බයියාගේ අයවැය සහ සරදියෙල් අයවැය

නව රජය අතුරු අයවැයක් ඉදිරිපත් කළේය. දින 100 පොරොන්දුවට අනුව එහි සඳහන් ආකාරයටම සහන ලබාදෙමින් රජය විසින් ඉදිරිපත් කළ අයවැය රටට බලපාන්නේ කෙසේද යන්න විග්‍රහ කිරීම ආර්ථික විද්‍යාඥයන්ට බාරදෙමින්, මේ අයවැය සාමාන්‍ය මිනිසාට දැනෙන්නේ කෙසේද යන්න පිළිබඳව අවබෝධයක් ලබාගැනීම වටී. 

ඔක්තෝබරයේදී ඉදිරිපත් කළ 'ගමේ බයියා' ගේ අයවැයට වඩා පසුගිය බ්‍රහස්පතින්දා ඉදිරිපත් වූ 'සරදියෙල්' අයවැය සාමාන්‍ය ජනජීවිතයට බලපාන සහන රැසක් ලබාදුන්නේය. බයියාගේ අයවැයෙන්ද දෙන්නට හැකි සෑම සහනයක්ම ජනතාවට ලැබුණු අතර, සරදියෙල් අයවැයෙන් තවත් සහන වැඩි කළේය. මේ අයවැයේ කැපී පෙනෙන දෙයක් ලෙස දැකගත හැක්කේ පසුගිය රජය සමයේ සහන තුළින් බොහෝ ලාභ උපයාගත් ආයතනවලට ඇති තරම් බදු පනවා, එම මුදල් යළි සාමාන්‍ය ජනතාවට ලබාගැනීමට කටයුතු කර ඇති 'උතුවන්කන්දේ සූර සරදියෙල්' ක්‍රමයට ගමන් කර ඇති ආකාරයයි. විශේෂයෙන්ම සී.එස්.එන්. නාලිකාව, මිලියන 2000 ට වඩා වාර්ෂික ශුද්ධ ලාභයක් ලබන ආයතන, කැසිනෝ ආදියෙන් බදු ලබාගැනීම හරහා පසුගිය රජය සමයේ ඉදිරියෙන්ම සිටි ධනවතුන් කීපදෙනෙකුගේ සාක්කු ශුද්ධ කිරීමේ කාර්යයක් කර ඇති බව පෙනේ. 

ඊළඟට එන්නේ අලුතින් හඳුන්වාදී තිබෙන මන්දිර බද්දයි. මෙයද පසුගිය කාලයේ ගොඩනැගුණු මන්දිරවලට ඍජු බලපෑමක් කරන්නට හේතුවක් වෙයි. මෙය එක්තරා ආකාරයකින් දුප්පත් මිනිසාගේ සිතේ ඇති ද්වේශයෙන් ප්‍රයෝජන ගැනීමක්ද විය හැකිය. එය මීළඟ මහා මැතිවරණයේදී කතිරය ගැසීමට පෙර හැඟීමෙන්  ප්‍රයෝජන ගැනීමට හැකි වැඩකි. බයියාගේ අයවැයේ කැපී පෙනුණු දෙය නම් දුප්පත් මිනිසා සහ උපරිම පොහොසතා ආමන්ත්‍රණය කිරීමයි. මැද පන්තිය සම්පූර්ණයෙන්ම අමතක කර දැමුණි. සරදියෙල් අයවැයෙන් දුප්පත් මිනිසාට උපරිමය ලැබුණි. මැද පන්තියේ පිරිසකට සහනයක් සැලසුණි. මේ දෙපැත්තෙන්ම සිදුවූයේ දුප්පතා ජයග්‍රහණය කිරීමයි. විය යුතු වන්නේද එයයි. 

සරදියෙල් අයවැයෙන් දිනකට පසු කොළඹ කොටස් වෙළෙඳ පොළ හුවමාරුව අඩු වූවා සේ විශාල සමාගම් තමන්ගේ ජාල පුළුල් කිරීම අත්හිටුවා තිබේ. මෙහි අදහස නම් තවත් පිරිසකට සමාගම් වෙළෙඳ පොළට පැමිණීමට අවස්ථාවක් ඇති වීමයි. වැටුප් වැඩිවීම, සමෘද්ධි දීමනා දෙගුණ වීම, ගෑස් මිල භූමිතෙල් මිල හා අත්‍යවශ්‍ය ආහාර මිල අඩු වීම වැනි ප්‍රධාන වැදගත් සාධක ඉදිරියට එද්දී, සාමාන්‍ය පන්තියේ එක් සිහිනයක් බිඳවැටුණි. ඒ හයිබ්‍රිඩ් සිහිනයයි. හයිබ්‍රිඩ් වාහන සඳහා අධික බදු පැනවීම සම්බන්ධයෙන් අපට නම් පෙනෙන්නේ පසුගිය මාස දෙක තුනේදී ජපන් යෙන් මුදලේ අඩුවීම හරහා වාහන සේල්කරුවන් මෙරටට ගෙන්වූ අධික හයිබ්‍රිඩ් වාහන තොගය ඉක්මනින් විකිණීමේ අවස්ථාවක් මෙවර අයවැයෙන් ලබාදී ඇති බවයි. ඉන්ධන මිල අඩු කිරීමට සාපේක්ෂව පරිභෝජනය වැඩිවීමට ඇති ඉඩකඩ අහුරන එක් ක්‍රමයක් වන්නේ හයිබ්‍රිඩ් වාහනයි. එහෙත් එම වාහන මත අධික බදු බරක් පැටවීම හරහා බොහෝදෙනෙකුට ඉන්ධන සහනයේ උපරිමය ලබාගත නොහැකි වෙයි. අනෙක් අතින් තමන්ගේ පාවිච්චියට වාහන ගෙන්වා ගන්නා පිරිසට එම අවස්ථාව අහිමි කිරීම මානව හිමිකම් කඩවීමක් ලෙසද දැක්විය හැකිය. වාහන සේල්කරුවන්ගේ වුවමනාවක් මේ සමස්ත කාර්යය තුළ සැඟවී ඇතැයි සාමාන්‍ය ජනතාවට දැනෙන්නේ මේ නිසාය. එය නිවැරදි විය යුතු තත්ත්වයක් වන්නේ ශ්‍රී ලංකාව වැනි භූමිය කුඩා එහෙත් වාහන වැඩි රටක ඉන්ධන පරිභෝජනය සහ කාබන්ඩයොක්සයිඩ් නිදහස් කිරීම අවම විය යුතු තත්ත්වයක් ඇති විය යුතු හෙයිනි. 

සරදියෙල් අයවැයේ සුවිශේෂම කාර්යය ජනාධිපතිවරයාගේ සහ ඔහුගේ කාර්යාලයේ වියදම කෝටි 9000 කින් අඩු කිරීමයි. එක්සත් ජාතික පක්ෂය භාණ්ඩ මිල අඩු කරමින්, වැටුප් වැඩි කරමින් ධනවතුන්ගේ මුදල් ආපසු අදිමින් අයවැය ඉදිරිපත් කරද්දී, ජනාධිපතිවරයා තමන්ගේ වියදමින් කෝටි 9000 ක් ලබාදී ශ්‍රී ලංකා නිදහස් පක්ෂයේ දායකත්වයද ඉහළට ගෙනාවේය. එයින් රාජපක්ෂ ජනාධිපතිවරයාගේ වියදම් සම්බන්ධයෙන්ද දළ අදහසක් රටේ ජනතාවට ලබාදීම සිදුවිය. 
එසේම පසුගියදා ස්වාධීන රූපවාහිනියේ පැවති සාකච්ඡාවේදීද ජනාධිපතිවරයා අපූරු අදහස් කීපයක් ගෙනාවේය. සරල බව තුළින් ඉතිරිවන මුදල් කන්දරාව දුප්පතාට දීම පිළිබඳව ඔහු හොඳ උදාහරණ කීවේය. විශේෂයෙන් හෙලිකොප්ටර් භාවිතය සීමාකිරීම අතිශය වැදගත්ය. වෙනදා සෑම දිනකම රාජපක්ෂවරයෙකු සමග ගුවන්ගත වන හෙලිකොප්ටර් තිබුණද, මේ වනවිට එය සීමා වී ඇති බව අප දන්නා දෙයකි. 

විපක්ෂයේ කණ්ඩායම කියන්නේ මෙය ඡන්දය ඉලක්ක කළ අයවැයක් බවයි. සරදියෙල් අයවැය එසේ වන්නේ නම් බයියාගේ අයවැයද එසේමය. ජනාධිපතිවරණය ප්‍රකාශ කිරීමට ඔන්න මෙන්න තිබියදී ඉදිරිපත් කළ අයවැයද ජනාධිපතිවරණය හිතේ තබාගෙන ඉදිරිපත් කළ අයවැයකි. එයින් වාසියක් ජනතාවට ලැබුණි. මෙවරද ජනතාවට වාසියක් ලැබෙයි. සත්‍ය වශයෙන්ම බයියාගේ අයවැයේත්, සරදියෙල් අයවැයේත් ප්‍රතිඵල නිවැරදිව දැනගන්නට ලැබෙන්නේ සිංහල අලුත් අවුරුද්දෙන් පසුවය. එනම් කාට හෝ බලය දීමෙන් පසුවය.

වෙනදා එක්සත් ජාතික පක්ෂයට එල්ල වන චෝදනාව වන්නේ දුප්පතා නොලසකා, පොහොසතා පොහොසත් කළ බවයි. දැන් එය සන්ධානයට එල්ල වී එ.ජා.ප.ය දුප්පතා වෙනුවෙන් පෙනී සිටින්නට පටන් ගෙන තිබේ. මේ කාර්යයේ කාලපරාසය කොතරම්ද යන්න දැන්ම කියන්නට බැරිය. කෙසේ වුවද සන්ධාන ආණ්ඩුව කළා සේ ගැසට් මගින් භාණ්ඩ අඩු වැඩි කිරීමේ ක්‍රියාවලිය නොකරන්නට හැකි නම් ඒ ඇතිය. 

විපක්ෂ කණ්ඩායම් කියන්නේ ඉන්ධන මිල මීටත් වඩා අඩු කළ හැකි බවයි. එසේ තිබියදී ඔවුන් මීට මාසයකට පෙර එය නොකළේ ඇයිදැයි යන්න කවුරුත් අසන්නේ නැත. එයට උත්තර දෙන්නටද ඔවුන්ට නොහැකිය. බයියාගේ අයවැයේදී මේ සහන නොදුන්නේ ඇයිද යන්න විමල් අයියා කියන්නේද නැත. 
එහෙත් වඩාත් වටිනාම තර්කය වන්නේ සරදියෙල් අයවැයට මුදල් සොයාගන්නා ක්‍රමයක් ගැන සඳහන් නොවන බව විපක්ෂය කරන චෝදනාවයි. පසුගිය ඔක්තෝබරයේදී එ.ජා.ප.ය බයියාගේ අයවැයට එරෙහිව නැගුවේද මෙවැනිම චෝදනාවකි. දැන් සරදියෙල් අයවැයටත් එම චෝදනාවම එල්ල වී තිබේ. මේ අයවැයෙන් කර ඇත්තේ පසුගිය රජය සමයේදී විශාල ලෙස ලාභ උපයාගත් අයගෙන් ඉන් කොටසක් ලබාගැනීම නිසා නොවැම්බරය දක්වා ගමන් කිරීමට එය සෑහේ. එහෙත් සරදියෙල්, සූර පප්පා වෙන්නේ නොවැම්බරයේදී එන අයවැයෙන් නිෂ්පාදන ආර්ථිකය ශක්තිමත් කිරීමට අවශ්‍ය මාර්ග විවර කරන්නේ නම් පමණි. මේ වනවිට පොලිය පමණක් ගෙවමින් යන විදේශීය බැංකු මගින් ලබාගෙන ඇති ඩොලර් මිලියන 500 ට වැඩි ණය මුදල් ගෙවා දමන්නට සූදානම් වෙද්දී, නම් සරදියෙල්, සූර පප්පාම විය යුතුව තිබේ. හේතුව එවිට ඩොලරයේ අගය යම් පමණකට ඉහළ ගොස් බැංකු පොලී අනුපාතද ඉහළට එසැවීමට අවස්ථාවක් ඇති හෙයිනි. එවිට මේ සහනවල යම් ප්‍රමාණයක් වෙනස් විය හැකිය. එය ජනතාව දැනුවත්ව සිටි තත්ත්වයකි. සහන යනු සදාකාලික නොවේ. මහින්ද රාජපක්ෂ ආණ්ඩුව වරද්දා ගත්තේ එතැනය. ඒ ජනතාවට සහන දෙන්නට ණය වීමෙනි. ඒ ගත් ණයවලින්ද වැඩි ප්‍රමාණය ඔවුන්ගේ සුඛ විහරණයට ගිය බව දැන් අනාවරණය වෙයි. අවශ්‍ය වන්නේ කෙටි කාලීන සහනය නොව දීර්ඝ කාලීන සහනයකි. ඒ සඳහා සරදියෙල් අයවැය ආරම්භයක් වන්නේ නම් වැදගත්ය. 
එසේම පාර්ලිමේන්තු මන්ත්‍රීවරයෙකුට හිමිවන වාර්ෂික ප්‍රතිපාදන රුපියල් ලක්ෂ 50 සිට කෝටිය දක්වා වැඩි වෙද්දී පක්ෂ පාට භේද අමතක කර ඒ සඳහා මුදල් සොයා ගත්තේ කෙසේදැයි නොසිතා අත්පුඩි තැලූ පාර්ලිමේන්තු මන්ත්‍රීවරු සියලු දෙනාම ප්‍රතිපාදන ජනතාවගේ සුබ සිද්ධියට පමණක් යොදවනු දැකීමද ජනතා අපේක්ෂාවක් බව අමතක නොකළ යුතුය.