දළදා මාලිගාවේ රන් වියන ප්‍රතිසංස්කරණය අවසන්

සම්පූර්ණයෙන් ප්‍රතිසංස්කරණය කරන ලද මහනුවර ශ්‍රී දළදා මාලිගාවේ රන් වියන විවෘත කිරීම අනිද්දා (26 දා) පෙ.ව. 9.30 ට ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් පැවැත්වීමට කටයුතු යොදා තිබේ.

අස්ගිරි සහ මල්වතු මහනායක ස්වාමීන් වහන්සේලාගේ සහ ශ්‍රී දළදා මාලිගාවෙ දියවඩන නිළමේවරයා විසින් අග්‍රාමාත්‍යතුමන්ගෙන් කළ ඉල්ලීම පරිදි ජනාධිපතිවරයා විසින් රන් වියන අලුත්වැඩියා කිරීම සදහා ප්‍රතිපාදන ලබා දෙන ලදී.

වර්ග අඩි 3450 කින් යුත් මෙම රන්වියන ප්‍රතිසංස්කරණය කිරීම සදහා ජනාධිපති කාර්යාලය මගින් වැය කොට ඇති මුදල රුපියල් මිලියන 45 කි.

2002 වසරෙන් පසු වසර ගණනාවක්ම මෙම රන්වියනේ අලුත්වැඩියාවක් සිදු නොවුනු අතර, රාජ්‍ය ඉංජිනේරු සංස්ථාව මගින් මෙහි ප්‍රතිසංස්කරණ කටයුතු සිදු කොට තිබේ.

මොරටුව විශ්ව විද්‍යාලය මගින් ඊට අදාළ තාක්ෂණික උපදෙස් ලබා දී ඇති අතර, මහනුවර දිස්ත්‍රික් ලේකම් කාර්යාලය මෙහි සියළු සම්බන්ධීකරණයන් සිදු කර ඇත.