එකතැනක ජීවිතය නතර කරගන්න කැමති නෑ

'ස්නේහා', 'පබසරා', 'සඳසාවි', 'රන්තරු', වැනි ජනප්‍රිය ටෙලි නාට්‍ය ඔස්සේ පුංචි තිරයේ තරුවක් වූ ඇය නිපුණිකා හේවාගමගේ ය.  කෙටි කාලයක් ක්ෂේත්‍රයෙන් ඈත්ව සිටි ඇය මේ වන විට  නැවතත් කලා ක්ෂේත්‍රයට අවතීර්ණ වී සිටින්නීය.  නිවේදනයටද දස්කම් පෑ ඇගේ ඉදිරි කටයුතු පිළිබඳව කතාබහ කිරීමට ඇය අපත් සමග මෙලෙස එක්විය.

Q මේ දවස්වල තොරතුරු මොනවාද?

මේ දවස්වල මම රංගනයෙන් දායක වූ ටෙලිනාට්‍යයක් විකාශය වෙනවා. ඒ ස්වාධීන රූපවාහිනියේ 'දේවිය සුගලා' ටෙලි නාට්‍යය. ඊට අමතරව නිල්වලා ආයතනයෙන් තව ටෙලිනාට්‍යයක් කරනවා. ජයවික්‍රම අධ්‍යක්ෂකවරයාගේ තවත් ටෙලිනාට්‍යයක් සඳහා සම්බන්ධවෙලා ඉන්නවා. 

Q ටික කලක් කලා කටයුතුවලින් ඈත්වෙලා හිටියේ ඇයි?

ඇත්තටම කලා කටයුතුවලින් ඈත්වෙලා හිටියේ,මගේ උපාධිය සම්පූර්ණ කරනවාත් සමගම හොඳ රැකියාවක් සඳහා අවස්ථාවක් ලැබුණ නිසයි. මම හිතුවා ඒ වෙලාවේ හැටියට රැකියාව කියන දේ කරන්න ඕන දෙයක් කියලා. ඒ නිසා මම අවුරුදු දෙකක කාලයක් පෞද්ගලික අංශයක රැ

කියාවක නිරත වූවා. 

Q රැකියාවෙන් ඉවත්වෙලාද නැවත කලාකටයුතු සඳහා දායක වෙන්නේ?

ඔව්. මම දැනට රැකියාවෙන් ඉවත්වෙලා තමා කලා කටයුතු සඳහා දායක වෙන්නේ. 

Q අවුරුදු දෙකක කාලයක් කලාකටයුතු වලින් ඈත්වෙලා නැවත එක් වෙද්දී  ක්ෂේත්‍රයට අලුත් දේවල් එකතුවෙලා කියලා හිතෙන්නේ නැද්ද?

ඇත්තටම කලා කටයුතුවලින් ඈත්වුණාට මම මාධ්‍යවලින් අයින් වුණේ නෑ. වැඩසටහන් වලට දායක වුණා. නිවේදන කටයුතු කරනු ලැබුවා. එවැනි වැඩකටයුතු සඳහා සම්බන්ධ වුණා. ක්ෂේත්‍රයේ පොඩි පොඩි වෙනස්වීම් සිදුවෙලා තිබෙනවා.අලුත් කට්ටිය ඇවිත් තියෙනවා. ඒ දේවලුත් එක්ක  මට ලැබෙන  වැඩ සඳහා උපරිම දායකත්වයක් ලබාදෙන්න උත්සාහ කරනවා.

 Q චිත්‍රපට සඳහා දායකත්වය ලබාදීලා තිබෙනවාද?

දැනටනම් මට චිත්‍රපටි සඳහා ආරාධනා ලැබිලා නැහැ. මට ගැළපෙන චරිතයක් ලැබුණොත් ඒ සඳහා දායක වෙනවා. ඒ දේවල් ඉදිරියේදී බලමු. 

Q  උපාධිය නිසා රැකියාවක් ලැබුණ ඔබ නැවත කලාවට එකතුවුණා, නැවත උපාධියෙන් ප්‍ර‘යෝජනයක් ගන්නේ නැද්ද?

දැනට නම් මම රැකියාවක නිරතවීම පිළිබඳ අදහසක් නැහැ. උපාධිය ගත්තෙත් ගොඩක් මහන්සි වෙලා. මොනදේ කළත් වැඩි කැමැත්තක් තියෙන්නේ කලාව පැත්තට. කොහොමත් මම එකතැනක  ජීවිතය නතර කරගන්න කැමති නැති කෙනෙක්. අපට අවස්ථාව ලැබෙනකොට අපි ඒ දේවල් ලබාගන්නවා. මොකද හොඳ අවස්ථා අපට ජීවිතයේ හැමදාම ලැබෙන්නේ නැහැ. ඒ නිසා එවැනි අවස්ථා ආවොත් මම අනිවාර්යෙන්ම ලබාගන්නවා.

Q කලාවේ මූලික අඩිතාලම ගැන කිව්වොත්?

නාලන් මෙන්ඩිස් මහත්මාගේ 'දූවරු' තමයි මගේ පළමුවැනි ටෙලිනාට්‍යය. හැබැයි මම මේ අංශයට එන්නේ උසස්පෙළ ඉවර කරලා සතියක් වගේ කාලයක් තුළදී. ඒ පෞද්ගලික නාළිකාවක ප්‍රවෘත්ති නිවේදිකාවක් ලෙස කටයුතු කරන්න. ඒ පටන්ගත්ත ගමනේදී මුලින්ම නිවේදිකාවක් වුණා. ඊට පසුව රංගන ශිල්පිනියක් වුණා. ඊට පසුව හඬකැවීම් ශිල්පිනියක් වුණා. ඉතින් මේ ආපු ගමන්මග ගැන හුඟක් සතුටුයි.

Q නැවත නිවේදනයට එකතුවෙන්න අදහසක් නැද්ද?

නිවේදන කටයුතුවලින් මම කොහොමත් ඈත්වෙන්නේ නැහැ.එයට හේතුව මම මුලින්ම පටන්ගත්තේ නිවේදනය වීම. නිවේදන සඳහා නැවත අවස්ථාවක් ලැබුණොත් ඒ දේවලුත් මගහරින්නේ  නැහැ.

Q ඉදිරි කටයුතු පිළිබඳව කිව්වොත්?

දැන් ආයෙමත් මම නිර්මාණ කටයුතු සඳහා සම්බන්ධවෙලා ඉන්නවා. ඉදිරියේදී නැවතත් ටෙලිනාට්‍ය ඔස්සේ මාව දැකබලාගැනීමට පුළුවන් වෙයි.  ඊට අමතරව අලුතෙන් රියැලිටි වැඩසටහනක් සඳහා සම්බන්ධවෙන්න සූදානමක් තියෙනවා. ඒ හිරු නාළිකාවේ මෙගාස්ටාර් වැඩසටහන සඳහායි. දැනට මේ ටික තමයි මගේ ඉදිරි කටයුතු.

Q මතක් කරන්න පිරිසක් ඇතිනේද?

අම්මා, තාත්තා පවුලේ කට්ටිය ඇතුළුව මම මේ වන විට  දායකවෙලා ඇති ටෙලිනාට්‍යවල අධ්‍යක්ෂකවරු, නිෂ්පාදකවරු කාර්යමණ්ඩලය සහ මාත් එක්ක හිටපු හැමකෙනෙක්ටම ස්තුතිවන්ත වෙනවා. මම දැනට ක්ෂේත්‍රයට ඇවිල්ලා අවුරුදු හයක් පමණ වෙනවා. මගේ වැඩකටයුතු සාර්ථකව කරගැනීමට හැකියාව ලැබිලා තියෙන්නේ මට මාත් සමග වැඩ කටයුතු කරන අයගේ සහයෝගය නිසා. ඉතිං ඒ නිසා ඒ හැමෝටම ස්තුතිවන්ත වෙනවා.

ඡායාරූප - චාමර ලක්රුවන් රණසිංහ