රු. කෝටි හතක වංචාවකට ඇඹිලිපිටිය ප්‍රා සභාවේ නිලධාරීන් තිදෙනෙක් රිමාන්ඩ්

සබරගමු පළාත් සභාවෙහි ව්‍යාපෘති හැත්තෑ හතකට අදාළව රුපියල් හත් කෝටි දාසය ලක්ෂ හතළිස් පන්  දහස් දෙසිය විසි හයයි ශත තිස් දෙකක් (71645223.32) සාවද්‍ය පරිහරණය කිරිම සම්බන්ධව ඇඹිලිපිටිය ප්‍රාදේශීය සභාවේ හිටපු ලේකම්වරයෙකු, තාක්ෂණ නිලධාරියෙකු සහ විෂය ලිපිකරුවෙකු මේ මස 08දා තෙක් රිමාන්ඩ් භාරයේ තබන ලෙස ඇඹිලිපිටිය ප්‍රධාන මහේස්ත්‍රාත් තිළිණ මහේෂ් පීරිස් මහතා 01දා නියෝග කළේය.

මෙසේ රිමාන්ඩ් භාරයට පත් කෙරුණේ ඇඹිලිපිටිය ප්‍රාදේශීය සභාවේ හිටපු තාක්ෂණ නිලධාරි වයි.එම්.පී. බණ්ඩාර, හිටපු ලේකම්වරයෙකු වූ සිංගප්පුලි ආරච්චිගේ චින්තක කුමාර සහ හිටපු විෂය ලිපිකරුවෙකු වූ විතාරණගේ අමල් තුෂාර යන තිදෙනාය.

ඔවුන් අතරින් විතාරණගේ අමල් තුෂාර යන අය 31 දින අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන තිබුණි. සෙසු සැකකරුවන් දෙදෙනාගෙන් වයි.එම්.පී. බණ්ඩාර යන අය මාර්තු 03 දින ද, සිංගප්පුලි ආරච්චිගේ චින්තක කුමාර යන අය මාර්තු 27 දින ද අත්අඩංගුවට ගෙන රිමාන්ඩ් භාරයට පත්කර තිබුණි. ඒ අනුව එම සැකකරුවන් දෙදෙනා බන්ධනාගාරය මගින් අධිකරණය වෙත ඉදිරිපත් කරනු ලැබීය.

2016 සහ 2017 වර්ෂ සදහා ඇඹිලිපිටිය ප්‍රාදේශීය සභාවේ විවිධ ව්‍යාපෘතිවලට යෙදවීමේදී ව්‍යාපෘති 77කට අදාළව රුපියල් 7,16,45,226,32ක මුදල් වංචා කිරීම සම්බන්ධයෙන් 2023 ජනවාරි 20 දින අපරාධ පරීක්ෂණ දෙපාර්තමේන්තුවට ලැබුණු පැමිණිල්ලට අනුව සැකකරුවන් අත්අඩංගුවට ගෙන ඇත.

සබරගමු පළාත් සභාවේ පළාත් මාර්ග සංවර්ධන, ග්‍රාමීය යටිතල පහසුකම්, සංචාරක, ක්‍රීඩා හා යෞවන කටයුතු අමාත්‍යාංශයේ ලේකම් බමුණුආරච්චිගේ චාමර ප්‍රේමනාත් යන  අය විසින් අපරාධ පරීක්ෂණ දෙපාර්තමේන්තුවේ මූල්‍ය හා වාණිජ අපරාධ දෙපාර්තමේන්තුවට පැමිණිලි කර තිබේ.

රුපියල් 71645226.32ක මුදලක අලාභයක් සිදුකිරීම,එම මුදල් සාපරාධී සාවද්‍ය පරිහරණය, සාපරාධී විශ්වාසය කඩකිරීම, කූට ලේඛන සකස් කිරීම,පොදු දේපළ විෂයෙහි ලා සිදුකරනු ලබන වැරදි සම්බන්ධයෙන් සැකකරුවන් අත්අඩංගුවට ගෙන තිබුණි.

ඉහත ව්‍යාපෘති 77 අතරින් 15ක් සිදුකර නොමැති බවද අධිකරණය හමුවේ හෙළි විය. මාර්ග හා ක්‍රීඩාපිටි ඉදිකිරීම සම්බන්ධයෙන් මෙම වංචා සිදුව ඇති බව රහස් පොලීසිය අධිකරණයට කරුණු දක්වමින් පෙන්වා දුන්නේය.

ඇමිලිපිටිය ප්‍රාදේශීය සභාව මගින් මාර්ග ව්‍යාපෘති පහළොවක්, පස්කපා මාර්ග ව්‍යාපෘති දහතුනක්, කොන්ක්‍රීට් අතුරා සංවර්ධනය කළ මාර්ග දොළහක්, තාරයොදා සංවර්ධනය කළ මාර්ග දොළහක්, ග්‍රොවල් යොදා සංවර්ධනය කළ මාර්ග හයක්, ක්‍රීඩා පිටි දොළහක් යන ව්‍යාපෘතිවලින් මෙම මුල්‍ය වංචාව සිදුව තිබේ.

මෙ අපරාධය සම්බන්ධයෙන් විමර්ශන තවමත් සිදුකෙරෙන බව පැමිණිල්ල වෙනුවෙන් කරුණු දැක්වූ අපරාධ පරීක්ෂණ දෙපාර්තමේන්තුවේ නිලධාරීන් අධිකරණය හම්වේ පවසා සිටියහ.

අපරාධ පරීක්ෂණ දෙපාර්තමේන්තුවේ මූල්‍ය හා වාණිජ අපරාධ විමර්ශන ඒකකය (03) හි ස්ථානාධිපති ප්‍රධාන පොලිස් පරීක්ෂක එස්.එස්.එම්. සාජිත් මහතා විසින් සැකකරුවන්ට එරෙහිව බී වාර්තා අධිකරණය වෙත ඉදිරිපත් කරනු ලැබීය.වැඩිදුර විභාගය අප්‍රේල් 08 දිනට කල් තැබිණ.