ඔලිම්පික් ප්‍රේක්ෂකාගාරයට සීමා කළ පිරිසක් පමණයිලු

එලැඹෙන ටෝකියෝ ඔලිම්පික් උළෙලේදී, ස්ථානවල ධාරිතාවෙන් අඩක් නොඉක්මවන්නේ නම්, තරග නැරඹීම සඳහා ප්‍රේක්ෂකයින් 10,000ක සීමාවක් පණවන බව ඔලිම්පික් සංවිධායකයන් පවසයි.

ජාත්‍යන්තර ඔලිම්පික් කමිටු ප්‍රධානී තෝමස් බැච් සහ ටෝකියෝ ආණ්ඩුකාර යූරිකෝ කොයික් ඇතුළු සංවිධාන පහක නියෝජිතයන් මෙම සීමාව සම්බන්ධයෙන් එකඟ වූහ.

කොරෝනා වෛරසය පැතිරීමේ අවදානම අවම කිරීම සඳහා වෙනත් තැනක නතර නොවී, ප්‍රේක්ෂකයන්ට නියමිත ප්‍රේක්ෂකාගාර සහ ඔවුන්ගේ නවාතැන් ගෙන සිටින ස්ථාන අතර පමණක් ගමන් කළ යුතු බවද සංවිධායක කමිටුව යෝජනා කළේය.

ටෝකියෝ සහ වෙනත් ප්‍රාන්තවල ස්ථාන 40ක පමණ ඔලිම්පික් උළෙල පැවැත්වේ. එහි විශාලතම ඒවා අතර 72,000ක පමණ ප්‍රේක්ෂක ධාරිතාවක් යොකොහාමා ජාත්‍යන්තර ක්‍රීඩාංගණය සතුය. ටෝකියෝ ක්‍රීඩාංගණයේ  ධාරිතාව 48,000කි. ජාතික ක්‍රීඩාංගණයේද 68,000ක ධාරිතාවක් ඇත.

ඔලිම්පික් සමාරම්භක උළෙල ජාතික ක්‍රීඩාංගණයේදී 20,000ක සහභාගීත්වයකින් පැවැත්වෙන අතර එයට ප්‍රවේශ පත්‍ර දරණ ප්‍රේක්ෂකයින් සහ ක්‍රීඩා උළෙලට අදාළ නිලධාරීන් ඇතුළත් වේ.