හෝමාගම මුව ගහණය 2500ක් දක්වා ඉහළට

හෝමාගම ප්‍රාදේශීය ලේකම් කොට්ඨාසයට අයත් ග්‍රාම සේවා වසම් හයක පදිංචිකරුවන්ට දැඩිව ගැටලුවක්ව පවතින මුව ග්‍රහණයට   ස්ථිරසාර පිළියම් යෙදීමට අවශ්‍ය කටයුතු ඉතා ඉක්මනින් සිදු කරන බව කොළඹ දිස්ත්‍රික් පාර්ලිමේන්තු මන්ත්‍රී හෝමාගම සම්බන්ධීකරණ කමිටු සභාපති අරුණ පනාගොඩ මහතා පැවසීය. මන්ත්‍රීවරයා එසේ පැවසුවේ එම ප්‍රදේශයේ නිරීක්ෂණ චාරිකාවකින් අනතුරුවය.

හෝමාගම උතුර , හෝමාගම නැගෙනහිර , මුල්ලේගම , හබරකඩ , පිටිපන සහ මාවත්ගම ග්‍රාම සේවා වසම්වල වසර දහයකට පමණ ඉහතදී සැරිසරු  කුඩා මුව රංචුවකින් මේවන විට  මුවන්  විශාල පිරිසක් බෝවී කෘෂිකර්මාන්තයෙන් දිවිගෙවන  නාගරික ප්‍රදේශයක් වන හෝමාගම  වැසියන් ගේ කුඹුරු ගොවිතැන් සේම ගෙවතු වල බෝග වගාවන් මුවන්ගේ ග්‍රහණයට දැඩිව නතුවීම හේතුවෙන් එම සතුන් එම ප්‍රදේශයේ පදිංචිකරුවන්ගේ ජන ජීවිතයට  දැඩි ගැටලුවක් බවට පත්ව ඇති බව මන්ත්‍රීවරයා කීය

මේ සම්බන්ධව ඉකුත් කාලය පුරා අවස්ථා ගණනාවකදී විශාල පිරිසකගෙන් තමන් වෙත පැමිණිලි ලැබුණු බවත්  එම බෝග වගාවන් විනාශ කිරීමට අමතරව මුව ගහනය හේතුවෙන්  රථවාහන අනතුරු විශාල ප්‍රමාණයක් සේම එම මුවන් ගෙවතු වලට පැමිණ සුනඛයන් සමග ගැවසීම හේතුවෙන් ජල භීතිකාව පැතිරීමේ අවදානමක් ද මතු වීම ජනතාවගේ ජීවිතවලට දැඩි සෞඛ්‍ය තර්ජනයක්  එල්ලවන්නට වූ බව මන්ත්‍රීවරයා වැඩිදුරටත් කීය.

එකී තත්ත්වය සෞඛ්‍ය අංශවල දක්ෂතාවය හේතුවෙන් වැළකී ගිය බවද හෙතෙම පැවසීය.

පිටස්තර ප්‍රදේශවලින් පැමිණෙන ආගන්තුකයන්ට මෙම මුව ගහනය  දැකුම්කලු දර්ශනයක් වුවද  දිනෙන් දින බෝවිමේ වර්ධනය එම ග්‍රාම සේවා වසම් වල පදිංචි ජනතාවගේ ජීවිතවලට දැඩි භයංකර තත්ත්වයක් සේම  බෝග වගාවන් විනාශ වීමේ  අවදානමද දෙගුණ තෙගුණ වන බව  සිදු කළ නිරීක්ෂණ චාරිකාවේ දී දැනගත හැකි වූ බව මන්ත්‍රීවරයා පැවසීය.

අදාල ගැටලුව සම්බන්ධයෙන්  හෝමාගම ප්‍රාදේශීය ලේකම් මෙන්ම අනෙකුත් රාජ්‍ය ආයතන වල නිලධාරීන් මෙන්ම වන ජීවී දෙපාර්තමේන්තුවේ නිලධාරීන්ද සම්බන්ධ කර ගනිමින් සාකච්ඡා වට කීපයක් පැවැත්වූ බවත්  ඊට සමගාමීව එම ග්‍රාම සේවා වසම් හය තුළ මුව ග්‍රහණය 2000  - 2500 ත් අතර ප්‍රමාණයක් සිටින බව   වනජීවී නිලධාරින් විසින් සිදුකළ දළ ගණනයකින් හඳුනා ගත් බවත්  මන්ත්‍රීවරයා කීය.

ඉතා සංවේදී සත්ත්ව කොට්ඨාසයකට අයත් මෙම මුවන්  වනජීවී දෙපාර්තමේන්තුවේ නිලධාරීන්ගේ මූලිකත්වයෙන් යුද්ධ හමුදා බට කණ්ඩායමක් මෙන්ම ප්‍රදේශවාසීන්ගේ සහයෝගයෙන් එම සතුන්ගේ ජීවිතවලට හානියක් නොවන පරිදි  අල්ලාගෙන සුදුසු අභය භූමියකට මුදා හැරීම සඳහා  තව නොබෝ දිනකින්ම අවශ්‍ය කටයුතු සම්පාදනය කරන බව  මන්ත්‍රීවරයා වැඩිදුරටත් පැවසීය.