එ.රාජධානියේ සිට එන අයට ජර්මනිය දැඩි නියෝග දමයි

ජර්මනිය, එක්සත් රාජධානිය තුළ පවතින කොවිඩ්-19 ප්‍රභේදය, සැලකිලිමත් විය යුතු ප්‍රභේදයක් ලෙස ප්‍රකාශයට පත් කරමින්, එක්සත් රාජධානියේ සිට රට තුළට ඇතුළු වන සංචාරකයන්ට සති දෙකක අනිවාර්ය නිරෝධායන නීතියක් පැනවීමට එරට මහජන සෞඛ්‍ය අධිකාරිය වන රොබට් කොච් ආයතනය තීරණය කර තිබේ.

එමෙන්ම ජර්මනියේ පදිංචිකරුවන් නොවන බ්‍රිතාන්‍ය ජාතිකයන්ට හදිසි සංචාර හැරෙන්නට රට තුළට ඇතුළුවීම දැනටමත් තහනම් කර ඇත.

එක්සත් රාජධානිය තුළ මහා බ්‍රිතාන්‍යයේ සහ උතුරු අයර්ලන්තයේ ඇතුළු සියලුම බ්‍රිතාන්‍ය ප්‍රදේශවලින් පැමිණෙන සංචාරකයන් නීතියට යටත් වන අතර, මෙම කලාපයක සිට පැමිණෙන්නන්ට නිරෝධායන කාලය කිසිම ආකාරයකින් කෙටි නොකරන බවද දන්වා තිබේ.

ඒ අනුව මෙම අවදානම් ප්‍රදේශයකින් පැමිණෙන සංචාරකයන් සඳහා වූ නිරෝධායන නීතිය 2021 ජුනි 30 දක්වා ක්‍රියාත්මක වන බව රොබට් කොච් ආයතනය වැඩිදුරටත් පවසයි.