කොවිඩ් වසංගතයෙන් පසුව ආර්ථිකය නැංවීමේ උපායන්

සමස්ත ලෝකයම භීතියට පත්කරමින් පැතිර යන කොවිඩ්-19 වසංගතය හමුවේ රටක් ලෙස අප මේ දක්වා ඊට සාර්ථකව මුහුණදෙමින් සිටියද, පවතින තත්ත්වය යටතේ රටේ ආර්ථිකයට ඉන් සිදුවන බලපෑම සුළුපටු නොවෙයි. කෙසේ වෙතත් මෙවැනි අභීයෝගාත්මක පරිසරයක මෙම කොවිඩ්-19 වසංගතය අවසන් වීමෙන් පසුව රටක් ලෙස ශ්‍රී ලංකාවේ ආර්ථිකය පුනර්ජීවනය කිරීමේ උපාය මාර්ගික සැලසුම් හිටපු මහ බැංකු අධිපති අජිත් නිවාඩ් කබ්රාල් මහතා විසින් මෙසේ ඉදිරිපත් කර සිටියි.

උපාය මාර්ග සැලසුම් 01:

සේවක අර්ථසාධක අරමුදලේ සාමාජික ශේෂයෙන් (Members’ Balances) දළ වශයෙන් 20%ක් වන රු.බිලියන 500ක් පමණ එම සාමාජිකයින්ට කොන්දේසි රහිතව නිදහස් කිරීම.

අප සැම දන්නා පරිදි, 2015 සිට 2019 දක්වා වසර 5ක් පුරා ආර්ථිකය අඛණ්ඩව පිරිහීම හේතුවෙන් ශ්‍රී ලංකා ආර්ථිකය විශාල වශයෙන් අර්බුධයට ලක්ව තිබුණි. ඒ සමගම, 2019 වසරේදීසිදු වූ පාස්කු ඉරිදා බෝම්බ ප්‍රහාරය නිසා ආර්ථිකය තවදුරටත් අර්බුධයට ලක්වුණි. එම පිරිහීම නතර කොට, ආර්ථිකය නැවත යහපත් අතට හැරවීම සඳහා, දැවැන්ත බදු කප්පාදුවක් සහ ණය සහන රැසක් ලබාදෙමින් නව රජය 2020 ජනවාරී මාසයේදීආර්ථිකයට නව උත්තේජනයක් ලබාදෙන්නට උත්සාහයක් දැරීය.

පසුබිම මෙසේ තිබියදී, අද පැනනැගී ඇති කොවිඩ්-19 වසන්ගතයට මුහුණ දීමට, ඇතැම් දියුණු ආර්ථිකයන් විසින් අනුගමනය කරනු ලබන ආකාරයේ පරිභෝජනය සහ අනෙකුත් ආර්ථික ක්‍රියාකාරකම් ඉහළ නැංවීම සඳහා මහජනයාට ලබාදෙන විශාල බදු ආපසු ගෙවීම් හෝ පූර්ණ ප්‍රදානයන් වැනි නව උත්තේජන සැපයීමට ශ්‍රී ලංකාවට මූල්‍ය අවකාශයක් නොමැත. එසේ වුවද, ශ්‍රී ලංකා රජයට එවන් සෘජු මූල්‍යමය දායකත්වයන් සැපයීමට වර්තමානයේදී නොහැකි වුවද, ඊට විකල්පයක් ලෙස සේවක අර්ථ සාධක අරමුදලේ (EPF) සාමාජිකයන්ගේ රු.බිලියන 2,500ක් පමණ වන වර්තමාන අරමුදල් ශේෂයෙන් 20%ක් පමණ එම සාමාජිකයන්ට කොන්දේසි විරහිතව සෘජුව ආපසු ලබා දීමෙන් රු.බිලියන 500ක් පමණ නව උත්තේජනයක් ආර්ථිකයට එක්කළ හැකිය.

මෙම යෝජිත ප්‍රාග්ධන ප්‍රදානය, රජයෙන් ලබාදෙන මූල්‍යමය දිරි ගැන්වීමකට ශක්‍ය විකල්පයක් විය හැකි අතර, කිසිදු මූල්‍ය බරක් රජය මත පැටවීමකින් තොරව, ආර්ථික උත්තේජකයක් ලෙස ප්‍රතිඵල ලබාදිය හැකි එකකි.

මීට අමතරව, විසිපන් ලක්ෂක පමණ පුද්ගල සමූහයක් අතට මෙම රු.බිලියන 500ක පමණ “නව” ප්‍රාග්ධනය එකතු වූ විට, එම ප්‍රාග්ධනය පදනම් කර ගනිමින්, ණයදෙන ආයතනවලින් ලබාගන්නට හැකිවන තවත් ණය අරමුදල් ඔස්සේ එම මුදල තවදුරටත් පුළුල් වී සමහර විට දෙගුණයක්ද විය හැකිය.

මෙම අතිවිශාල අරමුදල "නිදහස්" කිරීමෙන් සහ එම මුදල් විසිපන් ලක්ෂයක දෙනා අතට පත් කිරීම මගින් තවත් බොහෝ ප්‍රතිලාභ ජනතාවට සහ ආර්ථිකයට ලැබෙනු ඇත. එවැනි ප්‍රතිලාභ කිහිපයක් පහත දැක්වේ,

1.) මෙම නව මුදල හරහා ඇතිවෙන ආයෝජනය සහ පාරිභෝජනය හරහා ආර්ථික වර්ධනයට සැලකිය යුතු සහයක් ලැබීම.

2.) තමන්ගේ ඉහළ පොලී ණය පියවා ගැනීමට බොහෝ පුද්ගලයන්ට හැකියාවක් ලැබීම.

3.) ව්‍යවසායක අදහස් හා හැකියාවන් ඇති පුද්ගලයන් මෙම ප්‍රාග්ධනය පාවිච්චි කරමින්, නව ව්‍යාපාර ආරම්භ කිරීම හරහා රට තුළ නව ව්‍යාපාර ස්ථාපනය වීම.

4.) මෙම නව ප්‍රාග්ධනය නව ආර්ථික ක්‍රියාකාරකම්වල යොදවා ගනිමින් ආර්ථික කටයුතුවල පුද්ගලයන් යෙදෙන විට, එම ආර්ථික ක්‍රියාකාරකම්වලට ණය ලබාදීමට බැංකු සහ මූල්‍ය ආයතනවලට නව අවස්ථා විවෘත වීම.

5.) අලුතින් නිදහස් කරන ලද මෙම “ඉතිරිකිරීම්”, පුළුල් ආර්ථිකයේ ආයෝජනය වීමේ ප්‍රතිඵලයක් ලෙස “ව්‍යාපාර විශ්වාසය” (Business Confidence) වර්ධනය වී රට තුළ සුබවාදී හැඟීම් යළි පණ ගැන්වීම.

6.) රටේ සෑම ප්‍රදේශයකම පාහේ දැනට අත්හිට වී ඇති සුළු සහ මධ්‍යම පරිමාණයේ ඉදිකිරීම් කටයුතු ඉහළ නැංවීමට දායකත්වයක් ලැබීම. 

7.) රටේ සුළු හා මධ්‍ය පරිමාණ ව්‍යාපාර ක්ෂේත්‍රය වර්ධනය වීම තුළින් රැකියා අවස්ථා වැඩි වීම.

8.) රට පුරා ආර්ථික ක්‍රියාකාරකම් මට්ටම ඉහළ යාම හේතුවෙන් රජයට බදු එකතු කිරීමට අවස්ථාවන් වැඩි වීම.

“කොවිඩ් - 19 පසු” ආර්ථිකය නැවත ගොඩනැගීම වෙනුවෙන්, තවත් උපාය මාර්ග ඉදිරි දිනවලදී ඉදිරිපත් කෙරෙනු ඇත.