ඉන්දියාවේදී ටෙස්ට් තරග ජයක් ලැබීම මගේ සිහිනයක්

ශ්‍රී ලංකා කණ්ඩායමක් තවමත් ඉන්දියාවේදී ටෙස්ට් තරගයක් ජයග්‍රහණය කර නොමැති බවත් ඉන්දියාවේදී ටෙස්ට් තරගයක් ජයග්‍රහණය කිරීම තමාගේ සිහිනයක් බවත් ශ්‍රී ලංකා කණ්ඩායමේ ටෙස්ට් නායක දිනේෂ් චන්දිමාල් සඳහන් කරයි.

ඉන්දියාව හා පැවැත්වෙන ටෙස්ට් තරගාවලියට එක්වීම සඳහා කොල්කටාවට පැමිණීමෙන් පසුව පෙරේදා (09දා) චන්දිමාල් මේ බව සඳහන් කළේය.

“අපි ඉන්දියාවේදී ටෙස්ට් තරගයක් ජයග්‍රහණය කර නෑ. ඉන්දියාවේදී තරගයක් ජයග්‍රහණය කිරීම සිහිනයක්. අපි කණ්ඩායමක් ලෙසින් හොඳින් ආරම්භ කළ යුතුයි. ”

“මේක මගේ පළමු ඉන්දීය ටෙස්ට් තරග සංචාරය. මැතිව්ස් හා හේරත් හැරෙන්නට වෙනත් කිසිම ක්‍රීඩකයෙක් ඉන්දියාවේ ටෙස්ට් තරග ක්‍රීඩා කර නෑ. අපි ගොඩක් මහන්සියෙන් වැඩ කළා. අපිට ගොඩක් අලත් මුහුණු තිබෙනවා. ඔවුන්ට ඉන්දියාවට එරෙහිව ක්‍රීඩා කර දක්ෂතා දක්වන්න අවස්ථාව තිබෙනවා.”

“අපි දන්නවා ඉන්දියාව දැන් අංක එකේ කණ්ඩායම. නමුත් අපි පාකිස්තානයට එරෙහිව හොඳන් ක්‍රීඩා කළා.” යැයි චන්දිමාල් සඳහන් කළේය.

ශ්‍රී ලංකා කණ්ඩායම හා ඉන්දීය කණ්ඩායම අතර ඉන්දියාවේදී ටෙස්ට් තරග 17ක් පවත්වා ඇති අතර ඉන් තරග 7ක් ජයපරාජයෙන් තොරව අවසන්ව ඇති අතර ඉතිරි තරග 10 ඉන්දියාව ජයගෙන තිබේ.

ඉන්දීය තරගාවලිය ආරම්භ කරමින් ශ්‍රී ලංකා කණ්ඩායම අද (11දා) ඉන්දීය ක්‍රිකට් සභාපතිගේ කණ්ඩායම සමග පුහුණු තරගයකට ක්‍රීඩා කිරීමට නියමිතය.