වසංගත සමයේ හම්බන්තොට වරායට පැමිණි ප්‍රථම මගී නැව

හම්බන්තොට ජාත්‍යන්තර වරායේ ඉන්ධන සැපයීමේ සේවාවන්හී තවත් සුවිශේෂී සන්ධිස්ථානයක් සනිටුහන් කරමින්, Prudential Shipping, නියෝජිතායතනය යටතේ යාත්‍රා වන  Navigator of the Seas නැමැති මගී ප්‍රවාහන නෞකාව ඉන්ධන ලබාගැනීම සඳහා හම්බන්තොට ජාත්‍යන්තර වරායේ (HIP) නැංගුරම් ලෑවේය.   

බහාමියානු ධජය යටතේ යාත්‍රා කළ නෞකාව, ඊජිප්තුවේ පෝට් සෙයිඩ් සිට හම්බන්තොට වරායට පැමිණි අතර, එය දකුණු කොරියාවේ යෝසු වෙත යාත්‍රා කරමින් තිබේ. 217ක් වූ එහි කාර්ය මණ්ඩලය කොවිඩ්-19 නිතිරිතී හා රෙගුලාසි  පිළිපදිමින් හම්බන්තොට වරායට ගොඩබැසීමෙන් වැලකුණි.  

ඉන්ධන සැපයීම හම්බන්තොට වරාය බලශක්ති සේවාවන්හි වැදගත් අංගයකි. මෙම සේවා ලබාගැනීම සඳහා වරායට විවිධ යාත්‍රා පැමිණීම, එය ප්‍රධාන නැගෙනහිර බටහිර නැව් මාර්ගයේ උපායමාර්ගික ඉන්ධන සැපයුම් මධ්‍යස්ථානයක් ලෙස ස්ථාපිත කිරීමේ තවත් පියවරකි. වසංගතය පැතිරීමෙන් පසු වරායට පැමිණි පළමු මගී යාත්‍රාවද මෙයයි.

හම්බන්තොට ජාත්‍යන්තර වරාය සමූහයේ (HIPG) ප්‍රධාන විධායක නිලධාරී තිස්ස වික්‍රමසිංහ මහතා පවසන්නේ, "HIP විසින් මේ වනවිටත් සමුද්‍ර ඉන්ධන තොග වශයෙන් සැපයීම ආරම්භ කර තිබෙනවා. තරඟකාරී සමුද්‍ර සැපයුම් මධ්‍යස්ථානයක් ලෙස හම්බන්තොට වරාය තවදුරටත් දියුණු කිරීම සඳහා අප සයිනොපෙක් ලංකා සමාගම (SFOL) සමඟ උපායමාර්ගික හවුල්කාරිත්වයක් ඇති ගත්තා. ඒ තුළින් තොග අපනයනකරුවෙකු ලෙස ඉන්ධන සේවාවන් සැපයීම සහ හම්බන්තොට වරාය වෙත පැමිණෙන යාත්‍රා සඳහා අගය වැඩි සේවාවන්ද ලබාදෙනවා. සයිනොපෙක් දැනට හම්බන්තොට වරායට අවම සල්ෆර් සංයුතියකින් යුත් ඛනිජ තෙල් (VLSFO) සපයන අතර නුදුරු අනාගතයේ සමුද්‍රීය ගෑස් ඉන්ධන (MGO) සැපයීමටද බලාපොරොත්තු වෙනවා. ඒ තුළින් ඉන්දියානු සාගරයේ ප්‍රධාන මුහුදු මාර්ගයෙන් ගමන් කරන සියලුම යාත්‍රාවලට සේවා සැපයීමට හම්බන්තොට වරායට හැකිවනු ඇති" යනුවෙනි.