පාලකයන් අපි කියන දේ අහන්නේ නෑ - මල්වතු මහ නාහිමි

රටේ පාලකයන්ට කොතරම් හොඳ පැත්ත පෙන්වා දුන්නද ඒවා ගණන් නොගෙන ඔවුන් බලාපොරොත්තු වන ආකාරයට ගමන් කිරීමට ඔවුන්ට අවශ්‍ය වී තිබෙන බව මල්වතු මහා විහාර පාර්ශවයේ මහා නායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල මහ නාහිමියන්පැවසූහ.

උන්වහන්සේ එසේ පවසා සිටියේ තැපැල් දෙපාර්තමේන්තුවට අයත් නුවරඑළිය සහ මහනුවර කෞතුක වටිනාකමකින් යුතු ඉපැරණි ගොඩනැගිලි දෙකක් ඉන්දියානු සමාගමකට විකුණා දැමීමට වත්මන් ජනාධිපතිවරයා පියවර ගැනීමට එරෙහිව මල්වතු මහනායක හිමියන් දැනුවත් කිරීම සඳහා අද (08) පෙරවරුවේ ඒකාබද්ධ තැපැල් වෘත්තිය සමිති පෙරමුණේ නිලධාරීන් මහා නා හිමියන් බැහැදුටු අවස්ථාවේදීය .

එහිදී එම වෘත්තිය සමිති නිලධාරීන් මහානායක හිමියන්ගෙන් ඉල්ලා සිටියේ නුවරඑළියට පැමිණෙන විදේශිකයන්ගේ ආකර්ෂණයට ලක්ව තිබෙන මෙම ඉපැරණි ගොඩනැගිල්ල විනාශ නොකරන ලෙසට මහනායක හිමියන් මැදිහත්ව ජනාධිපතිවරයා දැනුවත් කරන ලෙසයි .

එහිදී මහා නායක හිමියන් වෘත්තී සමිති නිලධාරීන් හමුවේඅදහස් දක්වමින් පවසා සිටියේ නුවරඑළියේ එම කෞතුක ගොඩනැගිල්ල වෙනත් කටයුත්තකට යොදා ගන්නවාට එරෙහිව විදේශිකයන් පවා විරෝධතාවයේ යෙදෙන අයුරුතමන් වහන්සේ දුටු බවයි .

එම ගොඩනැගිල්ල මීට පෙර දී දමේ ආකාරයෙන් අත්පත් ගැනීමට උත්සහ කළා නේදැයි මල්වතු මහ නාහිමියන් වෘත්තීය සමිති නිලධාරීන්ගෙන් ප්‍රශ්න කර සිටි අවස්ථාවේදී ඔවුන් මහා නා හිමියන් හමුවේ පවසා සිටියේ වත්මන් ජනාධිපතිවරයා අගමැති ධූරය දැරූ 2018 වසරේ දීමේ ආකාරයෙන්ම එම ගොඩනැගිල්ලඅත්පත් කර ගැනීමට උත්සාහ කළ බවයි .

එම ගොඩනැගිලි ඉංග්‍රීසි ජාතිකයන් විසින් ඉදිකළ ඒවා බැවින් ඔවුන්ටම ඒවාදුන්නා නම් ප්‍රශ්නයක් නොවන බව පැවසූ මහා නායක හිමියන්එම කටයුත්ත නතර කිරීමට හැකියාවක් තිබේ ද යන්න සම්බන්ධයෙන් ජනාධිපතිවරයා සමග සාකච්ඡා කරන බවත් මහනාහිමිවරුන් ලබා දෙන අවවාද උපදෙස් ඔවුන් පිළි නොපදින බවද එහිදී මහා නායක හිමියන් වෘත්තිය සමිති නිලධාරීන් හමුවේ පැවසූහ.

ඒකාබද්ධ වෘත්තීය සමිති පෙරමුණේ නිලධාරීන් මෙහිදී අවධාරණය කර සිටියේ ඉහළ රාජ්‍ය නිලධාරීන්ට තර්ජනය කරමින් සිදුකිරීමට යන මෙම විනාශය නතර කිරීමට පියවර නොගතහොත් අනෙකුත් රාජ්‍ය ආයතන ද ඒකාබද්ධ කරගනිමින් දැවැන්ත වෘත්තීය සමිති ක්‍රියාමාර්ගයකට එළඹෙන බවයි .