වන අලි දුම්රියේ ගැටීම් වැළැක්වීමට සංවේදක පද්ධතියක්

සංවේදක පද්ධති (Senor System) සවි කිරීමට අදාළ ක්‍රියාමාර්ග ගැනීම සඳහා වනඅලි දුම්රියේ ගැටෙන ප්‍රදේශවල වාර්තාවක් ලබා ගැනීමට තීරණය වී ඇතැයි පරිසර අමාත්‍යාංශය සඳහන් කරයි.

අමාත්‍යාංශය සඳහන් කර සිටියේ අදාළ ප්‍රදේශවල වේග පුවරු සවි කිරීම හා අනතුරු ඇඟවීම් පුවරු සවි කිරීම ගැටලුව සඳහා කෙටිකාලීන විසඳුම් ලෙස හඳුනා ගෙන ඇති බවයි.

එසේම භාණ්ඩ රැගෙන යන දුම්රිය දහවල් කාලයේ ධාවනය කිරීම සහ දුම්රිය වේග සීමා පැනවීම මගින් වනඅලින් දුම්රියේ ගැටීම පාලනය කළ හැකි බවද අමාත්‍යාංශය පෙන්වා දෙයි.

අලි ඇතුන් දුම්රියේ ගැටීම වළක්වාලීම සඳහා කඩිනම් විසඳුම් ප්‍රායෝගිකව ක්‍රියාත්මක කිරීමේ අරමුණෙන් පරිසර අමාත්‍ය වෛද්‍ය ධම්මික පටබැඳි, නියෝජ්‍ය අමාත්‍ය ඇන්ටන් ජයකොඩි සහ ප්‍රවාහන, සිවිල් ගුවන් සේවා හා මහාමාර්ග අමාත්‍ය බිමල් රත්නායක මහත්වරුන්ගේ ප්‍රධානත්වයෙන් පාර්ලිමේන්තුවේ දී විශේෂ සාකච්ඡාවක් පසුගියදා පැවැත්විණ.