බෙල්ජියමේ අගමැති ධුරයට ප්‍රථම වරට කාන්තාවක් පත් වේ

බෙල්ජියමේ නව වැඩබලන අගමැතිනිය ලෙස එරට අයවැය අමාත්‍යවරිය වන සොෆී විල්මෙස් 27දා සන්ධ්‍යාවේදී දිවුරුම් දුන්නාය.

මෙය බෙල්ජියම තුළ කාන්තාවක් අගමැති ධුරයට පත්වන පළමු වැනි අවස්ථාව වන අතර, 44 හැවිරිදි සොෆී බෙල්ජියමේ ෆිලිපේ රජු ඉදිරියේදී දිවුරුම් දීම සිදුවිය.

බෙල්ජියමේ අස්ථාවර දේශපාලන පසුබිම හමුවේ මෙතෙක් කලක් වැඩබලන අග්‍රාමාත්‍යවරයා ලෙස කටයුතු කළ චාර්ල්ස් මයිකල් ලබන දෙසැම්බර් 01දා සිට යුරෝපා කවුන්සිලයේ නව සභාපතිවරයා ලෙස වැඩ භාරගැනීමත් සමග හිස්වන අගමැති ධුරයට ඇය මෙසේ තේරී පත්විය.

2018 දෙසැම්බර් මාසයේ පැවැති මහ මැතිවරණයෙන් පසුව ගෙවුණු කාලසීමාව පුරාම බෙල්ජියම තුළ අස්ථාවර දේශපාලනයක් පැවති අතර, පසුගිය මැයි මාසයේ පැවැති මහ මැතිවරණයෙන් පසුවද එරට දේශපාලනය වඩාත් දරුණු තත්ත්වයට පත්විය.

2010 – 2011 කාලසීමාවේදීද එරට තුළ දේශපාලන අර්බුද පැවති අතර දින 541ක කාලයක් වාර්තාගත ලෙස රජයක් නොමැතිව රට පාලනය වීමද, ධුරයෙන් ඉවත්ව යන චාර්ල්ස් මයිකල්ද වැඩබලන අග්‍රාමාත්‍යවරයෙකු ලෙස කටයුතු කිරීමද එරට තුළ පවතින අස්ථාවරත්වයට කදිම නිදසුන්ය.