චිත්‍රපටයක් සංස්කරණ මැදිරියේදී මැරිල යන්න පුළුවන් - නන්දා නන්දි

චිත්‍රපට සංස්කරණය වූ කලී තවදුරටත් වඩා ලෙහෙසි පහසු කර්තව්‍යයක් නොවන්නේ එය සමස්ත සිනමා නිර්මාණයටම බලපෑමක් සිදුවන බැවිනි. තරුණියක් ලෙස ඕ දැනට ක්ෂේත්‍ර‘යේ සිටින එකම සංස්කරණ ශිල්පිනියයි. 'අනගාරික ධර්මපාලතුමා', 'ස්වර සිංහයා', 'සිනහව අතරින්' ආදී සිනමාපට කිහිපයකම සංස්කරණ ශිල්පිනිය වන ඇය ශබ්ද පරිපාලනයෙන්ද දායක වන්නීය. නමින් නන්දා ජයකොඩි නම් වන ඇය වෘත්තීය පුහුණු විශ්වවිද්‍යාලයෙහි බාහිර කථිකාචාර්යවරියක්ද වේ.

• 'සිනහව අතරින්' චිත්‍රපටය සංස්කරණය කොයි වගේ අත්දැකීමක්ද?

ඇත්තටම ඉගෙන ගත්ත දේවල් එක්ක බද්ධ නොවී තමයි සමහර චිත්‍රපට සංස්කරණය කිරීමට ලැබෙන්නේ. ඒ දේවල් එක්ක ගත්තහම සිනහව අතරින් චිත්‍රපටය සංස්කරණය සඳහා මාව තෝරාගැනීම පිළිබඳ සනත් ගුණතිලක මහත්මයාට මම පූර්ව ස්තුතිය පුද කරනවා. ඔහු මාව විශ්වාස කළා. මම ඉගෙන ගත්ත දේවල් හැටියට සංස්කරණය කියන්නේ චිත්‍රපටයක දෙවන අධ්‍යක්ෂණය. ඒ පිළිබඳව නිහතමානී සතුටක් තියෙනවා.

• චිත්‍රපටය තිරගත වෙන්න පටන් අරගෙන දැන් කිහිප ‍දිනක් ගත වෙලා. සනත්ගේ චිත්‍රපටයෙහි යම් යම් කොටස් නිසා එය වැඩිහිටියන්ට පමණක්දෝ යන කතිකාවත ගොඩනැගුණා.'සිනහව අතරින්' චිත්‍රපටය මේ අභියෝගය ජයගත්තේ කොයි විදිහටද?

මුලින්ම කිව යුත්තේ මම සංස්කරණය කළ චිත්‍රපටවලදී පිටපත බැලීමක් සිදුකරන්නේ නෑ. මම හැම තිස්සෙම ප්‍රේක්ෂකයෙක් ලෙස හිතලයි සංස්කරණයට එළඹෙන්නේ. අපි ජීවත් වන සමාජයේ සතියකට විදේශ චිත්‍රපට තුනක්වත් අඩුම තරමේ නරඹන්න ලැබෙනවා. ඒ නිසාමයි අපි නිතරම සංස්කරණයේදී ප්‍රේක්ෂකයාව ඇදබැඳ තබාගත යුතු වන්නේ. ඇස සහ කණ එහෙම නැත්නම් රූප හා ශබ්ද ඒකාග්‍රතාවකින් යුතුව තාක්ෂණය හා සිනමා රීතිවලින්ද එකතුව හොඳ සංස්කරණයක් සිදු‍ෙවනවා.

• චරිත තුනක් හෝ හතරක් වටා ගොඩනැගුණු චිත්‍රපට අතර 'සිනහව අතරින්' තියෙන්නේ කොයි වගේ තැනකද?

ඓතිහාසික කතා තේමාවලින් යුතු චිත්‍රපට නිර්මාණය වන යුගයක චරිත කිහිපයකින් යුත් චිත්‍රපටයකින් ප්‍රේක්ෂකයාට යම් වෙනසක් දැනෙන්න පුළුවන්. මං දකින්නෙ මෙය මැද මාවතේ චිත්‍රපටයක් ලෙසයි. 60 - 70 දශකවල මැද මාවතේ චිත්‍රපට ඇතිවුණා. ඒත් පසුකාලෙක එය නැතුව ගියා. පසුව ළමා කතා, වැඩිහිටියන්ට සීමා වූ චිත්‍රපට, කොමඩි, ජාතක කතා ආදී චිත්‍රපට හැදුණා. මේ චිත්‍රපට ආකෘතිය නම් මැද මාවතේ එකක්.

• ඔබ මේ වනවිට කොපමණ නිර්මාණ ප්‍රමාණයක් සමග වැඩ කරලා තියෙනවද?

මේ වනවිට චිත්‍රපට විස්සක පමණ ශබ්ද පරිපාලනය සිදුකරල තියෙනවා. ඊට අමතරව චිත්‍රපට පහක පමණ සංස්කරණ කටයුතු කරල තියෙනවා. 

• බොහෝ වෙලාවට මේ ක්ෂේත්‍රයට පැමිණෙන්නේ සංස්කරණ ශිල්පීන්. මෙය අභියෝගයක් නොවේද?

මං මේ සංස්කරණ ක්ෂේත්‍රයට එන්න මුලින් අදහසක් තිබුණෙ නෑ. කැලණිය විශ්වවිද්‍යාලයේ ඉගෙන ගන්න කාලෙ විවිධ ක්ෂේත්‍රවල රැකියා කළත්, ජනමාධ්‍ය විෂය කෙරෙහි තමයි මගේ ඇල්ම තිබුණේ. ඔය අතරේ ඇන්ඩ_ ජයමාන්න මහත්මයාගේ රූපවාහිනී හා ගුවන් විදුලි පාඨමාලාව කරලා, ඒ අතරේ නිෂ්පාදන ආයතනයක වැඩ කළා. නිවේදනයටයි, රඟපෑමටයි වඩා සංස්කරණ ශිල්පයට තමයි වැඩිපුර ඇලුම් කළේ. විවිධ කෙටි චිත්‍රපට වගේ නිර්මාණ සංස්කරණය කළා. බොහෝ වෙලාවට මගේ සංස්කරණය චිත්‍රපට කෙරෙහි යෙදවිය හැකි බව හිතුණා. මේක සොෆ්ට්වෙයාර් එකක් ඉගෙන ගන්න එකම නෙමෙයි. චිත්‍රපටය පසුපස තියෙන බොහෝ දේ ඉගෙන ගනිමින් තමයි මේ තැනට ආවේ.

• අධ්‍යක්ෂණයෙන් ලබාගත් දේ, පසුකාලෙක සංස්කරණ ශිල්පිනියක බවට පත්වන විට කෙතරම් දුරකට වැදගත් වූවාද?

60-70 දශකයේ සිනමාවේ සිටි ශිල්පීන් පොතපත කියවල හොඳ අධ්‍යයනයකින් මේ දේවල් කළා කියල කියන්න පුළුවන්. මොකද එහි අඩුපාඩු හරිම අඩුවෙන් තමයි පෙනෙන්න තියෙන්නේ. සමහර විට එය නැතිම තරම්. 80 - 90- 2000 වගේ කාලවලදී අතීත දේ නොසොයා පැමිණි අය නිසයි සිනමාව තුළ යම් කඩාවැටීමක් සිදුවුණේ කියල හිතෙන්නේ.

• ඔබ දකින සිනමාකරුවා සෞන්දර්යාත්මකද එහෙමත් නැත්නම් සමාජයට යම් පණිවුඩයක් ලබාදෙන්නෙක්ද?

සිනමාකරුවා හඳුන්වන්න කලින් ප්‍රේක්ෂකයා හඳුනාගත යුතුයි. ප්‍රේක්ෂකයාට විවිධ රසවින්දනයක් තිබිය යුතුයි. ඉතින් ඒ දේවල් හඳුනාගෙන නිර්මාණයක් කළොත් එය ඉදිරියට යනවා. එයයි විය යුත්තේ. සිනමාකරුවා පවතින සමාජයට පණිවුඩයක් දිය හැකි අයෙක් විය යුතුයි.

• චිත්‍රපටය බෞද්ධ දර්ශනය මත පදනම් වුණු දෙයක් නිසාම සංස්කරණයේදී ඒ පිළිබඳවත් හිතුවාද?

ශබ්දය හා රූපය එකට බැදිල තියෙනවා. ඇත්තටම ශබ්දය පිළිබඳව හොඳින් දැන සිටීම, සංගීතය මිශ්‍ර වීම ආදිය දැනුවත්භාවයකින් කළ දෙයක්. ඒ තුළින් සමබරව ප්‍රේක්ෂකයාට දැනෙන ආකාරයට සංස්කරණයක් සිදුකළ යුතු වනවා.

• සංස්කරණ ශිල්පියාට හා ශබ්ද පරිපාලනයට පිවිසෙන ඇතැම් නවකයන්ට ඒ සඳහා තාක්ෂණය අවම බව පවසනවා. එය සත්‍යයක්ද?

නෑ. ලංකාවේ ඩිජිටල් සිනමාවේ පසු නිෂ්පාදන අංශය හොඳ බවයි මට තේරෙන්නේ. ඇතැම්විට ලැබෙනවා සංස්කරණය කළ චිත්‍රපටවලට හඬ මුසු කිරීමට. නමුත් එහෙම අවස්ථාවක නිර්මාණවල අඩුපාඩු තිබුණත් ඒවා නැවත සකසන්න අපහසු වන්නේ ඒ වෙනකොට සංස්කරණය අවසන් නිසා. ගොඩක් අය මෘදුකාංගවලින් දැනගත් දේවල් වලින් තමයි මේ ක්ෂේත්‍රයට පිවිසෙන්නේ. ඒ වගේ අවස්ථාවලදී ලක්ෂ ගාණක් වියදම් කරලා කළ නිර්මාණයක් වුණත් සංස්කරණ මැදිරියේදී මැරිල යන්න පුළුවන්.

• සනත් ගුණතිලකයන්ගෙන් චිත්‍රපට සංස්කරණය සඳහා ලැබෙන සහාය?

ඇත්තටම 60-70 පෝෂණය වුණු පුද්ගලයෙක් වශයෙන් ඔහුගෙන් මට විශාල සහයෝගයක් ලැබුණා. ඒ අතරේ මාත් බොහෝ දේ ඉගෙන ගත්තා.

• සංස්කරණ ශිල්පිනියක් ලෙස ආ ගමන් මගේ උදව් වුණු අය ගැන මතක් කළොත්?

ඇන්ඩ_ ජයමාන්න, ලාල් වික්‍රමආරච්චි හා ලාල් දිසානායක යන තිදෙනා තමයි මගේ ගුරුවරුන් වන්නේ. ඒ වගේම ක්ෂේත්‍රය පිළිබඳව පොතපත රචනා කළ අයත් මා ගුරුවරුන් ලෙසයි සලකන්නේ.

සටහන - නදීෂ නිර්මාණ හේරත්