වියළි කාලගුණයෙන් එළවළු වගාවට බලපෑම්

පවතින වියළි කාලගුණ තත්ත්වය නිසා එළවළු වගාවන්ට දැඩි ලෙස බලපෑම් සිදුව තිබෙන බවත්, මේ නිසා පලදාව අඩු වී තිබෙන බවත් ජාතික ගොවිජන එකමුතුව සඳහන් කරයි.

වැඩිම බලපෑම සිදුව තිබෙන්නේ උඩරට එළවළු වගාවන්ට බවත්, මධ්‍යම කඳුකරයට පවතින වියළි කාලගුණ තත්ත්වය නිසා ජල පහරවල්වල ජලය ගලා ගෙන යාමත් සැලකිය යුතු ලෙස අඩු වී තිබෙන බවද එම සංගමයේ සභාපති අනුරාධ තෙන්නකෝන් මහතා සඳහන් කළේය.

මේ නිසා කැරට්, ලීස්, නෝකෝල්, ගෝවා වගාවන්ට සේම, කොළ ගෝවා වගාවන්ට බලපෑම් සිදුව තිබෙන බවත්, පහතරට එළවළු වගාවන්වලටත් වියළි කාලගුණ තත්ත්වයෙන් බලපෑම් සිදුව තිබෙන බවද පවසා සිටියේය.

පහතරට වගාවන් සැලකීමේදී තක්කාලි, මිරිස් වගාවන්ට, රාබු, මෑකරල්, වම්බොටු වගාවන්ට දැඩිව බලපෑම් සිදුව තිබෙන බවත්, පලදාව අඩු වීමත් සමග අතරමැදියන් විසින් එළවළු මිල අධික ලෙස ඉහළ දමා අලෙවි කරමින් තිබෙන බවද පැවසීය.
මීට අමතරව සමහර බීජවල ප්‍රමිතිය පිළිබඳව ගැටලු ඇති වී තිබෙන බවත්, මේ නිසාත් පලදාව අඩු වී තිබෙන බවට ගොවිජනතාව සඳහන් කරන බවද සඳහන් කළේය.

රටේ බීජ අවශ්‍යතාවයෙන් සැලකිය යුතු ප්‍රමාණයක් විදේශ රටවලින් ගෙන්වන බවත්, මේ නිසා රටින් ගෙන්වන බීජ පරීක්ෂාවකට ලක්කරන ක්‍රමවේදයක් සකස් කළ යුතු බවද පැවසීය.