ට්‍රම්ප්-කිම් දෙවැනි හමුව හැනෝයි නුවර තරු හෝටලයකදී ඇරඹෙයි

ඇමෙරිකානු ජනපති ඩොනල්ඩ් ට්‍රම්ප් සහ උතුරු කොරියානු නායක කිම් ජොන්ග්-උන් අතර වියට්නාමයේ හැනෝයි නුවරදී දෙවැනි ද්වීපාර්ශ්වික සාකච්ඡා පැවැත්වෙයි.

තරු පහේ මෙට්‍රොපෝල් හෝටලයේ පැවති සාකච්ඡාව සඳහා සහභාගී වීමට පෙර නායක දෙපළ මාධ්‍ය ඉදිරියේ අතට අතදෙමින් බොහෝ කුළුපගම කටයුතු කළහ.

මෙම පළමු දින සාකච්ඡාව රාත්‍රී භෝජන සංග්‍රහයක් සමග පැවැත්වෙන අතර, එහිදී කොරියානු අර්ධද්වීපයේ න්‍යෂ්ටිකහරණය සඳහා සැලසුම් සාකච්ඡා මේසයට පැමිණියේය.

පසුගිය වසරේ සංගප්පූරුවේදී සිදුකළ ප්‍රථම සාකච්ඡාවේදී මේ සම්බන්ධයෙන් මූලික එකඟත්වයකට පැමිණි අතර, ඒ සම්බන්ධයෙන් තරමක සාර්ථකත්වයක් ලැබුණි. කෙසේ වෙතත්, මෙය තවදුරටත් ඉදිරියට ගෙනයාම මෙම සාකච්ඡාවේ අරමුණ වී තිබේ.