සරසවි සිසුන් අතර හෝටලයක ඇති වූ ගැටුමකින් හෝටල් සේවකයෙකුට බරපතලයි

හෝමාගම ප්‍රදේශයේ සරසවියක සිසු සිසුවියන් පිරිසකගේ සහභාගීත්වයෙන් පැවති මත්පැන් සාදයක් අතරතුරදී හෝටල් සේවකයින් හා සරසවි සිසුන් අතර ඇතිවූ බහින්බස්වීමක් දුරදිග යාමෙන් දෙපාර්ශ්වය අතර ගුටි බැට හුවමාරුවක් සිදුව ඇති අතර එහිදී තුවාල ලැබූ  පුද්ගලයෙකු රෝහල් ගත කොට කාන්තාවක ඇතුළු දොළොස් දෙනෙකු (30) දා රාත්‍රී අත්අඩංගුවට ගත් බව හෝමාගම මූලස්ථාන පොලිසිය පවසයි.

එම සරසවියේ දැනට අධ්‍යාපනය ලබන හා ආදි සිසුන් පිරිසක් අතර  හෝමාගම සුවපුබුදුගම ප්‍රදේශයේ හෝටලයක ඉකුත් 30 දා සවස සිට මත්පැන් සාදයක් පවත්වා තිබේ.

මේ සඳහා  සරසවියේ සිසුන් හා ආදි සිසුන් පිරිසක් සමග  ඔවුන්ගේ හිතවතුන් පිරිසක් සහභාගී වී සිට තිබේ. එහිදි සිසුන් අතර  බහින්බස්වීමක් සිදුව ඇති අතර එය දුර දිග යාමෙන් සුළු ගැටුමක් දක්වා වර්ධනය වී තිබේ. එහිදී එම ගැටුම පාලනය කිරීම සඳහා හෝටල් සේවකයන් මැදිහත්වීමත් සමඟ සාදය සඳහා සහභාගී වූවන් හෝටල් සේවකයින් අතර ආරවුලක් හටගෙන දෙපාර්ශ්වය විසින් එකිනෙකා අතර ගුටිබැට හුවමාරුවක් සිදුව තිබේ.

පසුව එය මඳ වේලාවකින් නිමාවට පත් වුවද රාත්‍රී 11 පමණ වන විට යළිත් වරක් දෙපාර්ශවය අතර ගැටුමක් හටගෙන තිබේ. එහිදී යළිත් වරක් දෙපාර්ශ්වය අතර පහරදීමක් සිදුකර ඇති අතර ඒ සඳහා ගම්වාසීන් ද පැමිණ ඇති බව මූලික විමර්ශනවලදී අනාවරණය වී තිබේ.

ගැටුමේදී හෝටලයේ දේපළ රැසකටද හානි සිදුව තිබේ.

පසුව  සිද්ධිය සම්බන්ධයෙන් 119 හදිසි ඇමතුම් අංකයට දැනුම් දී ඇති අතර  පොලිසිය පැමිණීමට පෙර එහි සිටි
ආදි සිසුවකු තම බිරිඳ සමග පැමිණ තිබූ වෑන් රථය පණ ගන්වා පලායාමට සැරසී තිබේ. එහිදි ඔවුන්ගේ ගමන   වැළැක්වීමට ඉදිරියට පැමිණි හෝටල් සේවකයෙකු හප්පා අනතුරකට ලක් කිරීම නිසා එම පුද්ගලයා බරපතළ තුවාල ලබා තිබේ.

එම  අනතුරින් බරපතල තුවාල ලැබූ හෝටල් සේවකයා ප්‍රතිකාර සඳහා හෝමාගම මූලික රෝහලට ඇතුළත් කර ඇති අතර ඔහුගේ තත්ත්වය බරපතළ බව පැවසේ.

පසුව  සිද්ධිය වූ ස්ථානයට හෝමාගම පොලිසියේ නිලධාරී කණ්ඩායමක් පැමිණ සරසවි සිසු සිසුවියන් හා ආදී සිසුන්  ඇතුළු දොළොස් දෙනෙකු අත්අඩංගුවට ගත්  බවත් ඒ අතර කාන්තාවක සිටින බවත් පැවසේ. 

සිද්ධිය සම්බන්ධයෙන් හෝමාගම වැඩ බලන මූලස්ථාන පොලිස් පරීක්ෂක කාරියවසම් මහතාගේ උපදෙස් මත ඉදිරි පරීක්ෂණ පවත්වති.

ශාන්ත ප්‍රදීප් කුමාර කුලරත්න