නේපාල හමුදා විශ්‍රාම වෛද්‍ය කාර්ය මණ්ඩලය යළි කැඳවයි

රට තුළ වර්ධනය වන කොවිඩ්-19 අර්බුදය කළමනාකරණය කිරීම සඳහා රාජකාරියට නැවත වාර්තා කිරීමට සූදානම් වන ලෙස නේපාල හමුදාව සිය විශ්‍රාමික වෛද්‍ය කාර්ය මණ්ඩලයට පවසා තිබේ.

යුද හමුදා මාණ්ඩලික ප්‍රධානී පූර්නා චන්ද්‍ර තාපා විසින් බදාදා පැවති රැස්වීමකදී මෙම තීරණය ගත් බව යුද හමුදා ප්‍රකාශක සන්තෝෂ් බලව් පූඩෙල් පැවසීය.

හුදකලා පහසුකම් සඳහා අවශ්‍ය යටිතල පහසුකම් ගොඩනැගීම සඳහා නේපාලයේ හමුදාව දැනටමත් සූදානම් වන අතර කොවිඩ්-19 ආසාදිතව මියගිය අයගේ දේහයන් කළමනාකරණය කිරීම සම්බන්ධීකරණය කර ඇත.

වසංගතය නේපාලයේ පාලනයෙන් ගිලිහී යන තත්ත්වයක් මේ වනවිට උද්ගත වෙමින් පවතී. දැඩි වෙහෙසක් දරමින් වෛරසය පාලනය කිරීමට අරගල කරන අසල්වැසි ඉන්දියාවට සමාන තත්ත්වයකට රට ගමන් කරමින් සිටින බව රතු කුරුස සංවිධානය බදාදා අනතුරු අඟවා තිබේ.

"ඉතා වැඩි ජීවිත ප්‍රමාණයක් බිලිගනිමින් සිටින මේ නවතම කොරෝනා ආසාදන වර්ධනය දැන්ම පාලනය කරගැනීමට නොහැකි වුවහොත්, මේ වනවිට ඉන්දියාවේ සිදුවෙමින් පවතින්නේ නේපාලයේ අනාගතය පිළිබඳ බිහිසුණු පෙරදසුනක් යැයි කීමේ වරදක් නැහැ." නේපාල රතු කුරුස සභාපති ආචාර්ය නේත්‍රා ප්‍රසාද් ටිම්සිනා පැවසීය.

වසංගතය දැනටමත් එරට පාලන තන්ත්‍රය දක්වා ව්‍යාප්ත වී තිබේ. නේපාලයේ ගන්දකි පළාතේ මහ ඇමති ප්‍රිති සුබ්බා ගුරුන්ග් වෛරසය සඳහා ධනාත්මක බව පරීක්‍ෂා කර නිවසේදී හුදෙකලා වී සිටින බව කියයි.