුම්ටික ඉල්ලන්න ඔවුන් අපේ වහල්ලු නෙමෙයි. පාලක මණ්ඩලයෙන් සියලු දිස්ත්‍රික් හා පළාත් සංගම්වලට ඇදුම් යවලා තියෙනවා. අපි ඇදුම් නැවත ඉල්ලලා නැහැ" යැයි පවසා සිටියේය.

මේ පිළිබඳව අදහස් දක්වමින් ශ්‍රී ලංකා ක්‍රිකට් ආයතනයේ වැඩබලන ප්‍රධාන විදායක නිළධාරි ජෙරම් ජයරත්න මහතා පවසා සිටියේ, සිදුවූ දේ නිර්ණය කිරීම සඳහා පරීක්‍ෂණයක් පවත්වන බවයි. 

සූරියවැව ක්‍රිකට් ක්‍රීඩාංගණයේ තරග පැවැති කාලසීමාවේදී ක්‍රීඩාංගණයේ සේවය සඳහා තාවකාලික පදනම මත කම්කරුවන් 100ක් පමණ බඳවාගෙන තිබෙන අතර, ඔවුන් සඳහා රුපියල් 1000ක දෛනික දීමනාවක් ලබාදී තිබේ. එම බඳවා ගත් පිරිසගේ ප්‍රමුඛ රාජකාරිය බවට පත් වූයේ ක්‍රීඩාංගණයේ වැසි ආවරණය යෙදීමයි.

කෙසේ නමුත් ශ්‍රී ලංකාව, සිම්බාබ්වේ සමග පැවැති තරගාවලිය පෙරේදා (10දා) දින නිමාවීමෙන් පසු, එහි සේවය කළ කම්කරුවන් තමන්ගේ දෛනික වැටුප් ලබාගැනීමට ගිය අවස්ථාවේ, එහි පාලනාධිකාරිය පවසා ඇත්තේ වැටුප් ලබාගැනීමට පෙර ක්‍රිකට් ලාංඡනය සහිත ඇඳ සිටින කලිසම (බොටම) නැවත ලබාදෙන ලෙසයි.

හදිසියේ වූ මෙම තත්ත්වයත් සමගින් එහි සේවය කළ කම්කරුවන් දැඩි අසරණ තත්ත්වයකට හා අපහසුතාවකට පත්වූයේ ඇඳ සිටි කලිසම ගලවා දීමෙන් පසු, ඔවුනට ඇඳගෙන යෑමට යට කලිසම හැරුණුකොට වෙනත් කලිසමක්ද රැගෙන නොඒමයි.

කෙසේ වෙතත් වැටුප් ලබාගැනීමට අවශ්‍ය නිසා එම සේවකයන් ඇඳ සිටි කලිසම් ගලවාදී අදුරු වැටීමෙන් පසු යට ඇඳුම පිටින් තමන් ඇඳ සිටි ටී ෂර්ට් ඇඳගෙන නිවෙස් වෙත ගියහ.