බොරිස් ජොන්සන්ට රුසියාව තහනම් වෙයි

රුසියානු රජය විසින්, බ්‍රිතාන්‍ය අගමැති බොරිස් ජොන්සන් සහ විදේශ අමාත්‍ය ලිස් ට්‍රස් ඇතුළු බ්‍රිතාන්‍ය රජයේ සාමාජිකයන් 13දෙනෙකුට රුසියාව වෙත ඇතුළුවීම තහනම් කරන 'තහනම් ලැයිස්තුවකට' ඔවුන් ඇතුළත් කර තිබේ.

පෙර නොවූ විරූ ලෙස රුසියාව වෙත සතුරු වීම සහ රුසියාව හුදකලා කිරීම ඉලක්ක කරගත් අසීමිත දේශපාලන හා මාධ්‍ය ව්‍යාපාරයකට ප්‍රතිචාරයක් ලෙස මෙම පියවර ගෙන ඇති බව රුසියානු විදේශ අමාත්‍යාංශය සෙනසුරාදා ප්‍රකාශයක් නිකුත් කරමින් කියා සිටියේය.

එමෙන්ම, නවීන අවි ආයුධ යුක්රේනය වෙත දිගින් දිගටම ලබාදීම සහ අනෙකුත් නේටෝ සාමාජිකයන් සමග එවැනි ක්‍රියා සම්බන්ධීකරණය කිරීම සම්බන්ධයෙන්ද රුසියාව බ්‍රිතාන්‍ය වෙත චෝදනා කර ඇත. රුසියාවට එරෙහිව දැවැන්ත සම්බාධක පැනවීමට එක්සත් රාජධානිය එහි බටහිර සගයන් සහ අනෙකුත් ජාතීන් උසිගන්වමින් සිටින බව මොස්කව් පවසා ඇති අතර, එවැනි ක්‍රියා පිළිගත නොහැකි ලෙස හඳුන්වමින් රුසියාවට එරෙහිව හඳුන්වා දී ඇති සීමාවන් නිරර්ථක හා ඵලදායී නොවන ක්‍රියා ලෙස හඳුන්වා තිබේ.

රුසියානු විදේශ අමාත්‍යාංශය විසින් 'රුසෝෆෝබික්' ලෙස හංවඩු ගැසූ බ්‍රිතාන්‍ය රජයේ ප්‍රතිපත්තිය එක්සත් රාජධානියේ අවශ්‍යතාවලට හානියක් වන බව තර්ක කර ඇති අතර, එය සෑම ක්ෂේත්‍රයකම පාහේ ද්විපාර්ශ්වික සබඳතා කපා හැරීමට පමණක් නොව, එය මොස්කව් වෙත පෙරළා පියවර ගැනීමට බල කෙරෙන තත්ත්වයක් බවත් තර්ක කර ඇත.