විදේශ ප්‍රේෂණ ජංගම යෙදුම Lanka Remit දියත් කෙරේ
ශ්‍රී ලංකා මහ බැංකුවේ මූලිකත්වයෙන්, ලංකාක්ලියර් (පුද්.) ආයතනය විසින්, වේගවත්, ආරක්ෂාකාරී සහ අඩු පිරිවැයක් සහිතව ශ්‍රී ලංකාවට මුදල් එවීමේ පහසුකමක් ලබාදීම අරමුණු කරගත් Lanka Remit නමින් විදේශ ප්‍රේෂණ ජාතික ජංගම යෙදුමක් හඳුන්වාදී තිබේ.
ශ්‍රී ලංකාවට ලැබෙන විදේශ ප්‍රේෂණ ප්‍රවාහ වැඩිකිරීම සඳහා මෙන්ම, විධිමත් ක්‍රමවේද හරහා ප්‍රේෂණ රට තුළට ගලාඒම ධෛර්යමත් කිරීමට ශ්‍රී ලංකා මහ බැංකුව විසින් විවිධ පියවරයන් ගනිමින් සිටින වකවානුවක මෙම හඳුන්වාදීම සිදුවිය.
විදේශ ප්‍රේෂණ ජාතික ජංගම යෙදුම Lanka Remit දියත් කිරීම තරුණු හා ක්‍රීඩා අමාත්‍ය, සංවර්ධන සම්බන්ධීකරණ හා අධීක්ෂණ අමාත්‍ය සහ ඩිජිටල් හා ව්‍යවසාය සංවර්ධන රාජ්‍ය අමාත්‍ය නාමල් රාජපක්ෂ මහතා විසින් සිදුකරන ලදී.
මේ සඳහා ප්‍රේෂණ පහසුකම් සලසන්නන් ලෙස ලංකා බැංකුව, මහජන බැංකුව, සම්පත් බැංකුව, හැටන් නැෂනල් බැංකුව, ජාතික ඉතිරි කිරීමේ බැංකුව, කොමර්ෂල් බැංකුව, නේෂන්ස් ට්‍රස්ට් බැංකුව, ජාතික සංවර්ධන බැංකුව, කාගිල්ස් බැංකුව, මොබිටෙල් (පුද්.) ආයතනය සහ ඩයලොග් ආසියාටා යන ආයතන දැනටමත් ඉදිරිපත්ව ඇති අතර, යථා කාලයේදී අනෙකුත් ප්‍රේෂණ පහසුකම් සලසන ආයතනද මේ සමග සම්බන්ධ වීමට නියමිත බව මහ බැංකුව පවසයි.
Lanka Remit මගින් සෘජු බිල්පත් ගෙවීමේ පහසුකම, විදේශයන් හිදී නිකුත් කරන විද්‍යුත් ගෙවීම් කාඩ්පත් හරහා ශ්‍රී ලංකාවට මුදල් එවීම වැනි වටිනාකම් එකතු කළ සේවාවන් රැසක්ද ලබාදීමට බලාපොරොත්තු වෙයි.
popular news
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
