රුපියල් අනූ ලක්ෂයක් වටිනා විදේශීය නිෂ්පාදිත දුම්වැටි තොගයක් නීතිවිරෝධී ලෙස මෙරටට රැගෙන විත් ඒවා කටුනායක ගුවන් තොටුපොළෙන් පිට කර ගෙන යමින් සිටි රේගු නිලධාරීවරයෙකු ඇතුළු තවත් පුද්ගලයන් දෙදෙනෙකු 03/11 දින උදෑසන පොලිස් මත්ද්රව්ය කාර්යාංශයේ නිලධාරීන් පිරිසක් විසින් අත් අඩංගුවට ගෙන තිබේ.
මෙසේ අත් අඩංගුවට ගෙන ඇති තිදෙනාම ගම්පොළ ප්රදේශයේ පදිංචිකරුවන් වීම විශේෂත්වයකි. මෙම දුම්වැටි තොගය මෙරටට ගෙන ආ ප්රධන ව්යාපාරිකයා සහ ඔහුගේ සහායකවරයා 03/11 දින උදෑසන 08.45 ට ඩුබායි සිට ෆ්ලයි ඩුබායි ගුවන් සේවයේ එෆ්.ඉසෙඩ්.- 569 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණි.
එහිදී රේගු නිලධාරීවරයා සිය රාජකාරී හැදුනුම්පත ඉදිරිපත් කර ගුවන් තොටුපොළ තුළට පිවිස , මෙම දුම්වැටි තොගය , ගුවන් තොටුපොළෙන් පිට කර ගෙන යමින් සිටියදී මෙම අත් අඩංගුවට ගැනීම සිදු කළ බව පොලිස් මත්ද්රව්ය කාර්යාංශයේ නිලධාරීවරයෙකු පැවසීය .
එසේම මොවුන් විසින් ගමන් මලු 05 ක් රැගෙන විත් තිබූ අතර , ඒවා තුළ විදේශීය නිෂ්පාදිත '' මැන්චෙස්ටර් '' වර්ගයේ දුම්වැටි 60,000 ක් අඩංගු දුම්වැටි කාටූන් 300 ක් සගවා ගෙන තිබූ බවද හෙතෙම වැඩිදුරටත් පැවසීය .
මෙසේ අත් අඩංගුවට ගත් පුද්ගලයන් තිදෙනා , ඔවුන් නීතිවිරෝධී ලෙස රැගෙන ආ දුම්වැටි තොගය 03/12 දින නීතිවිරෝධී ආනයනය , ජාවාරම් කිරිම සහ සන්තකයෙහි තබා ගැනීම යන චෝදනා යටතේ මීගමුව මහේස්ත්රාත් අධිකරණය වෙත ඉදිරිපත් කිරිමට නියමිතය .

