ඉන්දිරා ගාන්ධි ඝාතනය ඇලලූ චිත්‍රපටය මතභේදයට තුඩුදෙයි

1984 ඔක්තෝබර් 31 වැනිදා නව දිල්ලියේදී ඝාතනයට ලක්වූ ඉන්දියාවේ හිටපු අගමැතිනියක වන ඉන්දිරා ගාන්ධිගේ මරණය අලලා නිපදවූ චිත්‍රපටයක් එළැඹෙන 22 වැනිදා එළිදැක්වීමට නියමිතව තිබුණත්, ඒ සම්බන්ධයෙන් මේ වනවිට මතභේදකාරී තත්ත්වයක් උද්ගතව ඇති බව වාර්තා වෙයි.

ඉන්දිරා ගාන්ධි නියෝජනය කළ කොංග්‍රසය චිත්‍රපටය සම්බන්ධයෙන් දැඩි නොසතුට පළ කර ඇති අතර, ඔවුන් වත්මන් ඉන්දීය අගමැතිවරයාට ලිපියක් යොමු කරමින් පවසා ඇත්තේ 'කවුම් දේ හීරේ' (Kaum De Heere) පන්ජාබ් චිත්‍රපටයෙන් ගාන්ධි ඝාතකයන්ට වීරත්වයක් කැටිකොට ඇති බවයි.

එමෙන්ම, මෙම චිත්‍රපටය නිකුත්වීමෙන් පසුව රට පුරා ප්‍රචණ්ඩක්‍රියා ඇතිවීමේ අවදානමක් පවතින බව බුද්ධි අංශ දැනටමත් අනතුරු ඇඟවීමක්ද කර තිබේ.

සික්වරුන්ගේ රන් දෙවොල වෙත හමුදා යෙදවීමට ගාන්ධි ක්‍රියාකළ බව පවසමින් සික් ජාතික පෞද්ගලික ආරක්ෂකයන් දෙදෙනෙකු විසින් ඇයව ඝාතනය කරන ලදී.

ඒ අනුව, මේ චිත්‍රපටයද සික් ජාතික පෞද්ගලික ආරක්ෂකයන් දෙදෙනා වටා ගෙතී තිබීමෙන් මේ මතභේදකාරී තත්ත්වය උද්ගතව තිබේ.

කෙසේ වෙතත්, චිත්‍රපටයේ නිෂ්පාදකවරයා පවසා ඇත්තේ මින් පෙරත් දේශපාලන ඝාතන අලලා ලෝකයේ චිත්‍රපට නිපදවී ඇති බැවින්, මෙයද එවැනි චිත්‍රපටයක් පමණක් බවයි.