වන අලින් දුම්රියේ ගැටීම වැළැක්විමට ඒකාබද්ධ වැඩ පිළිවෙළක්

දුම්රියේ ගැටීමෙන් සිදු වූ අවාසනාවන්ත අනතුරෙන් වන අලි 07 දෙනෙකු මියයාමෙන් පසු එවන් අනතතුරු යළි සිදුනොවීම හා වන අලි දුම්රියේ ගැටීම වළක්වාලීම සම්බන්ධයෙන් කටයුතු කරනු ලබන බලධාරීන් සමග විශේෂ සාකච්ඡාවක් හා විශේෂ නිරීක්ෂණ චාරිකාවක් නිවාස නියෝජ්‍ය අමාත්‍ය ටී.බී.සරත් මහතාගේ ප්‍රධානත්වයෙන් 22 උදෑසන කවුඩුල්ල ජාතික වන උද්‍යානයේදි පැවැත්විණ.

මෙහිදී එක් එක් ආයතනවලට වරද පටවනු වෙනුවට වන අලින් දුම්රියේ ගැටීමෙන් සිදුවන අනතුරු වළක්වා ගැනීම සඳහා සියලු ආයතනවල සහයෝගයෙන් යුතු වැඩපිළිවෙළක් දියත් කිරීමේ වැදගත්කම පිළිබඳ මෙහිදී සාකච්ඡාවට බඳුන් විය.

ඒ අනුව වන අලි දුම්රිය ගැටී හානි සිදුවන හා ජීවිතක්ෂයට පත්වන ප්‍රදේශවල, දුම්රිය ප්‍රධාන මාර්ගයේ දෙපස අඩි පහළොවක් දුරට කැලෑ එළිපෙහෙළි කිරීම, එම ප්‍රදේශවලින් දුම්රිය ගමන් කිරීමේදී අලින්ට ඉක්මනින්ම ඉවත්වීමට හැකි පරිසරය උදා කිරීම,දුම්රිය රියදුරන්ට වන අලි පෙනෙන පරිදි සූර්ය විදුලි බල්බ සවිකිරීම, මුර කුටි ඉදිකිරීම, දුම්රිය ප්‍රධාන මාර්ගය දෙපස තිබෙන වැව් පිළිසකර කර ඔවුන්ට පානීය ජලය සපුරාදීම හා වන අලින්ගේ ජීවිත ආරක්ෂාව වෙනුවෙන් තවත් ක්‍රමවේද රැසක් ක්‍රියාත්මක කිරීමට මෙම සාකච්ඡාවේදී තීරණය විය.

වන අලින් දුම්රිය මාර්ගයේ සිටියත් ඉවත් වීමට පරිසරයක් උදා නොවීම මෙම වන අලි හත්දෙනා මියයාමට ප්‍රධාන හේතුවක් බවත්, ඒ අනුව දුම්රිය මාර්ගය දෙපස තිබෙන වළවල් පිරවීමත්, දුම්රියේ එන විට වන අලින්ට ඉක්මනින් මාරුවීමට හැකි ක්‍රමවේදයක් සැකසීමත් මෙම සාකච්ඡාවේදී තීරණය විය.

ඒ සඳහා සහභාගී වූ නිලධාරීහු මෙම දුම්රිය අනතුර සිදුවූ ස්ථානය හා වන අලින් දුම්රිය මාර්ගය හරහා ගමන් කරනු ලබන ස්ථාන පිළිබඳව සොයා බැලීම සඳහා විශේෂ දුම්රියකින් ගල්ඔය සිට හිඟුරක්ගොඩ දක්වා නිරීක්ෂණ චාරිකාවක නිරතවූහ.

මෙම අවස්ථාවට පොළොන්නරුව දිස්ත්‍රික් පාර්ලිමේන්තු මන්ත්‍රී පද්මසිරි බණ්ඩාර, වනජීවී වැඩබලන අධ්‍යක්ෂ ජනරාල් රන්ජන් මාරසිංහ, දුම්රිය සහකාර සාමාන්‍යාධිකාරී එම්.ජේ.ඉදිපොලගේ, වනසංරක්ෂණ අධ්‍යක්ෂ ජනරාල් නිශාන්ත එදිරිසිංහ, කවුඩුල්ල ජාතික වන උද්‍යානයේ උද්‍යාන භාරකරු පියල් රවීන්ද්‍ර හබරණ සහ පොලිස් ස්ථානාධිපති පාලිත ඉලංගන්සේකර මහතා ඇතුළු රාජ්‍ය නිලධාරීහු රැසක් එක්ව සිටියහ.

මනම්පිටිය නිමල් ජයරත්න