ඔබ ආඝාතයෙන් ආරක්ෂිතද?

අද වන විට රෝගාතූරවිම යනු ගැටලු රාශියක ආරම්භයය. එහෙයින් අන් කවරදාකටත් වඩා නිරෝගීව සිටීමට යම් වැදගත් කමක් එක්වී තිබේ. එහෙත් මුහුණට මුහුණ සටන්කරන්නාට එරෙහිව අපට සටන් කළ හැකිය. එහෙත් නිහඬවම පැමිනෙන  සතුරා ඉදිරියේ අප පරාජය වෙන්නේ සතුරා අපට පහර දෙන තුරැම අප නොදන්නා බැවිනි. ආඝාතය ද එවන් නිහඬ සතුරෙකිග අප අද , ඒ ගැන කතාකරන්නේ එබැවිනි.

ආඝාතයට වෙදකම් කිරීම  බටහිර වෛද්‍ය විද්‍යාව අසමත්ය යන්න ඇතමෙකු සිතන්නට පුළුවන. එමෙන්ම මේ රෝගය අපට පමණක් වැලඳෙන රෝගයක් සේ සැලකීමෙන් අප  බැහැර විය යුත්තේ ලෝකයේ සිදුවන මරණ අතරින් දෙවැනි තැන ලබා ඇත්තේ ආඝාතය බැවිණි. එමෙන්ම අප රටේද වැඩිහිටියන් ආබාධිතබවට පත්වීමට බලපා ඇති ප්‍රධාන හේතුව බවට පත්ව ඇත්තේ ආඝාතයයි. එමෙන්ම ලංකාවේ අපේ අය අතර වාඩිම මරණ සංඛ්‍යාවක් පිළිබඳ වාර්ථාකරන්නේද ආඝාතයයි. දැනට අප රටේ පවතින දත්තයන් සලකන විට සෑම පුද්ගලයන් හය දෙනෙකුගෙන් එක් අයෙකුටම තමන්ගේ ජීවිත කාලය තුළදී යම් අවස්තාවක මේ රෝගය නිසා පීඩා විඳීමට සිදුවෙයි.  නමුත් ඒ හා සමගම ආඝාතය අයත් වන්නේ වළක්වා ගත හැකි රෝගීන් අතරටය. එසේ නම් තව දුරටත් අප ඒ ඉළක්කය වෙත ලඟා නොවන්නේ ඇයි.

අප රටේ ආඝාත රෝගියා අවලංගු කාසියක් සේ ඉවත දැමීමක් සිදු නොවෙයි. බොහෝ විට ආඝාතයට ලක් වූ රෝගියා රැක බලා ගැනීම සිදුකිරීම සඳහා නිදහස් සෞඛ්‍ය සේවය යටතේ කොතෙකුත් පහසුකම් පැවතියද ඒ පහසුකම් මොනවාද යන්න සමාජගතවීම අඩු නිසා. තවමත් ආඝාත රෝගියා ඇඳකට සීමාකර තබා නිසි ප්‍රතිකාරයක් වෙනුවට එහි වගකීම කර්මය වෙත පවරමින් නිදහස් වෙන්නට මාන බලන තත්ත්වයක් අප අතර පවතී. ඒකක මගිනි. අප රටේ ඇතැම් ප්‍රධාන රෝහල්වල මේ සදහාම විශේෂිත ඒකක පවතී. නමුත් ප්‍රතිකාර ඒකක හෝ වෙන යම් පිළියම්වල වපසරිය කොතෙක්දැයි සොයනවාට වඩා වළක්වාගත හැකි රෝගයක් යැයි ලේබල් වූ මෙම බෝ නොවන රෝගයක් වළක්වා ගැනීම කෙරෙහි අවධානය යොමු කිරීම ධනාත්මකය. බොහෝවිට මේ රෝගයටද තුඩු දෙන්නේ අනෙකුත් බෝ නොවෙන රෝග සම්බන්ධයෙන්ද පවතින  සාධකමය. එසේ නම් ආඝාතයෙන් ගැලවෙන්නට අප කල් තියා සිතට ගෙන ක්‍රියාකිරීමෙන් අප දියවැඩියාව, හෘද රෝග, අධි රුධිර පීඩනය, පිළිකා රෝග ආදි සියල්ලන්ගෙන්ද ආරක්ෂිත බවට පත්වෙයි. එසේ නම් වැඩිම මරණ සංඛ්‍යාවක් සම්බන්ධයෙන් තුඩු දෙන මෙම රෝග සඳහා ආහාර රටාව වෙනස් කිරීම, තෙල් සීනි අධික ආහාරවලින් මිදී ස්වභාවික එළවළු පලතුරු පලාවර්ග වලින් සැදුනු පෙර සකස් කිරීම්වලින් තොරව සරල ආහාර රටාවකට හුරුවීම, දුම්පානය නතර කිරීම, දෛණික ව්‍යායාම්වල යෙදීම, මත් පැන් සීමා කිරීම,  මානසික ආතතිය හැකි තාක් අවම කරගැනීම  වැනි ජීවන රටාවේ සුළු වෙනස්කම් කරන අතර අධි රුධිර පීඩනය අවම කර ගැනීමට ලුණු භාවිතාව අඩුකරමින් මේදය අඩු සීනි අඩු ආහාර ගන්නා අතර අධික කොලෙස්ටරෝල හා රුධිරයේ සීනි අධිරුධිර පීඩනය පාලනය කිරීම සඳහා නිර්දේශ කරන ලද ඖෂධ නොකඩවා ගැනීම වැනි සුළු පරිමානයේ ඇවතුම් පැවතුම් රටාවකට හුරුවීම පමණක් සෑහෙයි.

නමුත් ආඝාතය සම්බන්ධයෙන් අප විශේෂයෙන් කතාකරන්නේ අනෙකුත් රෝග ප්‍රතිකාර කිරීම්වලින් පසුව දීර්ඝ බලපෑම් අවම කරගන්නට හැකි වුවත් ආඝාතයෙන් ශරීරයේ දීර්ඝ කාලයක් ප්‍රතිකාර සාලසිය යුතු ආබාධ ඉතිරිවෙන බැවිණි.  අදවන විට ආඝාතය සඳහා ප්‍රතිකාර සැලසීම විහේෂ කණ්ඩායමක් විසින් සිදුවෙන අතර තනිකරම වෛද්‍යවරයා මත පදනම් නොවෙයි.අතක පයක හෝ කතාකිරීමේ සිරුර චලනය කිරීමේ කිසියම් දුබලතාවයක් පෙන්වන විටම රෝගියා රෝහල්ගත කිරීමෙන් රෝගියා කඩිනමින් යථා තත්ත්වට පත්කිරීමට හැකියාව තිබේ. එමෙන්ම ආඝාත රෝගියාට සමාජ සේවා දෙපාර්ථමේන්තුවෙන්ද සලසන සේවා රැසකි. විශේෂයෙන් අඩු ආදායම්ලාභී  අයෙකුට 2012 වසරට අනුමත පරිදි පහත සඳහන් පහසුකම් සැලසීමට සමාජ සේවා අංශය විසින් ඉදිරිපත් වෙනු ඇත.

මෙවන් ආබාධිතබවකට පත් වූ රෝගියෙකුට රුපියල් 250,000 ක දීමනාවක් ගෙයක් සෑදීමට හෝ තමන් සතුව තිබෙන ගෙය අළුත්වැඩියා කිරිමට ඉල්ලුම් කළ හැකිය. වහළ සඳහා රු 45,000 ක්ද, පොළව සඳහා රුපියල් 15,000 ක්ද, බිත්ති සඳහා රුපියල් 30, 000ක්ද දොර ජනෙල් සදහා රුපියල් 20,000 ක්ද, කුස්සිය සඳහා රුපියල් 20,000 ක්ද  වෙන් වශයෙන් ලබාදෙන අතරම මේ සදහා ඉල්ලුම්පත් ප්‍රාෙද්ශීය ලේකම් කොට්ටාශයෙන් ලබාගත හැකිය. එමෙන්ම ආෂාතයකට ලක් වූ අයෙකුට මසකට රුපියල් 6000 කට අඩු ආදායම් ඇතිනම් හා ඉඩම් කැබැල්ලක් ඇතිනම් මේ සදහා අයදුම් කළ හැකිය. එමෙන්ම නිවසේ සිට පාර දක්වා ප්‍රවේශය වැඩි දියුණු කර ගැනීමට රු. 15000 ක මුදල් ආධාරයක් වෙනුවෙන් හා ආබාධීත බවෙන් පෙලෙන්නෙකුට ගැලපෙන වැසිකිළි බේසමක්  සාදා ගැනීම සදහා රුපියල් 20000 ක් දක්වා ආදාර ද ඉල්ලුම් කළ හැකිය.

මේ හැරෙන්නට හය දහසකට වඩා අඩු ආදායමක් ඇති අයෙකුට ස්වයං රැකියාවක් සඳහා රුපියල් 25000 ක් දක්වා ආධාර මුදලක් ඉල්ලුම් කළ හැකිය. ආබාධිත රෝගියා ස්වයං රැකියාවක් සඳහා ඉල්ලුම් පතක් ප්‍රාදේශීය ලේකම්වරයාට ඉදිරිපත් කිරීමේදී  එම ව්‍යාපෘතියට අවශ්‍ය මුදල් ප්‍රමාණයද ගණන් බලා ඇස්තමේන්තුවක්ද ඒ සමග ඉදිරිපත් කරන්නට අවශ්‍යය. මේ හැරෙන්නට ආබාධිත රෝගියෙකුට ශල්‍යකර්මයක් කිරීමට සිදුවුවහොත්  20,000 ක මුදලක්  ලබාගැනීමට හැකිය. ඒ සම්බන්ධ අවශ්‍ය ලියකියවිලි සහ අවශ්‍යතාවය තහවුරු කරන ලියකියවිලි ඉදිරිපත් කළ යුතුය. ඖෂධ මිලදී ගැනීම, රෝද පුටු , ත්‍රි රෝද බයිසිකල්, කිහිළි කරු, ඇස් කණ්නාඩි, අක්ෂි කාච වැනි දෑ සඳහා ද රු 20000 ක ආධාර මුදල් වෛද්‍ය නිර්දේශයකින් අනතුරුව ඉල්ලුම් කළ හැකිය. එමෙන්ම රැකියා පුහුණු මධ්‍යස්ථාන 19 ක් මගින් පුහුණු පාඨමාලා 32 ක් පවත්වන අතර  ආඝාතයට ලක් වූයේ අවුරුදු 18-32 අතර අයෙක් නම් මෙම පුහුණු පාඨමාලාව සදහා සුදුසකම් සපුරයි. පුහුණුවීමේ කාලය තුළ ආබාධිත වූ අයට නවාතැන් ආහාර පහසුකම්  නොමිලයේ සපයන අතර දිනකට රු 50 ක දීමනාවක් සමග පුහුණුව අවසානයේ ඇයට හෝ ඔහුට රු. 10000 ක් වටිනා පුහුණුවට අදාල උපකරණ හෝ මෙවලම් කට්ටලයක්ද ලබාදෙනු ඇත. කෙසේ නමුත් මේවා සියල්ලටම වඩා ආඝාතයෙන් ප්‍රවේශම් වීම අගනා බව ඔබ පිළිගනු ඇත.

නාලිකා රාජපක්ෂ