රු. කෝටියක අයිස් සැප කාරයකින් අරන්යද්දි හමුදා අත්අඩංගුවට

මන්නාරම මැදවච්චිය මාර්ගයේ කුංචිකුලම් ප්‍රදේශයේදී කාර් රථයක ප්‍රවාහනය කළ රුපියල් මිලියන 12 ක් පමණ වටිනා අයිස් මත්ද්‍රව්‍ය තොගයක් සමග සැකකරුවන් දෙදෙනෙකු ඊයේ (08) සවස අත්අඩංගුවට ගනු ලැබීය.

මන්නාරම තල්ලඩි යුදහමුදා කඳවුරේ බුද්ධිඅංශ නිලධාරීන් වෙතට ලැබුණ තොරතුරකට අනුව එහි නිලධාරීන් පිරිසක් විසින් මන්නාරමේ සිට මැදවච්චිය දෙසට ගමන්ගත් කාර්රථයක් පසුපස ලුහුබැඳ පසුව කුංචිකුලම් ප්‍රදේශයේදී කාර් රථය නවතා සෝදිසි කිරීම සිදුකරන ලදි.

අනතුරුව කාර් රථයේ සඟවා තිබූ කිලෝ එකකට ආසන්න අයිස් මත්ද්‍රව්‍ය තොගයක් සොයාගෙන ඇති අතර එම අවස්ථාවේ කාර් රථයේ රියදුරු සහ තවත් අයෙකු යුදහමුදා බාරයට ගනු ලැබීය.

අදාල අයිස් මත්ද්‍රව්‍ය තොගය මන්නාරමේ සිට කල්පිටිය ප්‍රදේශයට ප්‍රවාහනය කිරීමට සැලසුම් කොට ඇති අතර අත්අඩංගුවට පත් සැකකරුවන් කල්පිටය ප්‍රදේශයේ පදිංචි 38 හැවිරිදි අයෙකු සහ මන්නාරම අඩම්පන් ප්‍රදේශයේ පදිංචි 28 හැවිරිදි අයෙකු වෙයි.

හමුදා බාරයට ගත් සැකකරුවන් සහ අයිස් මත්ද්‍රව්‍ය තොගයන් වැඩිදුර පරික්ෂණ කටයුතු සඳහා මන්නාරම් පොලීසියට භාරදීමට යුදහමුදාව පියවර ගන්නා ලදි.