රුපියල් එක් කෝටි විසිපන් ලක්ෂයේ තේ පර්යේෂණ යන්ත්‍රය හත් අවුරුද්දක්ම කොට උඩ
තේ පර්යේෂණ මණ්ඩලය මගින් තේ පර්යේෂණ කටයුතු සඳහා රුපියල් 12,554,583 ක මුදලක් වැයකර ඉන්දියාවෙන් මිලදීගත් යන්ත්‍රයක් වසර හතක් තිස්සේ කිසිදු පර්යේෂණයකට යොදා ගැනීමට නොහැකිව නිෂ්කාර්යව පවතින බව ජාතික විගණන කාර්යාලය අනාවරණය කරයි.
2017 නොවැම්බර් 24 දින මිලට ගෙන ඇති දේශගුණික විපර්යාස සඳහා තේ ශාකයේ අනුවර්තීය ප්‍රතිචාර අධ්‍යනයට යොදා ගැනීමට යෝජිත මෙම ( walk in type environmental controlled facility) යන්ත්‍රය අපේක්ෂිත පිරිවිතර හා ක්‍රියාකාරිත්වය නොපැවතීම නිසා භාවිතයට යොදා ගත නොහැකිවී ඇතැයි මේ සම්බන්ධයෙන් විගණන කාර්යාලය නිකුත් කළ විගණන වාර්තාවකින් පෙන්වා දී තිබේ.
මෙම කාරණය සම්බන්ධයෙන් මෙම යන්ත්‍රය සැපයූ දේශීය හා විදේශීය සැපයුම්කරුවන් යහපත් ප්‍රතිචාරයක් නොදක්වා ඇති හෙයින් එකී යන්ත්‍රයට වැයවූ මුදල හා එය ගෙවා නිමකරන තුරු නෛතික පොලියක්ද ලබා ගැනීමට නඩු පැවරීමට කටයුතුකර ඇති බව තේ පර්යේෂණ මණ්ඩලය විසින් විගණනයට දන්වා ඇත.
එම යන්ත්‍රය ප්‍රසම්පාදනයට වගකිවයුතු පාර්ශවයන්ට එරෙහිව කඩිනමින් ක්‍රියාමාර්ගයක් ගෙන එහි අලාභ අයකර ගන්නා ලෙස විගණන කාර්යාලය නිර්දේශ කර තිබේ.
ජේ.ඉඳුරුවගේ
ඔබේ අදහස් එවන්න.
ඔබේ අදහස් සිංහලෙන්, ඉංග්රීසියෙන් හෝ සිංහල ශබ්ද ඉංග්රීසි අකුරෙන් ලියා එවන්න.
