හයි-ෆ්ලෝ ඔක්සිජන් තෙරපි යන්ත්‍ර වරාය නගරය ලබාදෙයි

ශ්‍රී ලංකාව තුළ කොවිඩ්-19 තුන් වැනි රැල්ලක් පැතිරයාම හේතුවෙන් ආසාදිතයන් වාර්තාවීම දිනෙන් දින ඉහළ යමින් පවතින තත්ත්වයක් හමුවේ, එය මර්දනය කිරීමේ ජාතික ක්‍රියාන්විතයට දායකවීමක් ලෙස 'හයි-ෆ්ලෝ ඔක්සිජන් තෙරපි' යන්ත්‍ර (High flow oxygen therapy machines) තොගයක් සෞඛ්‍ය අමාත්‍යාංශය වෙත පරිත්‍යාග කිරීමට කොළඹ වරාය නගරය කටයුතු කර තිබේ.

මෙම යන්ත්‍ර පසුගිය 08දා සී.එච්.ඊ.සී පෝර්ට් සිටි කොළඹ සමාගමේ කළමනාකාර අධ්‍යක්ෂ ජියැන්ග් හවුලියැන්ග් මහතා විසින් සෞඛ්‍ය අමාත්‍ය පවිත්‍රා වන්නිආරච්චි මහත්මිය වෙත භාරදෙන ලදී. පවතින තත්ත්වය හමුවේ සෞඛ්‍ය සේවාවට මෙවැනි උපකරණ සඳහා ඇති ඉහළ අවශ්‍යතාව සඳහන් කරමින් මෙම පරිත්‍යාගය ඉතා අගය කරන බව සෞඛ්‍ය අමාත්‍යතුමිය ප්‍රකාශ කර ඇත.

රට තුළ කොවිඩ්-19 ව්‍යාප්තිය ආරම්භ වීමේ සිටම එය පාලනය කිරීම සඳහා කොළඹ වරාය නගරය සෞඛ්‍ය බලධාරීන් වෙත අඛණ්ඩව සහයෝගය ලබාදුන් අතර, පසුගිය මාස කිහිපය තුළද මෙවැනි අවශ්‍යතාවන් සඳහා විවිධ පරිත්‍යාගයන් කිහිපයක්ම සිදුකර තිබේ.

සෞඛ්‍ය අමාත්‍යාංශයේ ලේකම් වෛද්‍ය එස්.එච්. මුණසිංහ, සෞඛ්‍ය සේවා අධ්‍යක්ෂ ජෙනරාල් වෛද්‍ය අසේල ගුණවර්ධන, කොළඹ වරාය නගර ව්‍යාපෘති සමාගමේ අලෙවි කළමනාකරු සියු යැන්ග්, එහි මහජන සම්බන්ධතා ප්‍රධානී කස්සප සෙනරත් සහ මූල්‍ය විශ්ලේෂණ කළමනාකාරිනී නබීහා මොහොමඩ් යන මහත්ම මහත්මීහුද මෙම අවස්ථාවට එක්ව තිබුණි.