වෛද්‍යවරිය අපයෝජනය කළ සැකකරු සොයා කණ්ඩායම් පහකින් පරීක්ෂණ

අනුරාධපුර ශික්ෂණ රෝහලේ සේවය කරමින් සිටින වෛද්‍යවරියක අපයෝජනය කිරීමේ සිද්ධියට සම්බන්ධ සැකකරුවන් අත්ඩංගුවට ගැනීම සඳහා පොලිස් කණ්ඩායම් පහක් යොදවා ඇති බව උතුරු මැද ජ්‍යෙෂ්ඨ නියෝජ්‍ය පොලිස්පති කාර්යාලය කියයි.

අදාළ වෛද්‍යවරිය පෙරේදා (10දා) අනුරාධපුර ශික්ෂණ රෝහලේ සිය රාජකාරි නිමවා ආපසු වෛද්‍ය නිල නිවාසයට පැමිණි අවස්ථාවේදී පස්වරු 6.30ත් 7ත් අතර කාලය තුළ මෙලෙස ඇය අපයෝජනය කොට ඇති බව අනුරාධපුර මූලස්ථාන පොලීසියේ ළමා හා කාන්තා කාර්යාංශය සඳහන් කරයි.

මෙලෙස අපයෝජනයට ලක්ව ඇත්තේ 32 හැවිරිදි අවිවාහක වෛද්‍යවරියක බවද පවසයි.

අදාළ වෛද්‍යවරිය මේ වන විට අනුරාධපුර රෝහලට ඇතුළත්ව නේවාසිකව ප්‍රතිකාර ලබමින් සිටින අතර, ඇය අධිකරණ වෛද්‍ය පරීක්ෂණයක් සඳහා අනුරාධපුර ශික්ෂණ රෝහලේ විශේෂඥ අධිකරණ වෛද්‍යවරයා හමුවට ඉදිරිපත් කිරීමට නියමිතව තිබිණ.

උතුරු මැද ජ්‍යෙෂ්ඨ නියෝජ්‍ය පොලිස්පති කාර්යාලය පවසන්නේ මෙම අපරාධයට සම්බන්ධ සැකකරුවෙකු දැනටමත් හඳුනාගෙන ඇති බවත්, ඔහු පලා ගොස් සැඟව සිටීම නිසා ඔහු අත්අඩංගුවට ගැනීමට මෙහෙයුම් ක්‍රියාත්මක බවත්ය.

මේ අතර මෙම අපරාධය සම්බන්ධයෙන් අනුරාධපුර පොලිස් ළමා හා කාන්තා කාර්යාංශය අනුරාධපුර ප්‍රධාන මහේස්ත්‍රාත් අධිකරණයට කරුණු වාර්තා කිරීමට නියමිත විය.

අදාළ වෛද්‍යවරිය අපයෝජනය කිරීමේ සිද්ධියට විරෝධය පළ කරමින් සහ සැකකරුවන් වහාම අත්අඩංගුවට ගන්නා ලෙස බල කරමින් අනුරාධපුර ශික්ෂණ රෝහලේ විශේෂඥ වෛද්‍යවරු ඇතුළු අනෙකුත් වෛද්‍යවරු ඊයේ (11දා) දහවල් 12 සිට වෛද්‍ය වැඩවර්ජනයක්ද අරඹා තිබේ.

ඊට සමගාමීව පෞද්ගලික රෝහල්වල චැනල් සේවයෙන් ඉවත් වීමටද අනුරාධපුර ශික්ෂණ රෝහලේ සේවය කරන සියලුම විශේෂඥ වෛද්‍යවරු තීරණය කොට ඇති අතර, එම වර්ජනය මේ වන විට ක්‍රියාත්මකය.

වර්ජනයකට යොමුව සිටින ශික්ෂණ රෝහලේ විශේෂඥ වෛද්‍යවරු ඇතුළු අනෙකුත් සියලුම වෛද්‍යවරු පොලීසියෙන් ඉල්ලා සිටින්නේ අනුරාධපුර ශික්ෂණ රෝහලේ සේවය කරන සියලුම වෛද්‍යවරුන්ගේ ආරක්ෂාව වහාම තහවුරු කරන ලෙසයි.

උතුරු මැද ජ්‍යෙෂ්ඨ නියෝජ්‍ය පොලිස්පති බුද්ධික සිරිවර්ධන මහතාගේ සෘජු අධීක්ෂණය යටතේ අනුරාධපුර කොට්ඨාස භාර ජ්‍යෙෂ්ඨ පොලිස් අධිකාරී තිළිණ හේවාපතිරණ මහතාගේ මෙහෙයවීම යටතේ පොලිස් කණ්ඩායම් පහක් මෙම අපරාධයට සම්බන්ධ සැකකරුවන් අත්අඩංගුවට ගැනීම සඳහා යොදවා සිටිති.

අනුරාධපුර අධිකරණ උපාලි ආනන්ද සහ අනුරාධපුර බී.ජී. චතුරංග