බ්ම්බාදේවි හෙවත් යශෝධරා තුළින් සිංහල සිනමාවට එන අලුත්ම ඉන්දීය නළු නිළි යුවළ

මහාචාර්ය සුනිල් ආරියරත්න අධ්‍යක්ෂණය කරනු ලබන අලුත්ම චිත්‍රපටය වන්නේ 'බිම්බා දේවි හෙවත් යශෝධරා' සිංහල චිත්‍රපටයයි. එහි ප්‍රධාන චරිත ද්විත්වය වන යශෝධරාවන්ගේ සහ සිද්ධාර්ථ කුමරුන්ගේ චරිත නිරූපණයට තෝරාගෙන ඇත්තේ ඉන්දීය නළු නිළි යුවළකි. 

නළුවා අර්පිත් චෞද්‍රිය (Arpit Choudhary) වන අතර, නිළිය පල්ලවි සුභාෂ් (Pallavi Subash) වෙයි. අර්පිත් චෞද්‍රිගේ නම අරවින්දන් චෞද්‍රි ලෙස චිත්‍රපටය වෙනුවෙන් වෙනස් කිරීමේ අරමුණක් පවතින බව මෙම යුවළ ලාංකේය මාධ්‍ය තුළින් රටට හඳුන්වාදීමේ හමුව පැවති පසුගිය ජූලි 04 වැනිදා කොළඹ හිල්ටන් හෝටලයේ රූබි ශාලාවේදී මහාචාර්ය සුනිල් ආරියරත්නයන් දැනුම් දුන්නේය. මෙහිදී වැඩිදුරට අදහස් දැක්වූ ඔහු මෙසේද පැවසීය. 

“දහතුන් වැනි ශතවර්ෂයේ මයුරපාද පරිවේණාධිපති බුද්ධ පුත්‍ර හාමුදුරුවෝ රචනා කරපු පූජාවලියේ සටහන් ඇසුරු කරගෙනයි මම මේ බිම්බාදේවි හෙවත් යශෝධරා තිර නාටකය සකස් කළේ. 

පොතපතේ පවා අඩුවෙන් ලියැවී ඇති යශෝධරාවන් පිළිබඳව සිනමා මාධ්‍යයෙනුත් කතාවී ඇත්තේ අල්ප වශයෙන්. මෙවර මම නිර්මාණය කරපු මෙම චිත්‍රපටය ලාංකේය සිනමාවේ සිහිවටනාත්මක කෘතියක් වනු ඇති බවට මගේ ලොකු විශ්වාසයක් පවතිනවා.

යශෝධරාවන් හා සිද්ධාර්ථ චරිත දෙක පමණක් නොව චිත්‍රපටයේ අවශේෂ චරිත සඳහාත් ලංකාවේ ප්‍රසිද්ධ නළු නිළියන් තෝරා ගැනීමෙන් වැළකී සිටීමට මමත්, නිෂ්පාදකවරයා වන එච්.ඩී ප්‍රේමසිරි මහතාත් ඇතුළු නිෂ්පාදක කණ්ඩායම දැඩිව එල්බගෙන සිටියා. ඊට හේතුව වූයේ එම ජනප්‍රිය පුද්ගල චරිත දැකීමෙන් මෙම ගෞරවනීය චරිත පිළිබඳව ප්‍රේක්ෂක මනසේ ඇති විය යුතු විශ්වසනීයත්වය පළුදු වේ යැයි අප කල්පනා කළ නිසයි.

විශේෂයෙන්ම සිද්ධාර්ථ හා යශෝධරා චරිත දෙක පිළිබඳව අප ගැඹුරින් සිතා බැලුවා. එකක් තමයි එම චරිතවලට ප්‍රසිද්ධ නළු නිළියන් ගැනීමෙන් එම පූජනීය චරිතවලට කැළැලක් වීමට ඉඩක් තිබීම. එමෙන්ම ඇතැම් විට මේ චරිත සඳහා තෝරාගන්නා නළු නිළි යුවළ සමහර විට ඊළඟ සතිය වන විට මීට හාත්පසින්ම වෙනස් විදියේ චරිතවල රඟපාමින් අපේ චිත්‍රපටය තිරගත වීමටත් පළමුව චිත්‍රපටයෙන් අප අරමුණු කරගත් ප්‍රතිරූප විනාශ කිරීමට ඉඩ ඇති බව අප උපකල්පනය කිරීම.

එම අරමුණ අනුව බුදුන් උපන් දේශයෙන්ම නළු නිළි යුවළක් තෝරා ගැනීමට පසුව අප තීරණය කළා. එම තෝරා ගැනීමේදී ඔවුන් මීට පෙර කරන ලද චරිත ඔස්සේ අප යම් අධ්‍යයනයක යෙදුණා. 

යශෝධරාවන්ගේ චරිතයට පල්ලවි සුභාෂ් තෝරා ගැනීමට හේතු කිහිපයක් තියෙනවා. එක හේතුවක් තමයි ඉන්දියාවේ නිෂ්පාදනය වන මහාභාරත ටෙලිනාට්‍ය මාලාවේ රුක්මනීගේ චරිතයට ඇය තෝරාගෙන තිබීම සහ එය නිරූපණය කළ විලාසය. අනෙක් කරුණ තමයි මේ වන විටත් දෙරණ නාළිකාවේ විකාශය වන 'අධිරජ ධර්මාශෝක' ටෙලිනාට්‍යයේ 'දේවි ධර්මා' චරිතයත් සාර්ථකව මැවීම. 

මම ඉන්දියාවෙන් නළු නිළියන් හොයන ආරංචියට මා මිතුරු සංගීතවේදී ආචාර්ය රෝහණ වීරසිංහයන් මට දුරකථනයෙන් කතා කරලා ඇහුවා 'බැරිද අර දේවි ධර්මාව යශෝධරා හැටියට චිත්‍රපටයට ගන්න' කියලා. එම අදහසම තව දහදොළොස් දෙනෙක් මට පැවසුවා.

ඇයගේ නිරූපණය කර ඇති චරිත පිළිබඳව විමසීමේදී ඇය කාන්තා වීර චරිත සඳහා වැඩි අවස්ථා රංගනයේදී ලබා දී තිබෙනවා. 
අවසානයේදී දේවි ධර්මා වූ පල්ලවි සුභාෂ් යශෝධරා හැටියට තෝරාගන්න අවස්ථාව ලැබුණා. චෞද්‍රි මට හමුවන්නේ මුම්බායේ ලකී ප්ලාසා සාප්පු සංකීර්ණයේදීයි. අප මුම්බායිවල අසාර්ථක 'ඔඩිෂන්' කිහිපයක් කරල උකටලී වී ඉන්න අවස්ථාවකයි අපට ඔහු හමුවන්නේ. 

මෙම තෝරාගැනීම් දෙකම ඉතාම නිවැරදි තෝරාගැනීම් බව මොවුන් දෙදෙනා සමග කරන ලද දවස් 45 ක දීර්ඝ රූපගත කිරීමේදී අපට හොඳින්ම අවබෝධ වුණා. ඔවුන් දෙදෙනා එම චරිත දෙකට සාධාරණයක් ඉටු කළා පමණක් නොවේ, මහාචාර්ය උපුල් හේවාවිතාරණ සමග එක්වී සිංහල දෙබස් කථනය පිළිබඳව ලොකු අවධානයක් යොමු කරමින් කැපවී කටයුතු කළා.''

1984 ජූලි 09 වැනිදා මහාරාෂ්ට්‍ර ප්‍රාන්තයේ මුම්බායි නුවර උපන් පල්ලවි සුභාෂ් පළමුව වේදිකා නාට්‍ය රංගන ශිල්පිනියකි. 2004 වසරේ ටෙලිවිෂන් රංගනයටත්, 2005 වසරේ චිත්‍රපට රංගනයටත් අවතීර්ණ වූ ඇය ඉන්දීය වෙළෙඳ දැන්වීම් තුළින්ද ජනප්‍රිය වූ යුවතියකි.

කැඩ්බරි චොක්ලට් වෙළෙඳ දැන්වීම තුළින් ඇය 'කැඩ්බරි ගර්ල්' නම් අන්වර්ථ නාමයෙන්ද හඳුන්වන අතර, මරාති භාෂාවෙන් භාරතයේ නිපදවන ලද චිත්‍රපට 12ක රංගනයේ යෙදී ඇත.

ඇය මරාති සිනමාවේ ජනප්‍රිය නළුවෙකු වන අනිකට් විශ්වසරාඕ (Aniket Vishwasarao) සමග වසර 08ක් පැවති ප්‍රේමය ඉන්දීය මාධ්‍යවල දැඩි කතාබහට ලක්වී ඇති අතර, එම ප්‍රේම සම්බන්ධය පැවති සමයේදී ඇය මරාති චිත්‍රපට 23කම රඟපෑම ප්‍රතික්‍ෂේප කර ඇත. 

මීට අමතරව ඇය තෙළිඟු චිත්‍රපටයක හා කණ්ණඩා චිත්‍රපටයක රංගනයෙන් දායක වී ඇත. 

ලංකාවේ තමා ලද අත්දැකීම් පිළිබඳව 'අද' පුවත්පතට කතා කළ ඇය මෙසේ පැවසුවාය.

“අපට ඉන්දියාවේ චිත්‍රපට නිෂ්පාදකවරයෙක් හෝ අධ්‍යක්ෂවරයෙක් ළඟට යන්න හරිම අමාරුයි. මෙහේ ඒ තත්ත්වය වෙනස්. මෙම චිත්‍රපටයේ අධ්‍යක්ෂවරයා වන මහාචාර්ය සුනිල් ආරියරත්න මෙන්ම, නිෂ්පාදකවරයා වන එච්.ඩී. ප්‍රේමසිරි මහතාත් අපට ඉතා සමීපව ඇසුරු කරන්න ලැබුණා. මෙය මගේ ප්‍රථම ප්‍රධාන චරිත රංගනයයි. ඉන්දියාවේ භාෂා ගණනාවකින් චිත්‍රපට හැදෙනවා. මම ඉන්දියාවේ සිනමාවයි ලංකාවේ සිනමාවයි සංසන්දනය කරන්න කැමති නැහැ.

වෙනත් රටක නළුවෙකුට හෝ නිළියකට හෝ කාර්මික ශිල්පියෙකුට ඉන්දීය සිනමාවට ඇතුළත් විය නොහැකියි නේද යනුවෙන් නළු නිළියන් දෙදෙනාගෙන්ම විමසූ විට ඔවුන් එම ප්‍රශ්නයට පිළිතුරු දීම මගහැරියේය. 

චෞද්‍රි තමා ක්‍ෂේත්‍රයට ආධුනිකයෙකු බව පිළිගත් නමුත්, තමා නිරූපණ ශිල්පියෙකු ලෙස හඳුන්වනවාට අකමැති විය. මේ ඔහුගේ ප්‍රථම චිත්‍රපටයයි. සිද්ධාර්ථ චරිතය මැවීමේදී එහි ප්‍රතිවිරුද්ධ චරිතය වන 'දෙව්දත්' චරිතය රඟපෑ ලාංකේය නළු දිනෙත් සිල්වාගෙන් ලැබුණු සහයෝගය ඔහු ස්තුතිපූර්වකව සිහිපත් කළේය. අඩි 06 යි අඟල් 02ක් උස චෞද්‍රිට තවමත් පෙම්වතියක් නොමැති බවද පැවසීය. 

'මහාචාර්ය සුනිල් ආරියරත්න කියන්නේ කවුද කියල ලංකාවට එනකම් මම හරියට දැනගෙන හිටියෙ නැහැ. ලංකාවේ ජනතාව ඔහුට වඳිනවා, ආචාර කරනවා දැක්කම ඔහු ලංකාව පිළිගත් ගෞරවනීය පුද්ගලයෙක් බව වැටහුණා. එවැනි කෙනෙක්ගේ චිත්‍රපටයක රඟපාන්න ලැබීම සතුටක්. 

රඟපෑම තුළින් විවිධ චරිත මැවීමේ උවමනාවක මම ඉන්නේ. මට චරිතයක් දැනුණොත් එයට සාධාරණයක් කරන්න මට පුළුවන් කියල හිතුණොත් එම චරිතය භාරගන්නවා. ඉන්දියාවට මම අලුත් පුද්ගලයෙක්. මම අලුත් කණ්ඩායමක් සමග කළ හින්දි චිත්‍රපටයක් පිළිබඳව අගෝස්තුවේදී ඔබට දැනගන්න පුළුවන් වේවි.

එම නිසා ඉන්දීය සිනමාවයි මෙහේ චිත්‍රපටයේදී ලැබු අත්දැකීම් පිළිබඳවයි සංසන්දනාත්මකව කියන්න අමාරුයි. ලංකාවේදී සියලුදෙනාම මට ඉතා ඉහළින් සහයෝගය දුන්නා. චිත්‍රපටයක් සාර්ථක වෙන්න කණ්ඩායමක සහයෝගය අවශ්‍ය වෙනවා.  ගෙවීම් හරියට කරනවා නම්, චරිතය මට දැනෙනවා නම් ආයෙත් මම ලංකාවේ චිත්‍රපටයක රඟපාන්න කැමතියි.''

මෙම මාධ්‍ය සාකච්ඡාව හේම නලීන් කරුණාරත්න සහ නතාලියා වීරවර්ධන විසින් මෙහෙයවනු ලැබූ අතර, යශෝධරා චිත්‍රපටයේ මාධ්‍ය සම්බන්ධීකරණය ජ්‍යෙෂ්ඨ මාධ්‍යවේදී ඒ.ඩී. රන්ජිත් කුමාර මහතා විසිනි. 

සටහන - පද්මකුමා පී. මෙත්තසේන / ඡායාරූප - ඉසුරු පෙරේරා