දියවැඩියාව සහ පවුල

අප මේ සාකච්ඡාව අරඹන්නේ ශ්‍රී ලංකාවේ වැඩිහිටියන් 12 දෙනෙකු අතරින් එක් අයෙකු බැගින් දියවැඩියාව රෝගයට ගොදුරුව සිටියදීය. එමෙන්ම ශ්‍රී ලංකාවේ ළමා හා තරුණ පරපුර දියවැඩියාව නිසා දැඩි අවදානමක හා යෞවනයන් 6 දෙනෙකුගෙන් එක් අයෙක් දියවැඩියා අවදානමේ පසුවෙන අතර අප රටේ වාර්ෂිකව සිදුවන මරණ අතරින් සියයට 7 ක් දියවැඩියාව නිසා සිදුවේ යැයි පැවසේ. දියවැඩියාව මේ වන විට ලොව පුරා මහජන සෞඛ්‍ය ප්‍රශ්න රාශියක් ඇතිකිරීමට හේතු වී ඇති රෝගයක් බවට පත්වී අැත. දියවැඩියාව තම පවුල තුළින් තුරන් කිරීමට ඔබට පවතින බාධාවන් මොනවාද ? විශේෂයෙන් ආහාර පුරුදු දියවැඩියා රෝගය කෙරෙහි එක එල්ලේ බලපෑ හැකි යැයි අප කවුරුත් දන්නා අතර ව්‍යායාම් සම්බන්ධයෙන් පවතින වැරදි මත දියවැඩියා රෝගයට වක්‍රාකාර ලෙසින් බලපානු ලබයි. ඒ දෛනික ව්‍යායාම සහ සාමාන්‍ය රාජකාරිවලින් ඇතිවන තෙහෙට්ටුව සහ ක්‍රියාකාරකම් පිළිබඳව අප සැමදෙනෙකු තුළම පවතින වැරදි අවබෝධය හේතුකොට ගෙනය. මෙවර අද සෞඛ්‍ය පිටුව තුළින් අප කතාබහට ලක්කරනු ලබන්නේ එම කාරණය පිළිබඳ විශේෂඥ වෛද්‍ය මතයයි.

ඔබේ දරුවන් දෙස මදක් විමසිල්ලෙන් බලන්න. ඔබ ළදරු අවදියේදී ඔවුන්ගේ උස හා බර කිරා බලන්නට අමතක නොකළත් පාසල් යන ඔබේ දරුවාගේ උස හා බර සම්බන්ධයෙන් අන්තිමට සැලකිළිමත් වූයේ කවදාද? ඒ සම්බන්ධයෙන් ඔබට එකවර පිළිතුරක් දෙන්නට අපහසු වුවත් ඔබේ දරුවාගේ අමතර පංතියට දරුවා එක්කගෙන ගිය අන්තිම දවස හා වෙලාව ඔබට හොඳින් මතක ඇතිවාට සැක නැත. මේ වන සමහර පාසල් දරුවන් අධි බර තත්ත්වයටත් සමහර දරුවන් අඩු බර තත්ත්වයටත් පත්ව සිටින බව නොරහසක්. ඔබ දරුවාගේ පමණක් උසට සරිලන බර සොයන නමුත් ඔබේ සහ ඔබේ නිවසේ වෙසෙන වැඩිහිටියන්ගේ උසට සරිලන බර පවතින්නේද යන්න සොයාබලා තිබේද?

දැන් දැන් අපේ සමාජයේ අප බහුලව දකින තත්ත්වයකි ස්ථුලතාවය. ඔබේ කුඩා දරුවාට හැකි තරම් කෑම කවා දරුවා මහත්කර ගන්නට වෙහෙසෙන ඔබ ශාරීරික ක්‍රියාකාරකම් වෙනුවෙන් නිවසෙන් එළියට බහින්නට ඉඩක් ලබා දී තිබේද? දුවන්නට පනින්නට වෙහෙසෙන එක නවතා දරුවා කිසියම් ගෘහස්ත ක්‍රීඩාවක යෙදවීම දරුවාගේ ශාරීරික මානසික සෞඛ්‍යට හිතකරද යන්න මොහොතකට හෝ අවදානය දක්වා තිබේද?
 ආහාර යනු මෙතරම් කතාබහට ලක්වන රෝගීබවට තුඩුදෙන හේතු සාධකයක් සේ කතාකරන්නට අද අපට සිදුව ඇත්තේ ඇයි. අතීතයේ දැනට වඩා අපේ ගෙවල්වල කෑම වර්ග බහුල වුවත් ඔවුන් අතරින් යමෙකු ආහාර නිසා ලෙඩ වූ බවක් අප අසා නැත්තේ ඇයි. 

අතීතයේ අපේ ආහාර වේල්වලට එක් වූයේ ගෙවත්තෙන්ම සපයා ගන්නා පලාවර්ග සහ එළවළු  වන අතර වැව් මාළු සහ කරවල ආදිය  එය සමබර ආහාරවේලක් බවට පත්කළ බව ඔබට මතක ඇති මුංඇට කුරහන් වැනි ධාන්‍යවර්ග ආහාරවේලේ අනිවාර්ය අංගයක්ව පැවතුණු අතර මේ ආහාර වේල් අතර කොළ කැඳ වැනි පෝෂණ ප්‍රභේද මෙන්ම ඉදුණු පළතුරු ආදියද පැවති බව ගම්බදව ළමා කාලය ගත කර දැන් නගරයේ ජීවන රටාවට අවතීර්ණ වූ බොහෝ දෙනෙකුට මතක ඇත.හොඳ කායශක්තියක් මෙන්ම ලෙඩ දුකට ඔරොත්තු දෙන හොඳ ප්‍රතිශක්තියක් ඒ ආහාර රටාවත් සමග සෑම පුද්ගලයෙකුටම ලැබුණු බව ඔබට රහසක් නොවන්නේ ලෙඩ දුක් යනු එදවස ගැමි නිවෙස්වල දකින්නට ලැබුණේද කලාතුරකින් බැවිණි.

 එදා අපේ ගෘහණියන් රැකියා අවස්ථාවන් වෙනුවෙන් නිවසින් බැහැර නොවූවත් හේන් ගොවිතැන, වී ගොවිතැන හා සම්බන්ධ රාජකාරි මෙන්ම පිටි කෙටීම ,වී තැම්බීම, වී කෙටීම , මිරිස් ඇඹරීම ,  දර කැඩීම ,ළිඳෙන් වතුර ඇදීම වැනි ශාරීරික වශයෙන් ක්‍රියාකාරී වැඩපළවල  යෙදුනු අතර සිරුරේ මනා හැඩය මෙන්ම නිරෝගීතාව රැකගන්නට ඔවුන් සමත් වූයේ එළෙසය.

එදා කාන්තාවට වඩා අපි වෙහෙස වෙනවා. එදා කාන්තාවට වඩා වැඩ ප්‍රමාණයක් අපි වැඩ කරනවා. මේ නිසා ව්‍යායාම කරන්න අමුතුවෙන් වෙලාවක් නැහැ. වැඩ ඉවර වෙනකොට වෙලාවකුත් නැහැ. ඒ නිසා නගර බද ජීවත් වූ පමණින් අපට ව්‍යායාම අමුතුවෙන් කරන්න අවශ්‍ය නැහැ. මේ අද කාලේ  බොහෝ දෙනෙකු සිතන දෙයක්. නමුත් ව්‍යායාම කියන්නේ ඔබ එදිනෙදා සිදුකරන පොදු ඒකාකාරී ක්‍රියාකාරකම්වලින් ලැබෙන හුදු තෙහෙට්ටුව නෙවෙයි. ඒ සඳහා දිනකට අවම වශයෙන් විනාඩි විස්සක්වත් යොදවනවානම් එය සිදුකළ යුත්තේ ශරීරයේ සෑම අවයවයකටම ඒ ව්‍යායාමය ඔස්සේ හොඳ ක්‍රියාකාරිත්වයක් ඇතිවන පරිදියි. ඇවිදීම, පිහිනීම , බයිසිකල් පැදීම ,හොඳ ව්‍යායාම වුවත් ඔබට මේ ව්‍යායාම සඳහා යොදන කාලය  සහ ඒ ක්‍රියාකාරකම් ඔබගේ එදිනෙදා රාජකාරි අතර වුවත් කළ හැකිවීම විශේෂයක්. පයින් ඇවිදීම සඳහා කාර්යාලයේ සිට නිවසට එන ගමනේ බසයෙන් බසින ස්ථානය මදක් කලින් බැස ඉතිරි දුර ඇවිද ඒමෙන් ලබන්නට පුළුවන්. කිසියම් සංගීතයක් යොදාගෙන පවුලේ සියළු දෙනා එක්වී එම සංගීතය අනුව නර්ථනයක හෝ ව්‍යායාමයක යෙදීම පවුල තුළ එකමුතුකම  ඒකරාශීවීම ආදී සංකල්ප වෙනුවෙන් යෙදවිය හැකි අතර මෙයින් පවුලේ සෑම අයෙකුගේම නිරෝගීබවට ලැබෙන්නේ ප්‍රශස්ත මට්ටමේ සහයක්.

 දැන් අප පවුලේ පෝෂණය පිළිබඳ විමසිලිමත් වෙමු. පවුලේ පෝෂණය යනු පවුලේ සියළු දෙනාගේම කායික මානසික යහපැවැත්ම කෙරෙහි බලපාන්නක් බැවින් ආහාර සකස් කරන්නිය විසින් ඒ සම්බන්ධයෙන් දැඩි අවධානයක් දැක්වීම වැදගත් . ආහාරයෙන් මේදය සහ සීනි , ලුණු ආදිය මෙන්ම අධික පිෂ්ඨයත් ඉවත්ව යන පරිදි  ආහාර තෝරා ගැනීම කළ යුතුබව සිහිතබා ගැනීම  වැදගත්ය.මේ වන විට ගෘහණිය විසින් රාත්‍රි ආහාරවේල කුමන හෝ පිටි සහිත  ආහාරවේලක් වෙත ගාල් කර තැබීම දැකිය හැකිය. මෙහිදී බොහෝ විට නිවසේ සෑදීමෙන් තොරව කඩෙන් ගෙන එන කොත්තු , පරාටා, පිට්ටු , රොටි සහ ඉඳිආප්ප වැනි ආහාරවලින් රාත්‍රි ආහාරය පිරිමැහෙයි. නමුත් මේවායේ පිටි අධිකවීම මෙන්ම තෙල් සහ ලුණු අධිකබවද දකින්නට ඇති අතර රාත්‍රි ආහාරයෙන් පසු ශරීරය විවේකීව තබමින් නින්දට යාම නිසා ඒවා එක එල්ලේම සිරුරට උරාගන්නට සැලැස්වීමෙන් ස්ථූලභාවයට මග පෑදෙයි. ස්ථූල බව යනු රෝග රැසක ආරම්භයක් බව සිහි තබා ගන්න. බොහෝ මවුවරුන් ගැබිනි සමයේදී ඇතිවන දියවැඩියාව සම්බන්ධයෙන් එතරම් තැකීමක් දක්වනු නොලබයි. නමුත් මේ අවධියේ ඇතිවන දියවැඩියා රෝගය නිසා ඒ ගර්භයේ සිටින දරුවන් අංගවිකල හා ආබාධිත තත්ත්වයෙන් ඉපදිය හැකි නිසා ගර්භිණී සමයේ දියවැඩියාව සම්බන්ධයෙන් වඩාත් ප්‍රවේශම්වීම වැදගත්. දියවැඩියාව යනු වඩාත් භයානක රෝගයක් වෙන්නේ නිහඬවම කාලාන්තරයක් මුළුල්ලේ ශරීරය තුළ පැවතෙමින් සිරුරේ ඇති නොයෙකුත් පද්ධතීන්  කෙරෙහි බලපා ඒවා අකර්මණ්‍ය කිරීමට සලස්වන බැවිණි. මේ නිසා දෙපා අහිමිවීම ඇස් නොපෙනී යාම මෙන්ම වකුගඩු අකර්මණ්‍යවීම ආදී තත්ත්වයන්ද මතුවීමට ඉඩ තිබේ. දියවැඩියාව හෘදයාබාධ මෙන්ම අධි රුධිර පීඩනයටද ආඝාතයටද නෑකම් දක්වයි. මේ නිසා මෙම රෝග සියල්ලන්ටම බලපාන දියවැඩියාව නිසි පාලනයකින් යුතුව පවත්වා ගන්නටත් ස්ථූලතාවය ආදී මේ සියළු රෝගයන්ට තුඩු දිය හැකි පොදු සාධක මර්ධනය කරමින් වඩාත් සෞඛ්‍ය සම්පන්න ජීවන රටාවකටත් හුරු වීම අවශ්‍යය.  දියවැඩියාව සහ ඔබේ පවුල සම්බන්ධයෙන් සෑම පවුලේ සාමාජිකයෙකුගේම ආරක්ෂාව තහවුරු කරන්නට ගෘහණියට යම් හැකියාවක් තිබේ. ඒ අප පෙරදී කීවාක් මෙන් ජීවන රටාවේ පවතින අඩුලුහුඩු කම් සහ අපත්‍ය චර්යාවන් පාලනය කිරීමට කටයුතු යෙදීමෙනි. විශේෂයෙන්ම ස්වභාවික ආහාර රටාවකට හුරු වුවහොත් ඔබට දියවැඩියාව සඳහා තුඩු දෙන එක් චර්යාවක් පාලනය කර ගත හැකිය පවුලේ අයෙකු දුම් පානයට හුරු වී ඇත්නම් ඒ  පුරුද්දෙන් මිදෙන්නට අවශ්‍ය  සහය ලබා දෙන්න. එය මුළුමනින්ම සිරුරට හානිකර අතර දියවැඩියා රෝගය සහිත අයෙකු දුම් පානය කරන්නේ නම් රුධිර නාල අවහිරවීමෙන් දෙපාවලට ඇතිවන අහිතකර තත්ත්වයන් දෙගුණයක අවදානමක් දක්වයි. මේ හැරුණු කොට ගෙන මත්පැන්ද තම ජීවිතයෙන් ඈත්කර තැබිය හැකි නම් දියවැඩියාව තුළින් මතුවන අනෙකුත් බෝනොවන රෝග පාලනය සඳහාද  මනා සහයක් ලද හැකිය. 

විශේෂයෙන්ම ජීවන රටාවේ සහ ආහාර රටාවේ පවතින වැරදි පුරුදු, අධික තෙල් ආහාර භාවිතය ,පිරිසැකසුම් කළ අධික ලුණු සහිත ආහාර  මෙන්ම සීනි සහිත ආහාර පාලනය දියවැඩියාව කෙරෙහි තුඩු දෙන හේතූන් පාලනය සඳහා බෙහෙවින්ම උපකාරී වෙයි. ආඝාතය වැනි තත්ත්වයක් සඳහා තුඩු දෙන දියවැඩියාව හේතුවෙන් යම් අයෙකු අංශභාග රෝගයට ගොදුරුවීමේ අවාසනාවන්ත තත්ත්වයට පත්වීමෙන් ඉදිරි ජීවිත කාලය පුරාම ආබාධිත විය හැකිය. එමෙන්ම හෘදයාබාධයක් ඇතිවන්නට හැකි වාතාවරණයක් සැකසුන හොත් ජිවිතය අහිමිවීමේ අවදානමක්ද මතුවිය හැකිය. මේ නිසා ඔබ දියවැඩියා රෝගයෙන් ඔබේ නිවස ආරක්ෂා කරගන්නට සෞඛ්‍ය සම්පන්න ආහාර රටාවකට හුරු වෙන්න. නිසි පරිදි සුදුසු ව්‍යායායමයක නියැලෙන්න එමෙන්ම ඔබගේ දෛණික ජීවිතය තුළ මානසික ආතතිය අවම කරගනිමින් සුවපත් මනසක් පවත්වා ගන්න. ඔබේ රුධිරයේ සීනි පාලනයට මානසික ආතතිය පාලනය කරගැනීමෙන් විශාල උපකාරයක් ලද හැකිය. නිසි විනෝදාංශයක නියැලෙන්න ආගමික වශයෙන් ඔබේ කැමැත්ත පරිදි ඒ ඒ කටයුතුවල නියැලෙන්න. මෙයින් ඔබට ලැබෙන මානසික සුවයද ආහාර පාලනය හා චර්යාත්මක වෙනස්කම් තුළින් ලබන සහය දියවැඩියා රෝගය පාලනයට යොදාගත හැකිය. නමුත් වඩා වැදගත්වනුනේ දියවැඩියා රෝගයට නතු නොවී සිටීමයි. එය ඔබට කළ හැකිය. අදම ඔබේ පවුලේ අය සමග ඔබේ නිවසින් දියවැඩියාව පන්නා දැමීමට එකතුවෙන්න. එය ඔබට ආර්ථික හා සාමාජීය වශයෙන්ද මහත් ලාභයක් වනු ඇති. 

 ලොක දියවැඩියා දිනය නිමිත්තෙන් සෞඛ්‍ය ප්‍රවර්ධන කාර්යාංශයේ පැවති මාධ්‍ය සම්මන්ත්‍රණය ඇසුරෙනි.

නාලිකා රාජපක්ෂ