ශිෂ්‍යත්ව කඩයිම් ලකුණු කඩිනමින්

2024 ශිෂ්‍යත්ව විභාගයේ කඩයිම් ලකුණු මෙතෙක් ප්‍රකාශයට පත් නොකර ඇති පසුබිමක, එම විභාගයට මුහුණ දුන් ශිෂ්‍ය ශිෂ්‍යාවන් ගැටලුවකට මුහුණ දී ඇති බව සමගි ජන බලවේයේ පාර්ලිමේන්තු මන්ත්‍රී නීතිඥ දයාසිරි ජයසේකර මහතා පැවසීය.

වාචික පිළිතුරු අපේක්ෂාවෙන් අද (27දා) පාර්ලිමේන්තුවේදී ප්‍රශ්නයක් යොමු කරමින් හෙතෙම මේ බව සඳහන් කළේය.

එම විභාගයට අදාළ කඩයිම් ලකුණු කඩිනමින් ඉදිරිපත් කරන බව ඊට පිළිතුරු ලබා දෙමින් අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය පැවසීය.

සමගිජ ජන බලවේගයේ පාර්ලිමේන්තු මන්ත්‍රී නීතිඥ දයාසිරි ජයසේකර - ශිෂ්‍යත්ව විභාගයේ ප්‍රශ්න 03 ගැන කමිටුවේ නිර්දේශවලින් එකක් ක්‍රියාත්මක කරන්න කියලා තමයි ශ්‍රේෂ්ඨාධිකරණය කිව්වේ. මේ සියලු දෙනාම වැඩි ඉල්ලීමක් කළේ නැවත ඒ ප්‍රශ්න පත්‍රය තියන්න කියලා. නමුත් ඒක සිදු වුණේ නෑ. මේ ක්‍රියාදාමය තුළ කාරණා දෙකක් සිදුවෙලා තියෙනවා මේක ලියපු දරුවන්ට. මේ ප්‍රශ්න තුනට උත්තර ලියපු දක්ෂ දරුවෝ මේ ප්‍රශ්නවලට ලිව්වා.

මෙතනදී ලකුණු දීමත් එක්ක පහළ හිටපු දරුවන්, සමහර විට මේ ප්‍රශ්නවලට නොලියපු දරුවෝ ලියපු දරුවන්ට වඩා ලකුණු තියෙන අවස්ථා දැන් ඇවිල්ලා තියෙනවා. ඒක එක කාරණයක්. දෙවැනි කාරණය ජනවාරි මාසය වන විට 06 වසර පටන් ගන්නවා. ඔබතුමියන්ලා කිව්වා තාවකාලිකව මේ දරුවන්ව පාසල්වලට අනියුක්ත කරන්න කියලා. ප්‍රශ්නය වෙලා තියෙන්නේ කඩයිම් ලකුණු තවම දීලා නෑ. සමහර පාසල්වල පුටු නෑ. ඉඳගන්න තැනක් නෑ. ඒත් මේ තීරණයෙන් සියලුදෙනා ගෙනල්ලා පිරෙව්වා. ඇත්තටම ගන්න තිබුණු පියවර ගත්ත නැති එකේ ප්‍රශ්නයක් තිබුණා.

ඔබතුමයි කමිටුවක් පත්කරලා ඒකේ තීරණය දුන්නා. ඒත් කරන්න තිබුණේ තීන්දුවක් අරන් කියන්න තිබුණා මේක වහාම තියන්න කියලා. ඒක කළේ නෑ. ඔබතුමිය ආපු ගමන් ඒක සිදු වුණේ. ඒ නිසා ඒකට එකපාර අතගහන්න බය වෙන්න ඇති. කඩයිම් ලකුණු ගැන ඔබතුමිය වහාම පියවරක් ගන්නවාද ?

අධ්‍යාපන, උසස් අධ්‍යාපන සහ වෘත්තීය අධ්‍යාපන අමාත්‍ය, අග්‍රාමාත්‍ය ආචාර්ය හරිනි අමරසූරිය - එකක් වැඩිපුර ඉල්ලීම තිබ්බේ විභාගය නැවත තියන්න නෙවෙයි. උසාවියට ගියේ ඒක ඉල්ලපු දෙමවුපියන්ගේ පිරිසක්. නමුත් අපිට බහුතරයක් ඉල්ලීම් කරලා තිබුණේ විභාගය නැවත තියන්න එපා කියලා. ඒ අය නඩු කිව්වේ නැති නිසා ඔවුන්ගේ හඬ මේ විදියට මතු වුණේ නෑ. මේ විභාගයට දෙමළ මාධ්‍යයෙනුත් සිසුන් මුහුණ දෙනවා.

දෙමළ මාධ්‍යයේ ප්‍රශ්න පත්‍රයේ කිසිදු ප්‍රශ්නයක් තිබුණේ නෑ. ඒ නිසාම තමයි අපි විශේෂඥ කමිටුවක් පත් කළේ. මම බය වුණේ නෑ. කමිටුව පත් කළේ වගකීම අතහරින්න නෙවෙයි. කඩයිම් ලකුණු පරක්කු වුණේ විභාග දෙපාර්තමේන්තුවේ වැරැද්දක් නිසා නෙවෙයි. නඩුව නිසා වුණේ. කඩයිම් ලකුණු අපි දාලා තියෙන්නේ. බොහොම ඉක්මනින් ඒක ඉවර වෙනවා.