ශ්‍රී ලන්කන් ගුවන් යානා ප්‍රමාද වීම් හා අවලංගු වීම් නිසා ඩොලර් මිලියන 9.8ක පිරිවැයක්

2024 වසරේ ජනවාරි 01වැනිදා සිට දෙසැම්බර් 31 වැනිදා දක්වා ශ්‍රී ලංකන් එයාර් ලයින්ස් ආයතනයේ ගුවන් ගමන් වාර 11,250ක් ක්‍රියාත්මක කර ඇති අතර, එහිදී එම කාලයෙහි ගුවන් ගමන් වාර 1,039ක් අවලංගු කර ඇති බව පාර්ලිමේන්තුවේදී අනාවරණය විය.

එමෙන්ම මෙම කාලයෙහි නියමිත කාලයට විනාඩි 15ක් ප්‍රමාද කර ගුවන් යානා  3,821 ක් සහ නියමිත කාලයට විනාඩි 30 ක් ප්‍රමාද කර ගුවන් යානා 2,474ක් ධාවනය කර ඇති බවද අනාවරණය විය.

ඒ අනුව ශ්‍රී ලංකන් එයාර් ලයින්ස් ආයතනයේ ගුවන්යානා ප්‍රමාද වීම් සහ අවලංගු කිරීම් හේතුවෙන් මෙම කාලයෙහි එම ආයතනයට ඇමරිකන් ඩොලර් මිලියන 9.8ක් අමතර පිරිවැක් දැරීමට සිදුව තිබේ.

වාචික පිළිතුරු අපේක්ෂාවෙන් ඊයේ (06දා) පාර්ලිමේන්තුවේදී රෝහණ බණ්ඩාර මහතා යොමු කළ ප්‍රශ්නයකට මුදල් නියෝජ්‍ය අමාත්‍යවරයා විසින් සභාගත කළ පිළිතුරේ මේ බව සඳහන් කර ඇත.