වෛද්‍යවරු ඉච්ඡාභංගත්වයට පත්වෙලා

වර්තමාන ආණ්ඩුව සාධනීය අරමුණින්  වැටුප් සංශෝධනයක් ක්‍රියාත්මක කළත් , අමතර රාජකාරි දීමනා සහ නිවාඩු දින දීමනා කප්පාදු කිරීමට ගත් තීරණය හේතුවෙන් වෛද්‍යවරුන්  ඉච්ඡාභංගත්වයට පත්ව තිබෙන බව රජයේ වෛද්‍ය නිලධාරීන්ගේ සංගමය සඳහන් කරයි.

නිදහස් සෞඛ්‍ය සේවාව ශක්තිමත් කිරීම ඉලක්ක කර ගනිමින් සාධනීය යෝජනා ගණනාවක් අයවැය ලේඛනයෙහි අන්තර්ගත කර තිබීම ප්‍රශස්ත කරුණක් බවද එම සංගමය නිවේදනයක් නිකුත් කරමින් සඳහන් කරයි.

රුපියල් බිලියන 604 ක් වන, ඉතිහාසයේ වැඩිම මුදල සෞඛ්‍ය පද්ධතිය වෙනුවෙන් වෙන් කර ඇති අතර, රෝහල් පද්ධතියට ඖෂධ සහ උපකරණ ලබාදීම වෙනුවෙන් වෙන්කර ඇති මුදල රුපියල් බිලියන 185 ක් බවද සංගමය පෙන්වා දෙයි.

සෞඛ්‍ය සේවාව පුළුල් කිරීමේදී බුද්ධිගලනය හමුවේ දැනට උද්ගතවී ඇති වෛද්‍ය හිඟය අවධානයට ලක්විය යුතු කරුණක් බවද සඳහන් කරයි.

වෛද්‍යවරුන් ලෙස මෙවර අයවැය ලේඛනයේ වැඩිම අවධානයක් යොමු වී ඇත්තේ රාජ්‍ය සේවයේ වැටුප් සංශෝධන ක්‍රියාවලිය කෙරෙහි බවද සංගමය පෙන්වා දෙයි.

රජයේ වෛද්‍ය නිලධාරීන්ගේ සංගමයේ දීර්ඝකාලීන ස්ථාවරය වූයේ විද්‍යාත්මක නොවන අයුරින් විටින් විට වැටුපට දීමනා එකතු කිරීම වෙනුවට, ජාතික වැටුප් ප්‍රතිපත්තිය තුළ අදාල වැටුප් අනුපාත ආරක්ෂා වන පරිදි රාජ්‍ය සේවකයන්ගේ මූලික වැටුප සංශෝධනය විය යුතු බවත්ය.

ඒ අනුව, පවතින මූල්‍ය සීමාවන්හ වුවද ජනාධිපති ප්‍රමුඛ රජය විසින් රාජ්‍ය සේවකයන්ගේ මූලික වැටුප, ජාතික වැටුප් ප්‍රතිපත්තියට අනුකූලව ඉහළ නැංවීම අතිශයින් ධනාත්මක තීරණයක්  බවත්,එහිදී සියලුම ශ්‍රේණි වල වෛද්‍යවරුන්ගේ මූලික වැටුප සැලකිය යුතු අගයකින් ඉහළ නැංවීම පිළිබඳ ස්තූතිය පළකර කරන බවත් සඳහන් කරයි.

අයවැය හරහා වැටුප් වැඩිවීමක් සිදුවුව ද, වෛද්‍ය සේවාවටම ආවේණික සහසුවිශේෂ වූ අමතර රාජකාරි දීමනාව ගෙවීමේ අගය අත්තනෝමතික ලෙස අඩු කිරීමේ තීරණය වෛද්‍යවරුන් තුළ බරපතළ නොසන්සුන්තාවක් ඇතිකර තිබෙන බවද පෙන්වා දෙයි.

අමතර රාජකාරි ක්‍රමය සහ අමතර රාජකාරි දීමනාව වෛද්‍යවරුන්ට පමණක් සුවිශේෂ සහ ආවේණික වන බවත්  මේ වන විට වෛද්‍යවරුන්ගේ අමතර රාජකාරි දීමනාවේ පැයකට ගෙවනු ලබන අගය අදාළ ශ්‍රේණියේ මූලික වැටුපේ මධ්‍යඅ ගයෙන් 1/80 ක් වන අතර, එම අගය වෛද්‍යවරුන්ටම පමණක් ආවේණික වන බවත් පෙන්වා දෙයි.

දීමනා ගෙවීම  අයවැය හරහා එක්වරම මූලික වැටුපෙන් 1/120 දක්වා 50% කින් අඩු කර තිබෙන බවත් වෛද්‍යවරුන් තම සායනික රාජකාරීන්ට අමතරව රාජකාරි ගණනාවක් ඉටුකරන අතර, සාමාන්‍ය රාජකාරී වේලාවෙන් පසුවද අඛණ්ඩව දින 07ම පැය 24 පුරා
රෝගී සත්කාර සේවාවන් රට පුරා සපයනු ලබන බවත් පෙන්වා දෙයි.

ඒ වෙනුවෙන් ලැබෙන අමතර රාජකාරි දීමනාව දැනට ගෙවනුයේ මාසික සහ දෛනික සීමාවක් සහිතව වන බැවින්, ඉටුකරන සේවාවට සාපේක්ෂව සියලුම කාණ්ඩවල වෛද්‍යවරුන්ට ලැබෙනඅමතර රාජකාරි දීමනාවේ ප්‍රමාණාත්මක අඩුවක් පවතින බවද සඳහන් කරයි.

තත්ත්වය එසේ තිබියදී, අයවැය යෝජනාවක් ලෙස වෛද්‍යවරුන්ගේ අමතර රාජකාරී දීමනාවේ පැයකට ගෙවන අගය අසාධාරණ සහ අත්තනෝමතික ලෙස50% කින් පහත හෙලීමෙන් මෙරට වෛද්‍යවරුන් අවම පහසුකම් මධ්‍යයේ රටපුරා අඛණ්ඩව සපයන රෝගී සත්කාර සේවා, තවත් අවතක්සේරු වීමක් සිදුවී ඇති බවද පෙන්වාදෙයි. 

මේ නිසා අදාළ  තීරණය වෙනස් කර නැවතත් අමතර රාජකාරි දීමනාවේ අගය මූලික වැටුපෙන් 1/80 ලෙසත්, නිවාඩු දින දීමනාවේ අගය මූලික වැටුපෙන් 1/20 ක් ලෙසත් කඩිනමින් සංශෝධනය විය යුතු සඳහන් කරයි.

උද්ගත වී ඇති ගැටලුකාරී තත්ත්වය සම්බන්ධයෙන් සාකච්ඡා කිරීම සඳහා ජනාධිපති අනුර කුමර  දිසානායක මහතාගෙන්  කඩිනම් සාකච්ඡාවක් ඉල්ලා සිටීමට තීරණය තීරණය කර තිබෙන බවත් මේ සඳහා ඍජුව මැදිහත් වන ලෙස  සෞඛ්‍ය ඇමතිවරයාගෙන් ඉල්ලා සිටීමට කටයුතු කරන බවත් සඳහන් කරයි.

මෙම ගැටලුව සම්බන්ධයෙන්  ජනාධිපති අනුර කුමාර දිසානායක මහතා  සහ සෞඛ්‍ය අමාත්‍යවරයා  ලිඛිතව දැනුවත් කරනු තිබෙන බවද පෙන්වා දෙයි. මෙම ගැටලුව විසඳීමට කඩිනමින් අවශ්‍ය සාධනීය පියවර ගැනීමටපාලකයන් අපොහොසත් වුව හොත්  අවසානයේදී වෘත්තීය ක්‍රියාමාර්ග වලට වුවද යොමු වීමට සිදුවන බව ද රජයේ වෛද්‍ය නිලධාරීන්ගේ මධ්‍යම කාරක සභාව ඒකමතිකව තීරණය කර තිබේ.