වැස්ස නිසා බදුල්ලේ මාර්ග රැසක් අවහිර වෙයි

පවතින වැසි සහ සුළං සහිත අයහපත් කාලගුණික තත්ත්වය හේතුවෙන් අද 28 අලුයම සිට බදුල්ල දිස්ත්‍රික්කයේ ප්‍රධාන මාර්ග කිහිපයක ගමනාගමනයට බාධා එල්ල වී ඇතැයි බදුල්ල ආපදා කළමනාකරණ මධ්‍යස්ථානයේ  නියෝජ්‍ය අධ්‍යක්ෂ ඊ එම් එල් උදය  කුමාර මහතා පැවසීය. 
 
බදුල්ල චෙන්කලඩි මාර්ගය ලුණුගල හා බිබිල අතර  විසි හත්වෙනි කිලෝමීටර් කනුව ස්ථානයෙන් නාය යාම හේතුවෙන් එම මාර්ගය සම්පූර්ණයෙන් අවහිර වී තිබෙන බවත් විදුලි කණුවක් ද කඩා වැටී  ඇති බවත් පොලීසිය කියයි. 

බදුල්ල මහියංගන මාර්ගයේ හතේ කණුව  තල්දෙන බන්ධනාගාරය අසලදීත් දුන්හිඳ අසලදීත්  මාර්ගයට පස්කදු කඩා වැටී එම මාර්ගයේ  ගමනාගමනයට බාධා එල්ල වී ඇති බව පොලීසිය කියයි. 

මේ අතර දියතලාව හපුතලේ  අතර ප්‍රදේශයේ මාර්ගයට කඩා වැටී තිබූ ගස් ඉවත් කර මාර්ගය විවෘත කර ඇති බවත්  වැලිමඩ බණ්ඩාරවල මාර්ගයේ තිබූ අවහිරතා ද ඉවත් කර ඇති බවත් ආපදා සහන නිලධාරීහු පවසති. 

මේ අතර  බදුල්ල රිදීපාන ප්‍රදේශයේ නිවසක පිටුපස තාප්පයක් කඩා වැටී එම නිවසට දැඩි හානි සිදුවී ඇති බවත් එහි සිටි අයගේ ජීවිත බේරී ඇති බවත් පොලිසිය කියයි.

අවහිර වී ඇති මාර්ග අද 28 අළුයම සිටම කඩිනමින් පිරිසකර කිරීමේ කටයුතු ආරම්භ කිරීමට මාර්ග  සංවර්ධන අධිකාරිය,  පොලිසිය හා ආපදා සහන නිලධාරීහු මැදිහත්ව ආරම්භ කර තිබෙන බවත් ආපදා කළමනාකරණ මධ්‍යස්ථානයේ නියෝජ්‍ය අධ්‍යක්ෂ ඊ එම් එල්  උදය කුමාර මහතා පැවසීය. 

මේ අතර පිංආරාව කටුකැළේ ප්‍රදේශයේද නායාමක් සිදුවී  ඇති බවද බදුල්ල  ආපදා කළමනාකරණ මධ්‍යස්ථානය කියයි. 

බදුල්ල  දිස්ත්‍රික්කයේ බොහෝ ස්ථානවලට ඊයේ රාත්‍රියේ සිට මිලිමීටර් 100 සහ 120  ඉක්මවූ තද වර්ෂා තත්ත්වයන් පවතින බැවින් අවදානම් සහිත කලාපවල සිටින වැසියන් දැඩි  විමසිල්ලෙන් කල්පනාකාරීව සිටිය යුතු බවද බදුල්ල ආපදා කළමනාකරන මධ්‍යස්ථානය ජනතාවට දැනුම් දෙයි.