ලෝක වෙළෙඳ පොළේ ඉන්ධන මිල අඩුවෙද්දී අපේ ඉහළ ගිහින්

ලෝක වෙළෙඳ පොළෙහි බොරතෙල් මිල අඩුවී ඇති පරිසරයක, රටම භීතියට පත්ව, ජනජීවිතය අඩාලව තිබියදී රාජ්‍ය ආදායම වැඩිකර ගැනීම ගැන පමණක් සිතා රජය ඉන්ධන මිල ඉහළ දැමීම සම්බන්ධයෙන් පාරිභෝගික අයිතීන් සුරැකීමේ ජාතික ව්‍යාපාරය විරෝධය ප්‍රකාශ කරයි.

සෑම මසකම 10 වැනි දින ඉන්ධන මිල සංශෝධනය කළද පසුගිය මාසයේ 10 වැනි දින සිට මැයි 10 වැනි දින දක්වා කාලය අතර විශාල වශයෙන් ලෝක බොරතෙල් මිල අඩුවී ඇති බව පැහැදිලිවම පෙනී යන කාරණයක් බව ඔවුන් කියයි.

තත්ත්වය එසේ තිබියදී හා අප්‍රේල් 21දා ප්‍රහාරයෙන් රටම කැලඹී තිබියදී මෙරට ඉන්ධන මිල වැඩි කිරීමෙන් රට තුළ භාණ්ඩ මිල තවතවත් ඉහළ යාමට ඇති හැකියාව පිළිබඳවද නොසලකා රජය ඉන්ධන මිල වැඩි කිරීමට ගත් තීරණයෙන් පෙනී යන්නේ රජයට හිත්පිත් නැති නොමැති බව යැයිද ඔවුන් කියයි.

ඒ අනුව, මරාගෙන මැරෙන IS ත්‍රස්තවාදීන් මෙරට එල්ල කළ ත්‍රස්ත ප්‍රහාරයෙන් ජනතාවට දැනුන ආකාරයෙන්ම රජය ජනතාවගේ ආර්ථිකයට ඊයේ (10දා) මධ්‍යම රාත්‍රියේදී එල්ල කළ ප්‍රහාරය දැනෙන බව ඔවුන්ගේ විශ්වාසය බවද කියයි.