ඉන්දීය විශ්වවිද්‍යාලවල හිංසනයට විරෝධය පාමින් සිසු උද්ඝෝෂණ

දිල්ලියේ කීර්තිමත් විශ්ව විද්‍යාලයක වෙස්මුහුණු පැළඳි පිරිසක් විසින් පොලු මුගුරු යොදාගෙන සිසුන්ට හා ආචාර්යවරුන්ට පහර දීමෙන් පසු ඉන්දියාව පුරා විරෝධතා ආරම්භ වී තිබේ.

මෙම ප්‍රහාරයෙන් ජවහර්ලාල් නේරු විශ්ව විද්‍යාලයේ සිසුන් 40 දෙනෙකු සහ කාර්ය මණ්ඩලය තුවාල සහිතව රෝහල් ගත කර තිබේ.

මෙම ප්‍රචණ්ඩකාරී ප්‍රහාරය දැක්වෙන වීඩියෝ වට්ස්ඇප් ආදී සමාජජාල හරහා වේගයෙන් හුවමාරු වී ඇති අතර, මේ සමග කම්පනය හා කෝපය ඇවිලී ඇත.

මුම්බායි, හයිද්‍රාබාද් වැනි සමහර නගරවල සිසුන් ප්‍රහාරයට විරෝධය පළ කරමින් දැනටමත් වීදි බැස ඇති බව ඉන්දීය මාධ්‍ය පවසයි.

පොලීසිය විසින් පරීක්ෂණයක් ආරම්භ කර ඇති අතර ඔවුන් කියා සිටියේ පහර දුන් අය හඳුනාගෙන ඇති බවයි.

ප්‍රහාරයට හේතුව තවමත් පැහැදිලි නැත. එහෙත් ඉන්දියාවේ පාලක භාරතීය ජනතා පක්ෂයට (භාරතීය ජනතා පක්ෂයට) සම්බන්ධ දක්ෂිනාංශික ශිෂ්‍ය සංවිධානයක් වන අඛිල් භාරතීය විද්‍යාර්ථ පරාෂාද් වෙත දොස් පැවරී ඇත.